貼地生活模範!劉青雲夫婦帶大家落九龍城食好西
2019年03月24日19:47

圈中模範夫妻劉青雲與郭藹明,92年因拍劇集《大時代》情牽一線,今年已是二人結婚21年,夫妻經歷過唔少大時代變遷,卻感情不老依舊甜蜜如昔,全因二人性格同價值觀夾到痺,夫妻同樣低調貼地。日前,青雲夫婦就分頭出動去九龍城買好嘢食,青雲專登去買馳名的酥皮蛋撻回家冧老婆,幸福人妻郭藹明就去九龍城街市買牛肉整愛心餐餵老公,Sweet爆帶大家貼地食好西同時,仲教識大家咩叫簡單幸福!

撰文:東方新地 │ 圖片:新傳媒圖片

延伸閱讀:

江嘉敏公開投訴男友未夠浪漫 「送粒鑽石好過!」

50歲李婉華生完3個都咁fit 勁減70kg全靠…

劉青雲夫婦 帶你食好西

除咗演技出眾,劉青雲性格隨和默默耕耘唔造作,更令他贏盡觀眾歡心,即使戲接戲收入豐厚,早已是隱形富豪,但這位猛料影帝,仍追求簡樸生活,同低調樸素的老婆郭藹明同樣貼地。美國南加州大學機械工程碩士畢業的郭藹明,甘為老公放棄做航天工程師,婚後做全職劉太的她,最大滿足就係持家照顧老公,不單理財有道幫老公滾大身家,更負責打理屋企日常,只要青雲在港,例必親自下廚煮飯,細心又能幹!據知情者透露:「青雲有先天性高血壓, Amy(郭藹明)好緊張老公嘅飲食,成日會研究啲有益餐單,等老公可以食得健康啲,只要青雲唔使開工,佢就會親自下廚煮飯煲湯,整一餐好味嘅住家飯畀老公食,咁就覺得好滿足!」

恩愛21年

恩愛如初戀,兩口子一有時間就拖手散步逛街,仲會諗盡方法互氹對方,去年本刊就拍到郭藹明煙韌箍實老公落電梯,甜蜜到爆!

雖然外表睇落有啲 cool ,不過青雲卻好識冧妻,除咗公開講「太空船」愛的宣言,平日亦最愛同老婆拖手散步。

日前,郭藹明由司機接載到九龍城買餸,萬能老婆更加係識途老馬,一支箭行上街市二樓,一間出名賣優質牛的檔口買牛肉,相信是為牛癡老公青雲下廚炮製愛心餐,買完牛肉,她又行過隔籬檔口買豬肉煲湯,早前內地豬出現問題, Amy買豬亦專登揀本地豬肉,絕對係精明好老婆。

落區買餸

持家有道的郭藹明,買餸煮飯冧老公早已係生活日常,日前她一個人去到九龍城街市買餸,51歲的她打扮樸素,素顏依然索爆!

只買本地豬

Amy在主打賣本地豬的檔口買豬肉煲湯,保證老公食得健康。

揀靚牛下廚

明顯是九龍城街市熟客,郭藹明極速行上街市二樓幫襯馳名的新鮮牛肉檔,年輕檔主一見劉太已經好好招呼!

愛搵平民嘢食

老婆入得廚房出得廳堂,劉青雲對食亦有心得,不過,並唔係要大魚大肉先開心,反而係鍾意搵地道好嘢食。據知情者謂:「青雲同Amy兩公婆都唔注重物質,食嘢更加隨意,不過就好鍾意捐窿捐隙去搵好嘢食,就算佢哋咁出名,都唔介意食茶記同大牌檔,唔少人喺大坑撞過佢哋食十幾蚊一碗粥,又會喺深水埗食腸粉,去沙角邨大牌檔撐枱腳,食嘢好平民,因為佢哋兩個都咁純樸,咪咁夾囉!」

能夠婚姻保鮮21年,當然唔係一朝一夕,好似近日忙完電影工作,較為得閒的青雲,日前亦專登到九龍城買酥皮蛋撻慰妻,肯定令老婆未食已經甜入心。

買撻慰妻

同老婆一樣係九龍城地膽,劉青雲日前專登去九龍城侯王道,買馳名酥皮蛋撻,相信是買回家同老婆一齊分享。

火速歸家

買完蛋撻,青雲急急上車趕返屋企。

親民影帝

本來入咗759揀飲品,不過格價專家最後都冇買到嘢,行出舖頭時發現記者,親民的青雲離遠同記者揮手打招呼。

電影大收

同張家輝林嘉欣合演的《廉政風雲 煙幕》大收,有指電影將拍續集,睇嚟主角劉青雲真係有排忙。

轉行賣撻

80年代同鄭敬基合唱〈酒杯敲鋼琴〉爆紅一時的黃寶欣,隱世二十年後,17年變身老闆娘在九龍城開舖「酥妃皇

后」,賣酥皮蛋撻。店舖主打全人手製造,製法源自老餅店大同的退休師傅,號稱有368層的港式酥皮盞,要師傅半夜三四點開工,壓製9小時,才製作成千二個酥皮蛋撻。開舖初期,黃寶欣不時落舖監工做「生招牌」,吸引唔少人慕名幫襯!

