【好返喇】囝囝戴矯型頭盔5個多月 楊洛婷分享扁頭綜合症求醫過程

2022年08月18日07:00

楊洛婷和Dear Jane主音老公Tim(黃天翱)育有一對仔女,1歲囝囝Tristan近幾個月要戴矯型頭盔,楊洛婷解釋是因為囝囝患上了扁頭綜合症,又高興表示經過5個多月的努力,終於完成治療。

楊洛婷留言分享求醫過程,希望可以幫到其他有需要的家長和BB:

「芯哥頭盔畢業啦,過去呢幾個月好多人都問我點解芯哥成日都要戴頭盔?!

其實Tristan 2個月大時,我哋開始發現佢頭部一直只轉向左側,令頭仔變扁,我試過好多方法,例如用人手幫佢轉向右方、按摩、BB枕頭、矯形啫喱枕頭,但佢每次用jelly枕頭都大喊大叫。直到佢6個月大時,我開始擔心,因為Tristan左方嘅扁頭越來越明顯,當時,我堂細佬同我講述佢個仔嘅經歷,如不正視情況就會越來越嚴重,並介紹我訂造矯型頭盔。

經過治療師嘅evaluation,我哋知道Tristan 嘅頭型係屬於扁頭綜合症裏面嘅中等平頭 , 有輕微不對稱, 主要集中在左後邊。頭盔治療嘅黃金時間一般係喺BB四至八個月大進行, 效果最為理想。而Tristan當時係大約7個半月大開始頭盔治療, 啱啱趕得切黃金時間, 俗語話 "腦筍未生埋" 之前嘅時間去幫Tristan改善頭型。

其實我都考慮咗一段時間,因為價錢不便宜,但醫生話如果唔處理最嚴重嘅話會影響前額、耳仔不對稱、重心向前傾、頸背肌肉拉扯 ,甚至面容發展,影響平衡力,所以我哋都決定試吓。好彩Tristan戴上頭盔後冇唔適應,首日戴一小時,第二日戴兩小時,之後全日戴上23小時,連睡覺都要戴著。頭盔嘅質料好似發泡膠,Tristan 戴咗一個月,已經可以向右面擰,情況改善咗好多。起初戴頭盔要每半個月見治療師調校size,之後每一個月見一次就可以。除咗矯型外,我哋發覺仲有保護佢嗰頭仔嘅作用,因為Tanya 成日抱佢,經常差點撞到細佬嗰頭 。

雖然7個半月大的BB一般頭圍生長速度開始減慢, 但Tristan經過5個多月嘅頭盔治療, 佢嘅改善成績好明顯, 而家已對稱,可以畢業啦!」

關注我們Facebook專頁
    相關新聞
      更多瀏覽