元朗YOHO MALL大型美食廣場 7月開幕!12間掃街小店進駐|區區搵食
2019年06月28日21:31

元朗街坊注意!首個大型美食廣場「Foodeli」7月9日登陸YOHO MALL!場內多達12間掃街小食店進駐,包括本地特色小店、中日韓泰等,任君選擇!除了美食外,還設有零售專區,食完之後又同時shopping,相當方便!

撰文:Sakura 攝影:YOHO MALL

元朗YOHO MALL開美食廣場!

元朗區內首個大型美食廣場Foodeli即將於 7月9日開幕, 更設於元朗最大型商場YOHO MALL,以後街坊又多一個掃街好去處啦!場內有12間掃街小食店進駐,提供各式各樣街頭小食,如本地特色小店,中日韓泰等各國美食,想食咩就食咩!除了美食外,更設有零售專區,顧客可以同時間又食又買,相當方便!

裝修方面,用上鮮明顏色作主調,配搭簡單清新木系風格,柔和舒適,擺脫傳統美食廣場予人沉悶的感覺,既年輕又活力。另設有兒童用餐區及遊樂設施,小朋友一定食得更開心!

進駐店舖逐間睇!

1.元朗燒賣皇后 30年街坊老字號

相信大家都對燒賣皇后不陌生,元朗燒賣皇后妙舒扎根元朗超過三十年, 堅持自家製作,主打多款街頭小食如燒賣、魚蛋、生菜魚肉等,最著名是自創的香菇豬肉燒賣,選用新鮮豬腩肉混上手打鯪魚肉,再配上冬菇,魚香彈牙,層次分明,調製出香港經典味道!

2.三多炸髀 即叫即炸雞髀極香脆

人氣小食店三多,所有食品都是即叫即炸,保證熱辣辣,招牌炸雞髀香脆鬆軟,啖啖滋味。除了炸雞髀外,炒腸粉亦是堅持天天自制,確保軟滑彈牙!

3.Bove 梳乎厘班戟小店

人氣甜品小食店Bove,主打的梳乎厘班戟, 即叫即造,蛋香濃郁,口感軟綿鬆化,充滿幸福感覺!另外還有抹茶麻糬雞蛋仔,用上高級日本抹茶粉製作蛋漿,每顆雞蛋仔都含煙韌的麻糬,極富口感。

4.甜舍 新潮冰點甜品店

以賣相出眾的新派甜品作主要概念的甜舍,主打以士多啤梨系列的冰沬和梳打類飲品,當中的士多啤梨梳打,賣相出眾,食落爽甜。

5.叉燒丼家傳統港式燒味

叉燒丼家主打港式燒味飯,其中招牌黯然銷魂飯,半肥瘦的叉燒,肉味香濃,軟嫩多汁,陣陣豬油的甘香,超正!

6.肉餅哥 手打豬肉製作

肉餅是家常便飯中經常出現的菜式之一,肉餅哥就將平凡的肉餅加入創意,演繹多款創新口味的肉餅菜式。招牌金沙蛋黃煎肉餅,以七三肥嫩瘦肉, 用人手手打肉餅,煎至金黃色,再配上鹹蛋黃醬汁,入口juicy,佐飯一流!

7.阪神日式料理大阪燒

阪神主打各款大阪燒、章魚燒、日式炒麵等日本人氣美食。當中招牌推介大阪燒,餡料豐富,加上自家調配的餅漿,澆上濃厚獨特醬汁和柴魚片,外脆內軟,口感層次突出,好惹味!

8.炑八Taste韓系輕食

炑八 Taste主打多款韓式輕食,其中鰻魚飯用上原條釜山直送鰻魚,份量十足,啖啖鮮嫩鰻魚肉,加上炑八獨家調配秘製鰻魚燒汁,滋味不斷!

9.泰麵膳傳統船麵

最近人氣大熱的泰式船麵都有得食啦!泰麵膳招牌安格斯牛肉船麵,以新鮮牛肉配以八角,荳蔻, 胡椒,花椒等等正宗泰國香料餚製而成,濃郁芳香,味道獨特,充滿地道風味!

10.山城小麵 酸辣小店

酸辣粉為重慶街頭常見的傳統特色小吃,山城小麵用上自家調製辣椒油,提供四種不同辣度,選用 Q 彈煙韌的扭紋薯粉,以由重慶空運而來的辣椒、香料等煉製的秘製辣油為特色,配以肉碎、榨菜、黃金豆等,集麻辣鮮香為一體,酸而不激,油而不膩!

11.牛肉麵梅之味台南古早味

台灣古早味,保留台南傳統風味,讓人一試愛上。梅之味是一間主打台南美食的小店,其中牛肉麵麵條有獨特的配方,特別委託麵廠製作,食落口感Q彈,有台灣風味。

12.郭仔記車仔麵 大埔街坊人氣店

車仔麵是最能代表香港飲食文 化之一,郭仔記車仔麵源於大埔大榮裡,擁有二十多年的經驗,當中必點就是郭仔記招牌麵,擁有四十款餸和八種麵底供給選擇,五種湯底醬汁,食落惹味有層次,食極不厭!

Foodeli

地址:元朗朗日路8-9號及元龍街9號形點I期2樓2042號舖

營業時間:星期一至四及星期日:10:30am-10:00pm

星期五六:10:30am-10:30pm

Facebook:Foodeli

Instagram:foodelihk

延伸閱讀:

【香港沙灘好去處】即帶毛孩去游水 5個狗狗可入沙灘

中環The ThirtySix Bar & Co $500周末調酒班+獨家餐單 |非常餐單

關注我們Facebook專頁
    相關新聞
      更多瀏覽