鄧佩儀主動約會送禮物搞曖昧 被指進擊人夫周柏豪
2019年05月06日14:58

「安心偷食」令許志安、黃心穎形象插水,當中黃心穎仲避走美國及遭無綫無限期雪藏,前車可鑑,作為藝人該引以為戒!不過今日有報道指近日憑劇集《鐵探》人氣急升的無綫上位小花鄧佩儀(Gloria),對曾經在無綫劇《再創世紀》中合作過的好拍檔人夫周柏豪冧爆又好主動,唔止頻頻主動約會,更加在IG寫曖昧留言,網民不禁話:「大文豪有老婆㗎喎!」指Gloria無視人哋有老婆唔避忌,怕佢係「黃心穎翻版」!

撰文:東方新地 圖片 :新傳媒圖片、Instagram

延伸閱讀:

【安心偷食】吳岱融望《牛下女高音》重見天日 大爆King Sir唔舒服頂硬上拍劇

黃翠如大爆秘婚過程及生B計劃 過檔TVB原來同一個人有關!

鄧佩儀《再創世紀》暗戀周柏豪

鄧佩儀同周柏豪喺2017年合作無綫劇《再創世紀》結片緣,Gloria在劇中飾演「朱小慧」,周柏豪就飾演「程凱」,「朱小慧」在劇中暗戀對象「程凱」。其實拍劇期間,雖然佢同袁偉豪都好多對手戲,但Gloria戲內戲外卻淨只冧柏豪一人,經常貼二人嘅劇照及花絮照!

程凱在劇中仲錫咗小慧一啖!

小慧戲中暗戀程凱,銀包都偷放二人合照,Gloria連呢個都喺IG分享,仲大曬二人即影即有相片!

劇集出街後,Gloria也念念不忘二人醉酒戲,指拍得相當唯美!

狂偷拍 勁集郵

Gloria在戲內外都對柏豪超冧超主動,唔止經常捉住對方合照,仲成日偷拍人夫,就連睇Playback都要影埋個mon﹐而且唔止一次,係好多次!搞到柏豪睇到啲相都忍唔住留言問:「究竟你收藏了多少張合照?」

偷拍及大量合照都未算誇,Gloria分享佢喺劇中偷望柏豪嘅相,寫道:「盼望著 有天你會看到我 期待著有天你會需要我 希望著每天留在你身邊 小慧上。」種種加埋又難免令人認為佢太入戲喎!

約慶生 派心心

而據報道指Gloria拍完《再》劇後仍然好入戲,經常不避嫌與人夫周柏豪聯絡,相約對方食飯及送小禮物等等,表現殷勤。而在去年11月,由於二人生日日期相近,佢哋約埋同劇演員袁偉豪與女友張寶兒食飯順道慶生,而Gloria表示有男神陪佢慶生超開心,仲送上心心emoji一個。

二人之後應邀為主題公園拍廣告,Gloria分享合照之餘仲寫:「雖然成日畀佢恰,其實同佢拍嘢、合作係好開心。」又加上一男一女心連心圖案,而柏豪也回覆:「好開心又怎叫做『恰』?」!

但報道指爆料者表示有人勸Gloria避免太高調,所以近排她未有上載二人合照。對於被指向人夫周柏豪主動出擊,Gloria接受傳媒表示視袁偉豪及柏豪都係大哥哥、前輩,聖誕、生日大節日大家都會約食飯,仲話唔擔心惹誤會!

周柏豪 對妻發表愛的宣言

型男周柏豪喺2016年迎娶拍拖十年的圈外女友Stephanie Chu,在泰國布吉的五星級酒店Aleenta Phuket Resort & Spa舉行婚禮,事前沒有走漏半點口風,非常神秘,柏豪就透過經理人公司宣佈婚訊及公開婚照 ,柏豪表示:「我一直想好好保護我的家人,不被我的世界而影響,但事情還是要被曝光,這已經是事實,也算是預料之內的。幸好當天我們不受突發狀況影響,儀式也繼續進行,雖然儀式簡單,但我們有着最美好的天氣和祝福。現在大家仍然陶醉在當天,充滿着愛和溫暖的一天,感謝我的家人支持和體諒,也感謝傳媒的關心。對,她是周太,是最好的,我會繼續好好的保護她,也感謝愛我的人也同樣愛護她。我們也在這裏祝大家幸福美滿,生活愉快。」

二人貫徹低調作風,發放的婚照是見影不見樣。

周柏豪在2017年個唱上罕有大談同太太戀情經歷,坦言對太太是一見鍾情,又說:「我跟她未入行已認識,一齊成長十多年,她將她最黃金的青春奉獻給我這個不敢寫包單的人。」柏豪最感激太太在他早年患上驚恐症期間的照顧:「當時我沒有工作、沒有收入,甚至要她在經濟上幫忙我。去年結婚時,朋友得悉有狗仔隊偷拍,她第一時間問我婚禮需不需要hold住先,我覺得她真得很偉大,可以為我做任何事,多謝你!我終於可以公開在這個的鑽石(紅館)上,唱這首歌畀你聽。」

延伸閱讀:

盤點5位娛圈賢妻典範 網民:愛情童話點止得一個!

關注我們Facebook專頁
    相關新聞
      更多瀏覽