【太極重組】合體拍MV翻唱《留住我吧》 12月舉行大型個唱
2020年07月06日15:06

太極早前合體拍攝MV,為今年演唱會打響頭炮,眾人重新演繹《留住我吧》,結他手德哥就話曲風配會更「有型」,希望為港人打氣:「因為疫情大家呢半年都好困擾啦,所以今次曲風會比較多爵士樂,感覺會輕快啲,而且我地呢班中佬都開始年紀大,唱Jazz感覺會型啲!」

Gary Tong話太極欠缺Band Leader一職,提議即場投票,他被隊友一致推薦當選:「我其實都唔知會發生咩事,淨係知道今日嚟拍MV,但聽講年尾有個大搞作,冇咩所謂啦,大家埋位就會搞得成㗎啦!話時話我地都成5年冇一齊拍MV,今次難得聚埋,搞到現場好嘈,因為成班人都鍾意講嘢,但永遠自己有自己講,唔理人㗎!」

主音雷有輝透露,太極將12月舉行大型個唱,自己演唱會亦是由年底個唱演變出來:「冇十二月太極騷,就冇八月我個人音樂會,佢地想我打頭陣,同Fans熱吓身!頭先Joey訪問話叫人留錢買12月個騷,呢個兄弟衰到呢,所以八月個唱我會拉埋佢落水,做我演唱會音樂總監,費事佢甩講嘢!」

鄧建明就話年底太極騷圓夢,希望飲住酒開騷:「因為西九舉行戶外騷,大家睇住個日落,飲番兩杯聽我地唱歌,個氣氛一定正!我地四面台又做過,紅館又做過,今次終於可以成萬人陪我地睇日落,希望唔會唱唱吓飲醉咗啦!」

關注我們Facebook專頁
    相關新聞
      更多瀏覽