Anson Lo:「我個人咪係禮物!」 欣宜紅館騷冧到爆

2022年06月12日03:00
教主出場掀起全場高潮,欣宜更冧爆告白指經常夢見對方。

【星島日報報道】

(星島日報報道)一連三場「Between Us鄭欣宜演唱會」前晚在紅館開鑼,當晚欣宜驚喜邀得「教主」盧瀚霆(Anson Lo)做表演嘉賓,合唱時教主搭着欣宜膊頭,又親自為她抹汗,更以甜言蜜語冧爆欣宜,引全場尖叫連連。至於ERROR則全員為Encore時壓軸表演,大放笑彈𠱁得欣宜笑呵呵。

鄭欣宜(欣宜)紅館騷前晚開鑼,圈中好友蔡一智與太太、蔡一傑、廖碧兒、陳淑芬與兒子陳家豪、GinLee、ANSONBEAN、軟骨BEN等齊捧場。雖是第二次在紅館開騷,但卻是欣宜首次以四面台演出,難怪她表示:「開四面台,我真係有少少緊張,因為我係零方向感!」欣宜更謂︰「四年前我已經開了第一次紅館演唱會,但唔知點解,今次感覺好似係第一次咁,可能因為過去這四年中,大家用了好多心機和時間去重新認識我,好多謝你們給我這個耐性。」當台下觀眾大嗌「加油」、「愛你」,令欣宜感動到眼濕濕。

「夢想真係成真」

當晚欣宜邀請了「教主」Anson Lo及ERROR做表演嘉賓,她介紹教主出場時說:「我成日發夢見到呢個人,我真係好鍾意佢,多才多藝。」兩人合唱《不可愛教主》時,Anson Lo搭着欣宜膊頭,令她害羞甜笑:「夢想真係可以成真㗎!」Anson Lo又用紙巾為她抹汗,並說:「我哋工作上接觸大約一年半,當我今日下午綵排,上到你這舞台時,衷心感受到你終於做到你想做嘅野,替你開心!雖然我無辦法經歷你過去咁多年來嘅事,但我作為後輩替你開心,剛才聽到你彈琴唱歌,好似同你經歷咗好多野!」欣宜聽到「後輩」一詞即笑言︰「我唔係大你好多之嘛!點解你無帶禮物送畀我嘅?」Anson Lo深情說:「我個人咪就係禮物!」令欣宜冧爆大叫:「喂呀,我輸啦!」

至於ERROR今次特別送上獨一無二、分別印了各成員肖像的上衣給欣宜,更命名「春夏秋冬系列」。代表春天的何啟華笑言:「春天令人諗到潮濕,你着我呢件tee就好潮,然後好濕。」令全場爆笑,欣宜作狀打他;梁業(肥仔)則說:「夏天梗係着我呢件雞翼袖,你老公(Anson Lo)新歌MV都係着雞翼袖,襯晒佢,但你照鏡就見到我!」吳保錡拍片講招牌港普、郭嘉駿(193)就自肥拍片宣傳Solo歌,非常搞笑。

關注我們Facebook專頁
    相關新聞
      更多瀏覽