【專訪】林嘉欣與兩女兒為酒店設計曲奇 培養惜食觀念:身教好重要
2019年05月10日11:02

如看不到 請到Youku

林嘉欣與兩個囡囡近日和半島精品店合作,推出“Dip in Love”限量版愛心手工朱古力曲奇聯乘禮盒。為了這次聯乘,嘉欣特意和女兒共同創作,以小朋友的角度描繪出父母的各種獨特形象。

與囡囡一同學習

林嘉欣(Karena)與兩個囡囡一起創造時,問到她們心目中的爸爸媽媽是怎樣,怎料畫出來的爸爸全部都是睡覺中:「我覺得好得意,原來小朋友眼中覺得爸爸成日都喺度瞓覺。」至於媽媽的形象,兩個囡囡畫出來的形象十分百變:「原來她們眼中爸爸媽媽好似一個國際村咁。」Karena直言能夠與女兒一同創造今次的設計十分開心,除了因為過程開心外,更因為有部分收益會捐贈予香港食物回收及援助慈善機構「惜食堂」回饋社會。Karena表示有向女兒介紹「惜食堂」:「同佢哋講嘅期間,其實我都學習緊,因為當佢哋問我問題,我亦要上網去搵答案。變咗我哋三個一同學習,所以係對我來講好有意義嘅事情!」

身教好重要

談到香港大多數小朋友都生長在物質豐盛的環境,Karena亦有教導女兒不要浪費食物,因此她自己亦好怕浪費:「我哋屋企有個規矩,就係如果晚飯未食完就冇得食甜品,而且隔日我哋係會翻蒸畀佢哋食。」Karena又透露家中小朋友是自己添飯及夾餸,希望培養她們不要眼闊肚窄,而且Karena亦認為身教好重要,你講到自己亦都要做到。

希望小朋友能獨立思考

Karena兩個女兒對藝術充滿興趣,她表示自己沒有為她們定立一個特定的方向:「我唔會一定要佢哋點點點,但係我當然會有個氛圍畀佢哋,好似我自己鍾意做陶瓷,我就會帶埋佢哋去,佢哋唔玩唔緊要,但係大多數都會玩!」Karena對於「怪獸家長」、「直昇機家長」等的心態亦表示理解和明白:「因為當你細個嘅時候,你冇嘅時候,你會希望你下一代,你嘅小朋友樣樣都好豐富。無論係上各式各樣的興趣班,或補習諸如此類。」不過Karena就擔心小朋友會因為被安排及沒有自主能力,而最後會出現反彈:「當佢能夠自主時,佢就會擦走晒以前教落嘅嘢。還是佢會好反叛,覺得唔係佢選擇。我覺得呢樣會係比較可惜,因為大家都係為對方好。」因此,Karena希望小朋友可以自己獨立思考,可以告訴父母自己鍾意的是什麼,從而讓她在小朋友喜歡的事物上提供好的環境給她們。

關注我們Facebook專頁
    相關新聞
      更多瀏覽