【2019香港小姐】未入圍已經被人翻舊帳 網民清算KOL蔡嘉欣三宗罪 IG開店淘寶扮高級貨嚟賣
2019年06月25日13:28

尋日2019香港小姐選舉首輪面試掀起全城熱話,特別靚女嗰幾個自然會成為焦點。其中被封為「翻版朱智賢」嘅蔡嘉欣,未入圍就已經被網民翻舊帳,盤點佢三大罪行,唔知會唔會因此而影響到佢嘅港姐之路?

撰文:AuntieSam|圖片:連登、Instagram、YouTube|資料來源:連登

網民清算蔡嘉欣Kayan C三大罪

IG開黑店?

蔡嘉欣本身係一個頗有知名度嘅KOL,不論喺IG定YouTube都有超過10萬Followers。識得生財之道嘅佢早喺2012年就有開網店賣韓系時裝,仲自己著埋做生招牌。不過就有網民指控佢淘寶貨扮貴嘢,明明淘寶只要30蚊嘅貨仔就賣成300蚊,啲淘寶鞋仲要扮係自己整標到個價鬼咁高。

蔡嘉欣嘅IG店都有3.2萬fans
閒閒地一對鞋都要三百幾

除咗衫褲鞋襪,蔡嘉欣嘅IG店之前都有賣過眼鏡。網民就投訴佢「聲稱可以幫人陪(配)度數,但自己唔喺視光師,叫d客自己去專業視光師到配,好啦,配完出嚟又唔啱度數。重點喺咩?重點喺一幅眼鏡四五百蚊。最後比人發現喺淘寶嘅」

有人喺OUHK Secret同高登爆料話佢開黑店

尋日面試嘅時候,Kayan C都係一身淘寶貨咁出現。被傳媒問到係咪將淘寶嘢當高檔貨賣,佢回應只係以前賣過Made in China嘅貨仔,但係都係自己親自去廣州入貨。而尋日嘅一身衣著雖然都係淘寶,不過就要200幾蚊,之後仲係IG限時動態show證據。好有求證精神嘅巴絲上淘寶一搵,同款式嘅裙竟然59人仔就有交易。咁……一分錢一分貨,可能佢個件質地好啲呢?

Kayan C就指依家自己親自喺韓國揀貨,不過都補充唔可以肯定100%係韓國製,始終韓國有啲鞋都係判畀內地嘅廠造。雖然有網友指責佢開黑店,但都有人幫佢護航,話做生意係咁,仲話咁多年前嘅嘢就唔好拎出嚟講。

違例泊車扮可憐?

曾經就有人喺Facebook群組「馬路的事討論區」分享過,有俗稱P仔嘅新牌司機將車停正喺中環士丹利街,搞到條街大塞車,而網民就直指呢個人就係蔡嘉欣。

咁啱蔡嘉欣都係IG限時動態分享自己只係泊咗架車喺街3分鐘,打算去買個麵包,結果就好慘慘豬咁畀人抄咗牌。網民認為佢呢個行為極度自私,仲要唔肯認錯,Post Story搏同情太可恥。

棄舊愛同ibanker拍拖?

最後一宗罪就係「紅左之後拋棄舊愛去識ibanker」,不過就有網民立即幫佢澄清,話當年佢地一齊開網店兼同居,點知有一日男方突然講分手,搞到蔡嘉欣要喊住返娘家。後來睇IG留言,先知道原來係男方識咗第二個。

而佢呢個前男友原來係TVB藝人吳子沖Felix Ng,係青少年節目《Y Angle》嘅主持,喺《愛回家》都做過幾次閒角。見到Kayan C喺2016年都仲有兩個人一齊去韓國旅行,仲好sweet咁去花花cafe。直到同年10月,蔡嘉欣一個人出走新疆,而佢亦曾喺一段訪問中表示出走原因就係因為同男朋友分咗手,估計佢所講嘅就係Felix Ng。

吳子沖有份參與《降魔的2.0》拍攝
一齊去弘大花花cafe

據講蔡嘉欣依家呢個男朋友係ibanker,兩個人關係好似好sweet咁,不時見Kayan C喺IG放閃,大讚男友有planning,令佢可以安心做個「盲鐘鐘少女」。拍拖一周年嘅時候,兩個人仲一齊影咗婚紗相,似乎已經去到談婚論嫁嘅階段。

然而,有強勁摩擦力嗁巴打就發現佢同咗依家呢個男朋友一齊之後,就由用街邊貨變周身名牌。另外亦有網民爆話佢大洗,所以前男友(Felix Ng)嘅屋企人唔鍾意佢。更有人指出,佢曾經係社交平台講過男朋友咁有錢,去旅行畀佢畀錢係理所當然,令一眾網民都覺得佢港女格出晒嚟。

一齊咗幾個月左右,就見兩個人去咗新加坡旅行,之後喺YouTube仲話男朋友帶佢去美國

延伸閱讀:

《切爾諾貝爾:傷心的兒童》(Chernobyl)成IMDb史上最高分劇集!主編Craig Mazin第二季將會…….

《白色強人》向經典電影《癲佬正傳》致敬 方紹聰演精神病人直闖幼稚園

關注我們Facebook專頁
    相關新聞
      更多瀏覽