【大醬園】朱晨麗踢爆男藝人騙食劣行 何廣沛:佢成日搵人做水魚!
2019年06月27日18:44

無綫新劇《大醬園》拍攝當中,套劇演員朱晨麗、何廣沛、龔嘉欣、江嘉敏、吳業坤等,同唔少當紅藝人一樣,何廣沛、朱晨麗和龔嘉欣都好識做,見一班台前幕後咁辛苦,會買食物、宵夜「萬歲」慰勞大家,不過佢哋接受《娛樂新聞台》訪問時,大爆有男藝人騙食劣行,何廣沛更表示「佢成日搵人做水魚」,到底係邊個呢?!

撰文:東方新地 | 圖文:影片截圖、IG

《大醬園》朱晨麗踢爆男藝人騙食劣行

三人日前接受《娛樂新聞台》訪問時大爆劇中一位男演員經常用盡各種藉口令他們墜入萬歲騙局,呢位仁兄就係吳業坤(坤哥),何廣沛話:「坤哥通常會喺10點幾接近宵夜時就會問(大家)食唔食炸雞或者薄餅,我就話好呀好呀,諗住以為係佢萬歲,點知原來搵我夾錢。佢成日都搵人籌旗同揾人做水魚!(你要記抵搵佢找數…)慶功一個人埋單得㗎啦。」

朱晨麗爆對方借錢買嘢食

而朱晨麗又大爆坤哥借錢買嘢食氹佢:「有次外景我問佢可唔可以買啲魷魚絲畀我食,佢話得得得,之後終於都買咗一包仔。不過聽到康師傅(康華)話坤哥你啱啱問我借啲錢幾時還畀我?原來佢問康師傅借咗錢去買一包魷魚絲,之後當係送畀我食,如果康師傅唔講我以為佢咁好!」

話就話數坤哥劣行,其實佢哋私下都好好感情嘅,事關見佢哋IG都經常PO合照,又會喺放飯時一齊食飯,收工又一齊食餐好!

「莫欺少年窮」呢句話真係啱聽,當日吳業坤喺台慶扮棋畀網友笑,不過你有你笑,憑「宅男」形象彈出坤哥密密開工做到冇停手,演出、廣告代言等工作接踵而來,之前有傳佢由屋邨搬到大圍私樓,之後再秘密搬去貝沙灣四期一個市值千八萬細型單位,嗰度豪宅即使月租都要三、四萬,冇番咁上下收入都好難應付龐大開支,坤哥你係得嘅⋯

坤哥都好慳家,又識錢搵錢,佢喺2014年同「巨聲幫」嘅陳國峰合資開拉麵店,又喺尖沙咀開西裝店,實行自己做老闆。

延伸閱讀:

《切爾諾貝爾:傷心的兒童》(Chernobyl)成IMDb史上最高分劇集!主編Craig Mazin第二季將會…….

《白色強人》向經典電影《癲佬正傳》致敬 方紹聰演精神病人直闖幼稚園

關注我們Facebook專頁
    相關新聞
      更多瀏覽