【白色強人】郭晉安撞車一幕膠味濃 TVB劇集主角再現金剛不死身!
2019年06月27日18:11

話說,TVB熱播新劇《白色強人》首周成績唔錯,收視高收27.7點!不過,喺最近嗰集中,講到YT(郭晉安飾)同衛生局局長張實秋(張本立飾)同坐嘅車輛發生嚴重交通意外。雖然局長因車禍而頭部重創,不過就有唔少網民不滿指有膠位!

撰文:東方新地|圖片:電視截圖、網上截圖

最近一集《白色強人》講到YT(郭晉安飾)同衛生局局長張實秋(張本立飾)同坐一架車,期間二人討論醫改時,就遇上大批反對醫改的示威者請願,更向二人嘅坐駕潑漆,引致車輛失控撞向人群,多名傷者送往明成北搶救!

由於車輛失控撞向人群,除令多人重傷外,張局長更因而頭部重創,情況危殆!不過心水清嘅觀眾就覺得好奇怪,皆因同坐同一架車兼坐喺局長身旁嘅郭晉安竟然一啲事都冇,YT醒後更非常清醒!

送往明成北搶救嘅局長更獲得毫髮無損嘅YT親自診治及立即安排手術室,親自為他施手術,真係非常離奇!唔通喺TVB劇集做主角嘅,都真係會有金剛不壞之身?

期後,唔少網民都留言指呢段劇情好假,鬧爆兼質疑點解郭晉安可以一啲傷都冇,情節堅離地喎!不過,亦有網民笑稱局長出事嘅原因可能係因為冇繫上安全帶。不過,事實上二人車禍前係有繫上安全帶嘅,所以呢個解釋應該唔成立。

另外,網民除咗對YT遇車禍後一啲傷都冇表示劇情好假之外,亦同時指危症室啟動災難應變後,馬國明、李佳芯等一眾醫生一字排開、慢鏡行出嚟呢幕好造作,有網友笑指「行快啲,人命嚟!」、「慢鏡一排過行係型嘅,緊急時仲行catwalk會死人喎」,唔知大家又點睇呢?

延伸閱讀:

《白色強人》向經典電影《癲佬正傳》致敬 方紹聰演精神病人直闖幼稚園

《切爾諾貝爾:傷心的兒童》(Chernobyl)成IMDb史上最高分劇集!主編Craig Mazin第二季將會…….

關注我們Facebook專頁
    相關新聞
      更多瀏覽