黃嘉樂入行18年 娶女朋友變動力|白色強人
2019年06月20日19:03

現年40歲的黃嘉樂,入行至今已經18年,近日在TVB熱播的電視劇《白色強人》中飾演郭晉安徒弟林學祈,更因自己前途而成為醫改下的棋子。現實中,黃嘉樂曾經歷零工作事業低潮,在圈中浮沉多年所面對的家庭壓力,幸得女朋友Samantha的支持,他更不介意女朋友曾經有過一段婚姻,並視對方為結婚對象!

撰文:Kammy|圖片來源:黃嘉樂InstagramYoutube截圖,新傳媒集團圖片庫

劇中被郭晉安利用

黃嘉樂在劇中飾演腦神經外科副顧問醫生林學祈,同時是郭晉安的徒弟。由於黃嘉樂在劇中的爸爸陳榮峻於醫學界地位舉足輕重,陳榮峻為讓兒子在事業上平步青雲,他向郭晉安暗示支持醫改方案,而郭晉安就為醫改方案不惜利用黃嘉樂,令他漸漸成為醫改下的棋子。

黃嘉樂
黃嘉樂
陳榮峻為讓兒子在事業上平步青雲,他向郭晉安暗示支持醫改方案
黃嘉樂
黃嘉樂
郭晉安就醫改方案不惜利用黃嘉樂
黃嘉樂
黃嘉樂
郭晉安以黃嘉樂的前途來換取陳榮峻的幫助

黃嘉樂曾考入海關 遭家人反對

入行18年,問到黃嘉樂經濟上有無捱過?屋企人有無支持佢、擔心佢?黃嘉樂回應:「好坦白講,我係出身於小康到唔小康嘅屋企,爹哋媽咪係無可能支持到我,只不過我自己比較鍾意投資,幫補到生活,但係就儲唔到錢,爹哋媽咪其實無咩大嘅壓力畀過我,尤其係我爸爸,我爸爸一路都好放任我,可能覺得我係大仔,做每一個決定都諗過度過,佢可能想反對我入呢行,但無講出口,因為佢之前反對過我做一份全世界都覺得好安全嘅工作、一份唔錯嘅工作,因為我畢業之後去咗考海關,考到,仲要嗰年係97年、好多人失業,但我爸爸發晒脾氣、反對得好緊要,我接受咗佢呢個意見。我本身讀電腦,都唔太擔心搵唔到工作,之後就入咗電訊業,一路做一路讀同電腦有關嘅嘢,諗住再銜接去英國讀大學,循呢個方向發展,從來同演藝無關,因為喺正式入行前,兼職做model段時間,我已經知道,如果全職做呢行,紅咪好、唔紅其實生活都無乜保障,不過好難講,好多嘢冥冥中有安排。」

黃嘉樂
黃嘉樂

爸爸離世時十分自責:「點解自己廢到咁?」

黃嘉樂又講到佢2015年拍完《張保仔》斷咗十字韌帶,停咗年幾冇嘢做:「簽大公司就有呢個好處,變咗我白攞人工休養,但無嘢做個人心情係唔好,我唔係十八、廿二,無咁多時間可以嘥,同埋我返嚟係想搏殺,會覺得好嘥自己時間。爸爸嗰時身體又再差咗,會覺得做咩咁黑仔,所有嘢堆埋一齊。」

黃嘉樂
黃嘉樂

黃嘉樂續說:「當時爸爸患病,我要做番一個大仔應該要做嘅嘢,嚴格嚟講,我覺得我以前有少少不負責任,依家要負番起責任。我偏向積極,覺得認認真真做,唔會有大問題。呢幾年我係笑多咗,有啲嘢都係會執著,但容易開心咗。以前預計到爸爸情況會一路差,因為癌症開支唔細,好想快啲搵多啲錢,點知最後都係靠我爸爸啲朋友幫我,我至解決到,爸爸走嘅時候,我成個人困住咗,不停自責,講得難聽啲,點解自己廢到咁?做咗咁耐都仲係咁!」

黃嘉樂
黃嘉樂

黃嘉樂坦言過往胞弟為他擔起不少家庭責任:「爸爸已經走咗(病逝),媽媽年紀都大,將近70歲,都要好好照顧佢,依家會對自己工作緊張好多。」

黃嘉樂
黃嘉樂

對感情專一

黃嘉樂曾表示:「我對愛情比較執著,我為咗追一個女仔,可以追到去英國,我係鍾意拍長拖嘅人。」對於現任女友Samantha,黃嘉樂就表示:「佢真係改變咗我好多!如果我能力範圍做得到,我都想呢兩年娶咗佢嘅,就算個女仔無要求,作為一個男仔都應該有能力養到佢先,但我自問暫時未有呢個能力,所以我依家好想紅㗎!我依家係有呢個動力。」

