【太極樂隊紅館演唱會】海報個個變晒90後!鋼琴留白向Gary致敬
2021年06月09日11:43

太極樂隊日前宣佈將於8月7-8日於紅館舉行《太極RAINBOW AFTER RAIN演唱會》,日前隊友齊集為個唱開會,更討論新一輯廣告細節。廣告以動畫形式進行,眾人的容貌四秒後慢慢變老「三十六年」,屆時將成為真正的「90後」(即90歲後),而片中更預留空置的電子琴,向已故成員Gary Tong致敬!

主音雷有輝就大爆隊友Ricky「出蠱惑」,要求設計師幫手出術:「我哋每一個都變晒90歲嘅樣,淨係佢一個人揀張咁後生嘅相,睇落同依家都冇咩分別咁,可能佢都知自己擺唔耐,未必有90歲命掛?其實變老好容易,我哋做少幾次Mask、唔化妝都可能有呢啲效果。」

Joey Tang就話比自己個樣嚇親,笑言有「趕客」成份:「初初諗邊個咁大整蠱啊?原來係由老變後生,咁都好啲,因為有比較,依家睇落仲靚仔咗好多!今次個騷好多Gary生前嘅好朋友都話想幫手,所以好多人都嚟支持。呢一刻我地仲未綵排,但都唔習慣冇咗佢,所以呢輯廣告都會有個Keyboard留空比佢,每一個細節都預佢一份。」

Hi-Fi德就叫太極Fans積極撲飛,直言未知何時會再搞個唱:「依家世界日日改變,呢個騷都因為病毒延期咗幾次,下次再聚都唔知幾時,可能要到30年後先有機會搞,到時我哋仲未死又行得郁,再唱比大家聽囉!」

關注我們Facebook專頁
    相關新聞
      更多瀏覽