有一種友情叫「你同XXX」十大閨蜜特徵!妳身邊嘅佢有中幾多?
2019年08月07日00:00

邊個話重色輕友!比另一半更重要嘅好姐妹

好多人都話「人越大朋友越少,但留低嘅都係最重要嘅嗰幾個」,就算唔再好似以前日日返學咁日日見面,但每當遇到開心嘅事,會第一時間想同佢分享、傷心都會希望有佢係你身邊。女仔之間嘅友情比起男仔嘅兄弟情往往更加親密,拖手行街、通宵傾電話都係平常事。今日DailyView用網路大數據一齊帶大家睇下以下十大真正閨蜜嘅特徵,妳同妳嘅閨蜜又中咗幾多呢?

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

10 陪你走出分手低潮

「情人係一時,但閨蜜係一世」,雖然拍拖嘅時候可能會冷落咗好姐妹,不過當你一個電話,佢都會聽你呻、陪你鬧,陪你喊,或者情人唔會陪你走到最後,但好姐妹都會一直陪住你。唔知大家有無經歷過呢D時候呢,當情人離開你嘅低潮,好姐妹話俾你知,無論發生咩事,至少仲有佢,呢一種感情真係比起愛情更加珍貴呀。

image source:Facebook/櫻桃小丸子驚點語錄

9 首席伴娘嘅不二人選

對於一個女仔黎講,結婚絕對係人生好重要嘅一件事,伴娘呢個身分都表示住佢同新娘嘅友誼有幾深厚。應承得做姐妹一D都唔簡單㗎,除咗婚禮前後都要做好多準備工作,仲要打點一切大小事,真係少D義氣都唔得。不過可以親眼見證住自己好朋友步入人生另一階段,為佢準備最完美嘅一個婚禮,望住佢咁幸福喊到妝都花埋,都係值得嘅。

image source:Facebook/Twins 蔡卓妍&鍾欣潼

8 每年精心幫你慶祝生日

當大家都畢咗業,少咗見面機會,生日呢D特別日子就梗係要約出黎食個飯,幫閨蜜慶祝啦。做得好姐妹,大家生日一定都會記得,而且要提早book定檯,訂定蛋糕,買好禮物同對方慶祝。其實最重要都唔係食咩,禮物係咩,而係大家有個機會可以見個面,傾下計,而且對方願意將生日呢一日留俾你,都證明咗你係對方心中嘅重要性。今年生日你又準備點幫好閨蜜慶祝呢?

image source:霍汶希微博

7 對你嘅要求有求必應

「出得嚟行,梗係要義字行頭」啦,對住好姐妹都一樣,上刀山落油鑊都在所不辭,有求必應。真正好朋友就係會陪妳做好多瘋狂嘅事,就算無曬形象都無所謂,妳開到聲,諗都唔諗就願意陪妳一齊癲。有咩事要佢幫手,都唔會托妳手踭。呢D好姐妹真係要好好珍惜呀!

image source:Facebook/櫻桃小丸子驚點語錄

6 shopping第一人選

唔少男士都覺得陪女朋友行街係酷刑,因為通常一行就係全日,而且女朋友問親意見都唔知點答,女仔又會覺得好無癮。所以話,行街對象真係要慎選,最佳人選就梗係閨蜜啦。身為最了解你嘅人,知道你適合咩風格、顏色,買起野上黎特別志同道合,大家互相幫大家襯衫,成個氣氛真係差好遠!

image source:unsplash

5 鍾意著一樣嘅衫

相處得耐,大家都難免被對方影響,著衫風格都可能會越黎越接近。近年好多好朋友都會特登襯一套「閨蜜裝」出街影下網美相,靚都要拉埋閨蜜一齊靚㗎嘛。因為鍾意嘅風格類似,買衫都自然會差唔多,甚至直頭買埋同一款、同一件衫。雖然平時女仔最怕出街同人撞衫,不過如果係同自己閨蜜撞衫就唔同講法啦,身體力行話俾全世界知道你地感情有幾好。

image source:Facebook/櫻桃小丸子驚點語錄

4 手機入面一堆妳嘅自拍同醜照

證明你同閨蜜感情好定唔好嘅其中一個線索,就係你電話入面有幾多對方嘅醜照。通常大家擺得上網嘅相都係化個靚妝,就曬角度,影好、修好圖之後先公開。作為閨蜜,見你素顏就好平常,而因為大家係對方面前都毫無掩飾,所以往往手上都會有對方最「不堪入目」嘅相,呢D都係相處入面好值得回味嘅時刻,雖然可能係大家嘅黑歷史,不過睇返都會記起當時開心嘅時光!

image source:unsplash

3 一齊食美食

約得閨蜜出黎,成日流流長,行街之餘,去食好野、影相打個卡都係必做嘅事之一。正所謂獨食難肥,將美食同好朋友分享梗係會更開心。每次係Facebook同Instagram見到近排咩餐廳最多人推薦都一定要tag閨蜜,約定下次一齊去。一邊食一邊講八卦傾下近況,雖然可能成日笑對方呢排係咪又肥咗,但美食當前,食咗先講啦。

image source:Facebook/櫻桃小丸子驚點語錄

2 無話不談

好姐妹好多時唔洗講咁多,一個眼神就知道大家心入面諗緊咩。但係萬一你真係需要盡訴心中情嘅時候,閨蜜一定都願意聽你講。而因為感情好好咩都可以講,無論係工作,感情定家人,閨蜜都可能做一個好好嘅聆聽者,都會毫無掩飾,俾最真心嘅意見你。事實好多事未必啱聽,但有願意同你講真話嘅人真係好難得,所以要明白對方都係為你好先咁誠實對你呀。

image source:Facebook/櫻桃小丸子驚點語錄

1 一齊去旅行

好多人都話去旅行係好考驗友情嘅事,因為由安排行程到實際朝夕相對,好容易會有意見不合嘅時候。不過其實大家都咁了解對方,其實好多習慣都一早知道,另外一D日常生活嘅細節磨合一下就無事啦。反而一齊去旅行都係一個好機會令大家感情進一步,真係可以「促膝把酒傾通宵都不夠」,同閨蜜影一堆靚相留念。排係閨蜜必做清單第一名當之無愧呀。

image source:Facebook/櫻桃小丸子驚點語錄

分析說明:

本研究資料由《KEYPO大數據關鍵引擎》提供,分析時間範圍為2019年05月09日至2019年08月06日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『閨蜜』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

關注我們Facebook專頁
    相關新聞
      更多瀏覽