黃嘉樂
黃嘉樂

問女友有咩吸引到佢?黃嘉樂就甜爆:「佢同我性格幾似,佢係一個專一嘅人,佢比我更加樂觀,同埋佢可以補足到我性格上嘅缺陷,因為我係唔識釋放自己,你睇我斯斯文文,其實我係脾氣好剛烈嘅人,一有睇唔順眼,我裡面如果用溫度計係有一百度,但礙於做呢行,發一次脾氣,就有一個record,就會忍,但久而久之,心理會唔平衡,但原來換個睇法,個人會開懷好多,佢教識咗我呢樣嘢。」

提及早前林子善、鄭嘉穎結婚,黃嘉樂公開同女朋友一齊出席,佢直言:「我覺得需要囉!反正我唔覺得自己會換畫或者做其他嘢,我亦都真係有個想娶佢嘅心態,所以我唔介意呢樣嘢。我問佢帶埋佢出席好唔好,初頭佢以為我介意,我話:『無問題,仲好啦,全世界都知我哋拍拖,仲唔使煩咁多嘢,可以解決咗好多嘢。」

黃嘉樂
黃嘉樂
黃嘉樂認定女友Samantha,早前帶同女友大方出席朋友婚宴。

不介意女朋友曾結婚

黃嘉樂與Samantha至今已拍拖2年多,二人感情穩定,不時都對外指視女友為結婚對象。不過,早前黃嘉樂女朋友就被爆出,她早年曾在美國結婚。黃嘉樂曾公開表示,他不介意,因為每個人都有過去,不應該在意這件事,更指認為兩個人的事自己知道便已足夠。

黃嘉樂 跟得女友放閃不停

由「御用細佬」捱到今時今日足足經歷18年,黃嘉樂才總算捱出頭來,角色漸漸吃香又成功埋到金牌監製班做到梁材遠愛將,既然得來不易,上位中收埋正印低調處理感情是常識吧!不過男方低調、女友就唱反調,早前每日一po,連朋友都頂唔順形容Samantha為「長期閃光彈」。

黃嘉樂 江嘉敏 Samantha
黃嘉樂 江嘉敏 Samantha
本來聽晒男友話低調處理戀情,近月為防發電機江嘉敏,黃嘉樂攝影師女友Samantha亦開始在IG出招,每日一po放閃、每次都tag埋男友霸地盤。

黃嘉樂 江嘉敏 Samantha
黃嘉樂 江嘉敏 Samantha

黃嘉樂 江嘉敏 Samantha
黃嘉樂 江嘉敏 Samantha

宣示主權

黃嘉樂早前曾與江嘉敏傳緋聞,據知情人士透露,正印要宣示主權原來係為江嘉敏所逼:「嘉樂雖然話過想儲兩年錢先結婚,但係變數可以好大,兩年後身邊係邊個邊有得保證。Samantha同嘉樂年紀差唔多、唔想再浪費時間,同埋真係覺得男友好仔唔想錯過。」

黃嘉樂 江嘉敏 Samantha
黃嘉樂 江嘉敏 Samantha
黃嘉樂拍拖拍得低調,個人IG劇集女友出鏡多過正印女友,不過Samantha就日日update拍拖動態,買情侶鞋、過情人節、生日咀嘴都照po 。

不用外出工作時Samantha亦樂得跟實男友做跟班攝影師、出席所有男友朋友聚會,她曾與黃嘉樂孖住出席林子善婚宴。

黃嘉樂 江嘉敏 Samantha
黃嘉樂 江嘉敏 Samantha

知情人士續說:「本來Samantha對男友好有信心,都冇諗過要搞咁多嘢,不過江嘉敏咁進取惟有見招拆招,除咗返電視台,男朋友去到邊、見咩娛樂圈朋友Samantha都跟到實,次次仲要打埋卡晒恩愛,又成日旁敲側擊叫嘉樂快啲求婚畀啲表示,都係為咗全世界都知佢係嘉樂嫂、希望有人知難而退啫!」

