【白色強人】蔣志光小學畢業為生計堅毅學英文 流利英語霸氣擊退外國人!
2019年06月28日16:22

話說TVB新劇《白色強人》正在熱播,日前男主角郭晉安遇上車禍竟然可以安然無恙,結果有唔少人鬧爆有膠位。雖然車禍一幕被彈,但蔣志光飾演嘅醫生余湛琛就被大讚,皆因佢於劇中用流利英文對白、成功霸氣擊退外國人!

撰文:東方新地|圖片:電視截圖、新傳媒圖片庫

唔知大家有冇留意最近播出嘅《白色強人》,有集講到飾演醫生余湛琛嘅蔣志光醫治一位咳足成個星期但又冇上呼吸道感染徵狀嘅青年人,因而懷疑該名青年係因為有吸食性毒品嘅習慣,而引致病因。

該名青年嘅外籍爸爸一聽到蔣志光呢句,即刻三丈火起,並馬上以英文質疑醫生診斷。相反,作為一位專業醫生嘅蔣志光非常冷靜面對病人嘅爸爸。雖然病人指自己冇吸毒嘅習慣,但仍耐心叫對方講真話,以便成功醫治。

之後外國人爸爸更唔忿氣,再次走到蔣志光身旁,指要投訴佢。然而,蔣志光就以一段流利嘅英文對白,霸氣令對方唔再出聲,其中最後一句「 i ‘m doctor余湛琛,COS of A&E」,簡直型到核爆!

不過,唔講大家可能未必知,原來喺劇中講得一口流利英文嘅蔣志光並冇赴外國留學,反而只得小六學歷。小學畢業後,佢就跟隨父親學做裁縫,亦曾經做過打蠟及工廠工人等工作。

蔣志光曾透露自己之後有報讀夜校,因為希望進修英語能力,以便將來有機會去做自己喜歡嘅電影工作,最後更喺夜校完成中五課程,相當有毅力。其後,佢成功入行做電影幕後,更被發掘聲線似林子祥又識填詞,而成為歌手。

大家相當熟識嘅名曲《相逢何必曾相識》,就係蔣志光主唱!

之後,蔣志光又轉戰拍劇,曾於2014年萬千星輝頒獎典禮中憑《老表,你好hea!》「高音」一角,同時奪得「最佳男配角」及「專業演員大獎」兩個獎項。 雖然唔少人都覺得佢有喜劇潛質,但蔣志光反而表示自己唔想再做類似角色,唔知佢又點睇今次《白色強人》嘅醫生角色呢?

延伸閱讀:

《白色強人》向經典電影《癲佬正傳》致敬 方紹聰演精神病人直闖幼稚園

《切爾諾貝爾:傷心的兒童》(Chernobyl)成IMDb史上最高分劇集!主編Craig Mazin第二季將會…….

關注我們Facebook專頁
    相關新聞
      更多瀏覽