祖兒飛撲勇救克勤一命
2019年08月11日03:00
■祖兒、克勤默契十足,合唱之餘不忘互窒搞笑。

【星島日報報道】(星島日報報道)容祖兒(Joey)入行20周年的紅館騷《容祖兒Pretty Crazy演唱會2019》前晚來到第5場,邀請到另一重量級嘉賓李克勤,兩位超級靚聲王完美演繹《月半小夜曲》及《刻不容緩》,令觀眾讚歎不已。楊受成與太太、莫文蔚、毛舜筠等均現身捧場。

克勤一亮相就大讚祖兒紅館個唱好厲害,笑說:「嘩,真係要恭喜你先!個騷真係好犀利!成晚係對眼未停過,好忙!你個舞台設計師叫咩名話?聽講好勁,幫好多國際巨星設計舞台,我都係第一次聽到設計師人工高過歌手!」

繼而克勤笑着指着頭頂的舞台設計說:「佢哋話呢件係藝術品!我個人覺得設計師個靈感一定係來自我哋個蚊香!」語畢引來全場大笑,祖兒更加笑到站不穩。

隨後克勤更為觀眾爭取福利:「我唔知你點搞啦,今晚星期五大家無咩做,你一係唱夜啲補番啦,反正你好多歌都未唱!」祖兒笑說︰「你手指拗出唔拗入呀你!你講啦你,你同我睇到開燈先好走呀!」隨後兩人合唱《刻不容緩》後,克勤落台時因太心急之下,竟然企錯位,險生意外。祖兒見狀9秒9飛撲過去攬着克勤,她笑說:「行錯路啦你,呢度降你落去呀,阿哥!」救回克勤一命。

關注我們Facebook專頁
    相關新聞
      更多瀏覽