黃嘉樂 江嘉敏 Samantha
黃嘉樂 江嘉敏 Samantha

三十多歲Samantha雖然唔夠江嘉敏嫩口,但身形健美又有主見,經常自晒bikini,身材不比電視台小花差。

黃嘉樂 江嘉敏 Samantha
黃嘉樂 江嘉敏 Samantha

與黃嘉樂年紀相若的 Samantha是資深婚禮攝影師,不時還親自上陣做model,氣場十足身材亦有睇頭。

黃嘉樂 江嘉敏 Samantha
黃嘉樂 江嘉敏 Samantha

黃嘉樂 江嘉敏 Samantha
黃嘉樂 江嘉敏 Samantha

有十年婚禮攝影經驗的Samantha在攝影圈薄有名氣,又因為同圈中人熟絡與黃嘉樂不乏話題,黃嘉樂老友張頴康曾帶埋老婆囡囡拍大肚照,亦是Samantha操刀!

黃嘉樂 江嘉敏 張頴康
黃嘉樂 江嘉敏 張頴康

黃嘉樂初入行 謠言滿天飛

黃嘉樂以前係喺電通訊公司做,因一次入TVB做嘢而被發掘:「不過第一次問我,我嘅性格唔係太social,覺得未必handle到娛樂圈嘅人事關係,所以考慮再考慮,到第二次再問我,我充滿好奇心,又貪慕虛榮啦,哈哈哈,就盲舂舂入咗行。」之後喺01年加入藝員訓練班:「入行有少少插科打諢,諗住入嚟見識吓,見識夠就走,但係我忽略咗自己原來好勝心藏在骨子裡,跟住唔忿氣,同埋可能個程序錯咗,讀訓練班嗰時,諗住做四、五年路人甲、乙,慢慢到做有角色嘅戲份,但我唔係,訓練班一出嚟其實機會多嘅,《無考不成冤家》(02年)做Liza姐(汪明荃)個仔,戲份都多,一嚟就有咁重戲份嘅角色,但謠言滿天飛,話我有啲咩關係,我當然係無關係啦,之後我做番啲行行企企嘅角色、一句對白都無,程序上錯咗,其實呢行係唔容易㗎嘛!」

黃嘉樂
黃嘉樂
初出道冇耐,黃嘉樂即在《無考不成冤家》演汪阿姐個仔,因此被謠傳有特別關係而受提攜。

由有角色變跑龍套,黃嘉樂說自己心理上平衡到:「因為個程序應該係咁㗎嘛,我只係行番啱嘅軌道,我以前讀書係讀理科,我係好鍾意一個個step去做嘅人,跳咗step我反而唔識點去做,我底子係唔夠。但我其實係呢幾年先醒覺,呢幾年先接受自己底子係唔夠,呢幾年開始有人覺得我係進步咗,角色嘅多變性亦多咗,唔再千篇一律做人細佬。同埋跑龍套都係好短時間,年零後,《青出於藍》開始,多番啲有戲份嘅角色。」

黃嘉樂
黃嘉樂
04年約26歲在《青出於藍》演中四學生,開始多番啲戲份,當時老師有郭可盈、陶大宇,同學仔則有周永恒、趙頌茹和鄭俊弘等,劇中仲同阿Yu做一對。

黃嘉樂
黃嘉樂

有諗過轉行

問佢咁靚仔,點解無去做啲形象上或者時裝方面嘅嘢?黃嘉樂就話:「喺呢行嚟講,初段嘅時候,我諗我叫無野心,因為我係人馬座,開心就得㗎嘞,開頭我都仲覺得好開心,有好多嘢無去睇得好深入,同埋唔係我主動要入呢行,變咗個心態上唔一樣,人哋可能喺呢行要有咩目標,但我係OK吖、生活到喎,其實係嘥緊時間,我入行前都有人覺得我上鏡,搵我影硬照、拍TVC,入行後反而少咗,如果好似你講,我識得雙線發展,可能會行得順啲。」

問到佢入行都唔短時間,中途有無諗過放棄?黃嘉樂直言:「中間有段時間、30歲嗰時,有諗過不如轉行,做番自己老本行,穩陣吖嘛!因為當時身邊嘅舊同學有啲做到高級或者已經做緊老闆,佢哋都有叫我入番行,我都掙扎過,因為有段時間覺得自己點解仲係做緊『細佬』角色,但無去檢討自己點解仲係做『細佬』角色,而係埋怨,後尾當然無離開,因為老土啲,都係唔忿氣,死唔斷氣,死係想做到自己想做嘅嘢,同埋做咗咁耐,慣咗呢個生活模式,都會諗打正常工、會唔會唔慣呢?同埋嗰時我親細佬事業都開始穩定,佢又係做電腦相關嘅工作,屋企開始冇畀咩壓力。」

