張兆輝送機不捨眼紅紅
2020年08月24日03:00
輝哥是出了名的廿四孝老竇,難怪張焯鏗也要豎起拇指。

【星島日報報道】張兆輝(輝哥)早前偕家人歎高級意大利菜慶祝寶貝女16歲生日,之後又陪女兒去食魚蛋粉,但受制於限聚令下只好分開兩檯。然而暑假快將過去,一對子女要返英國為開學準備,輝哥前晚為子女送機時表現得極為不捨,當子女入閘後更是眼紅紅。

張兆輝一對子女張焯鏗(Edison)和張卓姿(Twiggy)早前因疫情關係由英國返港避疫,出名是「廿四孝老竇」兼「暖男老公」的輝哥,當然珍惜與子女相處的時間,上月跟寶貝女Twiggy歎高級意大利菜慶祝16歲生日,又孖住行山。然而一對子女要返英國為開學準備,「廿四孝老竇」輝哥前晚十時半與一對子女出現機場,身穿灰色Tee的輝哥與女兒並肩而行,又為女兒推行李到商務機櫃位Check in,輪候期間輝哥不時輕拍女兒個頭,可見他十分不捨。Check in後,輝哥陪同子女行去離境閘口期間,全程傍實女兒,亦跟子女在閘口前擁抱又拍照留念。張焯鏗率先在離境大堂以容貌識別機自助進入禁區,隨後的張卓姿因未能識別,於是改去有工作人員的櫃位排隊,此時見輝哥表現緊張,最後見到愛女順利步入禁區與兒子會合才鬆一口氣,並跟子女揮手道別。當問到輝哥是否很不捨得子女?輝哥隨即眼紅紅說:「都要返去啦!」

輝哥透露兒子於九月中開學,要預早少少時間返英安排學校宿舍,女兒則九月初開學,首先會在學校隔離14日同溫習,臨上機也有叮囑子女要小心,好似返港時一樣要穿着保護衣、手套及戴面罩等,又笑指子女喜歡坐長途機,因為可以睇戲或玩電腦,亦適應到時差問題。談到可有為子女準備防疫用品,他說:「帶了幾個月用量的口罩,再帶多咗少少,睇吓同學有冇需要!我相信女兒需要量不大,因為她成日留在宿舍內,一個口罩用一、兩次都得!出去戶外就會勤力換,現時已大個識照顧自己,仲買咗維他命畀他們吃。」輝哥又指女兒會在聖誕節返港,但兒子未必會返,希望當地疫情不會再嚴重,亦呼籲大家要自律戴口罩令疫情減退。談到一對寶貝子女返英,問到如何平衡心情?他說:「聽日(今日)返工啦!本來要開工送唔到機,但可能場景問題調動咗,所以變咗我送到機。心情好空虛,屋企隻狗一見他們走都sad,小狗好醒㗎!見他們打開行李就好靜坐低,我應該兩個星期就可以平復心情,同埋唔好靜!今日經過條路,我諗起跟女兒黃昏時行過的回憶。不過他們返英後,就會減少互動,一星期兩、三次囉!(聖誕節放假陪女兒?)未必在香港,要去工作,希望到時疫情已完結,如果仲要14日隔離則未必在港,還好現在有視像可以止吓咳啦!好過無。」

對於太太未有出現在機場,輝哥指太太在家中不小心撞傷腳,其實太太也有到機場,只是在車內等候,太太經已擁抱過一對子女,又笑言自己每次送機,都會想起子女年幼時,但子女現已長大,分分鐘可以照顧番他。他說:「如果我去英國探他們,都是兒子安排,唔使我傷腦筋。現時我好放心,女兒跟兒子一齊返去,始終女兒仲細,雖然生得高大,但都係小朋友,兒子同她一齊無咁擔心。」

此外,陳敏之原本有份參與《飛虎3之壯志英雄》拍攝,惟近日有指她因在社交平台轉發一張圖片激嬲內地網民而被踢出劇組,改為陳煒頂替演出。身為拍檔的張兆輝表示沒有影響,讚對方好切合今次事業型的角色。談到陳敏之事後解釋因疫情關係想更多時間留在家照顧小朋友而辭演,他說:「目前拍戲都係冒險去拍,但無辦法亦無可能停下來,直至零個案,大家有大家憂慮。始終她有小孩,唔通人哋開工,你就唔開咩?其實開工實有少少風險,但開工時全部人戴上口罩,長期有搓手液,加上每次場景開完幾日都會做消毒,盡量做到最安全。」

關注我們Facebook專頁
    相關新聞
      更多瀏覽