Stephy笑言當年揀錯阿力 軒公:揀返我囉!

2022年05月28日03:00
張敬軒跟鄧麗欣相識十多年,感情要好。

【星島日報報道】

(星島日報報道)《張敬軒THE NEXT 20演唱會》前晚在紅館舉行第13場,張敬軒(軒公)請來鄧麗欣(Stephy)及女團COLLAR擔任嘉賓,他重提當年跟Stephy合演電影的趣事,笑她當年望慣另一個靚仔方力申,Stephy笑言劇情講她揀「阿力」(方力申飾演)是不太好,軒公即爆金句:「戲外十幾年後,你揀返我!」

軒公在台上談到工作上甚少涉獵電影,他自言曾經拍過一部,但自己在電影上映後多年,一次也不夠膽翻看,自嘲當年樣子「又乾又瘦又冇運行」,但讓他識了一位好朋友,並介紹Stephy出場,然後他跟對方甜蜜拖手合唱《十分愛》。

Stephy乘機谷戲

兩人大談過去拍《十分愛》的往事,軒公話:「我哋咁多年來都好似冇變過咁,大家都Keep得OK喎,但係返入去落咗妝就唔知,我話我呀,哈哈!」Stephy謂:「你冇嗰時《十分愛》咁乾乾瘦瘦,我睇番我哋段片,我嗰時真係演技麻麻。」軒公即表示:「你記唔記得其中一場講我想『溝』你,你坐喺鋼琴隔籬,呆咗望住我,但我睇唔到你有愛的眼神。」他再口快快說:「你當時望慣咗另一個靚仔。」Stephy搖着頭:「其實我覺得劇情都唔係咁好,你咁有才華嘅靚仔,我喺戲里面點解唔揀你,揀咗阿力呢?劇情唔係好得。」軒公不禁爆金句:「戲外十幾年後,你揀返我咪得囉!」Stephy最後向軒公送上主演新戲《飯戲攻心》的換票證。

到安歌環節,軒公請來新女團COLLAR上台,笑說:「叔叔落台欣賞你哋表演。」COLLAR即叫停軒公,並拿出一籃醬汁說:「我哋祝你愈食愈好,作品愈來愈高汁。」軒公收下禮物笑言:「你哋真係有老人家心。各位睇吓依家啲後生,送禮好似去老人院探病,我呢位院友多謝咁多位義工,叔叔降返落去先,轉頭帶你哋去睇金魚。」

關注我們Facebook專頁
    相關新聞
      更多瀏覽