《點金勝手》演陳敏之細佬。

拍《守業者》解財困

黃嘉樂又透露自己一路喺TVB,直至到07年、30歲時:「嗰年原先好順,又keep住有嘢拍、又第一次拍電影,拍葉念琛導演嘅《我的最愛》,跟住之後嗰年,唔知點解成年都唔夠嘢做,但電視仲播緊我有份參與嘅作品,嗰年突然覺得,咁樣唔係辦法喎,咁樣落去就完結㗎喎!大約年零後,有人問我有無興趣簽其他經理人公司,話會有大陸劇拍,因為開始覺得生活唔夠保障,同埋爸爸開始身體唔好,都想搵多啲錢傍身,就出去試吓啦!出咗去有少少事與願違,好辛苦至拍到啲大陸劇,諗住終於都雨過天青,點知當時經理人公司過分去追求酬勞,但其實我未係企穩咗㗎嘛,好不容易開咗個頭,開始有少少泉水湧出嚟,就要抽走晒佢,咁死啦,最徬徨嗰時,材叔(無綫監製梁材遠)問我有無興趣拍《守業者》,啱啱好銜接到,解決到我經濟上嘅困難。」

黃嘉樂
黃嘉樂
黃嘉樂指自己陷入經濟困境時,獲監製梁材遠(前排左二)賞識,搵佢拍《守業者》,啱啱好幫佢走出困境。

講到08年所拍嘅電影《我的最愛》有過千萬票房,黃嘉樂表示:「以本土愛情片嚟講,係好犀利!其實嗰時係可以食住個勢繼續拍電影,但我嗰時無經理人,我唔係咁識social,我有得拍《我的最愛》都係因為導演見我之前拍側田MV表現好,畀機會我。」而講到去國內拍劇,黃嘉樂就笑言:「我個人比較衰,嗰時知道戲份多,真係出盡九牛二虎之力,後尾返TVB拍《巨輪》,我覺得係有啲唔同咗嘅,但就未去到成個人成熟晒。」

黃嘉樂
黃嘉樂
08年黃嘉樂在電影《我的最愛》演劈腿賤男。

主動要求留鬚

而對於《果欄中的江湖大嫂》入面嘅過氣江湖大佬角色,黃嘉樂直言的確幫到佢好多:「心理上都畀番好多信心,我淨係諗盡力做好佢,都無諗過效果會點。我都係咁做,唯一自主個造型,同埋演繹方法,因為開頭有人同我講我唔夠粗魯、唔夠似江湖大佬,但我睇晒劇本,劇入面我要同江嘉敏拍拖,如果真係好粗魯,好似泊埋唔太match,同埋我角色已經咁好打,都唔需要特登做一啲好粗魯嘅形態吖,同埋我同監製講我一定要留鬚,因為李天翔做我手下,但泊埋去,其實我似佢條手下多啲,出到嚟大家都覺得個造型有驚喜。」

黃嘉樂擁有青靚白淨嘅逆齡外貌,豈料成事業羈絆,更因多次被派演細佬角色,而被封「御用細佬」。

黃嘉樂話無預計會憑《果欄》爆出:「戲份唔算多,得六、七集戲,但睇住自己Instagram人數係咁加、新聞又每日有講,呢套劇亦為我帶嚟最多訪問。」

黃嘉樂
黃嘉樂

曾於電影《我的最愛》中演賤男,令黃嘉樂在影圈曇花一現:「角色係賤男,但唔知點解好多女仔鍾意,呢幾年間中有新人同事話:『我細細個就睇你做戲,我好鍾意你喺《我的最愛》阿俊個角色。』」

黃嘉樂
黃嘉樂

12年黃嘉樂擔任國內劇《媽祖》第一男主角, 跟主演「媽祖」的國內著名演員劉濤有不少對手戲。

黃嘉樂
黃嘉樂

最後講到對未來嘅展望,黃嘉樂直言:「返得TVB,梗係想做到主角位,所以繼續努力!」

延伸閱讀:

【兒童眼瘡】過來人分享 洋甘菊眼瘡療法

【桃膠食譜】平民燕窩養顏抗衰老 女士養生3款桃膠糖水

關注我們Facebook專頁
    相關新聞
      更多瀏覽