黎明騷舞功 獲Sammi大讚狂野

2021年07月13日03:00
黎明與鄭秀文這對舊拍檔,於廿多年前合作電影《愛你愛到殺死你》。

【星島日報報道】黎明(Leon)前晚在紅館舉行第二場演唱會,獲天后鄭秀文(Sammi)擔任表演嘉賓獻唱《信者得愛》,獲Leon伴舞兼Rap歌的Sammi在社交網晒短片笑言成功打開Leon的腿!Leon在台上又分享自創日本的風呂式減肥方法,Sammi笑指好有畫面,又爆Leon好飄好迷離一面。

前晚到紅館捧場的圈中人包括Leon的契爺胡楓(修哥)、霍啟剛與太太郭晶晶、林嘉欣與導演老公袁劍偉、蔡一傑及童愛玲等。Leon和Sammi前晚合體大唱《信者得愛》,Leon戴黑超在Sammi身邊為她伴舞又Rap歌,令Sammi驚喜大叫:「Leon跳舞呀!」全場觀眾為之歡呼尖叫!

Sammi其後在社交網分享台上精采一幕,笑言:「Mi的《信者得愛》成功打開了Leon的……腿和腳!黎生跳舞!好狂野!城城見到應該會雙腿發軟怯一怯。」

Leon又在台上趁機跟Sammi分享「出汗」心得,他公開自己用日本風呂式Keep Fit方法。「首先開個Bath,除衫然後浸落去。」Sammi聽後不禁大叫:「嘩,好有畫面喎!」Leon續說想像自己在日本,聽風呂音樂浸20分鐘,起身着浴袍,房入面開28度空調,食一碗辣麵,坐15分鐘,流一身汗之後肯定少了3至4磅。Sammi更笑言會「流鼻血」:「又浴缸又除衫,好有畫面……見到你啲肥肉呀!現時冇,現時好fit!」

講到興起,Sammi忍不住爆Leon料:「我要爆黎明少少野,佢唔知由幾時開始個人好飄、好迷離。幾年前佢打電話俾我,話想幫我監製一首歌。我心諗:乜你識監製歌嘅咩?心里滿是疑問,不過見你係黎明就好啦!」Sammi所指就是雷頌德為她寫的歌曲《犀利》,她續爆Leon當時更說要幫她拍MV,她笑言:「MV?於是我上網查吓你拍過咩MV。點知有一日,你又話我知唔得閒,唔幫我拍MV啦!嘩,乜你咁飄㗎?你啲節奏好難跟呀!」Leon也坦言:「我知我成日講野斷片,生活都係咁。(啲人話生咗仔會無記性。)又唔係我去生。(生女可能會好啲。)可能係,哈哈哈!」

關注我們Facebook專頁
    相關新聞
      更多瀏覽