劉青雲 郭藹明 恩愛24年

結婚20年,劉青雲和郭藹明這對今年步入「瓷婚」的圈中模範夫妻,至今行街仍會甜蜜拖手,恩愛羨煞旁人,能夠令婚姻保鮮,劉青雲坦言全靠老婆郭藹明功勞,他大讚老婆說:「太太係我人生最好嘅禮物,佢好聰明,我鍾意咩、唔鍾意咩,唔使講佢都一清二楚!」

劉青雲
劉青雲

人生最大膽一次

事實上,當年鼓起勇氣追求現任劉太,劉青雲曾表示這是他人生最大膽一次。據知情者透露:「青雲同Amy 拍《大時代》嗰時仲未拍拖,佢兩個喺埋一齊都係多得周慧敏撮合,94年Vivian開演唱會,因為知道青雲對Amy有意思,就邀請佢兩個一齊去睇演唱會,幫青雲製造機會,不過之後青雲再約會Amy,都要鼓起好大勇氣,始終當時Amy有學識又靚,而青雲事業先啱啱起步,冇車冇樓,第一次約 Amy去街,青雲仲硬住頭皮叫Amy揸車去接佢,然後一齊食飯,所以到依家佢都成日提起,好感激老婆當時冇嫌棄佢!」

劉青雲
劉青雲

復出要問准老公

眾所周知,郭藹明是美國南加州大學機械工程學雙碩士,當年Amy為青雲放棄工程師工作。想不到人妻婚後至今,仍然為陪老公放棄復出;三年前《大時代》翻播,一眾演員被炒熱,當時就有唔少人邀請Amy復出。Amy友人透露:「嗰時同無綫都出嚟傾咗幾次,不過除咗睇角色, Amy最著重係時間,講明一定要就咗老公檔期先,最後都因為怕困身陪唔到老公,所以傾唔成!」事事老公行先又識得撒嬌,相信就是郭藹明維繫甜蜜婚姻最佳秘技!

劉青雲
劉青雲

激罕當街摟錫

劉氏夫婦出名恩愛,兩人曾被本刊捕獲拍拖到九龍灣MegaBox睇戲,散場離開搭扶手電梯時,郭藹明激罕公開施冧功,兩手從頸環抱老公撒嬌摟錫,甜蜜儼如新婚,睇青雲望住老婆嘅眼神,就知佢完全被老婆降伏!

劉青雲
劉青雲
一齊24年,拍拖行街睇戲好平常,但唔平常嘅係,本來已經係老夫老妻,竟然睇落似足初戀男女咁恩愛,劉太對住老公,非常小鳥依人,身體語言已經表達晒,真係唔使講咁多!

劉青雲
劉青雲

拍拖行超市

兩公婆由司機接載返回西貢,先到市中心超市上糧,入到超市,郭藹明極速去攞手推車掃貨,青雲就跟在後面,唔會乜都等老公服侍,Amy這個超級好老婆真係邊度搵!超市上完糧,兩人坐車返回西貢西沙小築寓所,已經是傍晚六時多,相信Amy又會親自下廚炮製美食,同老公留家撐枱腳。

劉青雲
劉青雲

拒翹埋手等服侍

郭藹明這位碩士港姐老婆,除咗高學歷有內涵,更加是個賢內助,溫柔又善解人意,賢淑能幹兼備。據Amy好友透露:「Amy份人好溫柔隨和,同老公結婚咁多年﹐相處仲係相敬如賓,同老公講嘢仲會講唔該、麻煩晒,青雲受老婆感染,都會同太太講多謝、唔該,相處會互相尊重,而且Amy對住老公仲好識撒嬌,保持住拍拖嗰份新鮮感!做咗少奶奶咁多年,老公又搵到,但Amy都唔會翹埋手等人服侍,佢知老公喺出面工作辛苦,唔想青雲仲要為屋企事費心,自己會將屋企啲嘢搞得妥妥當當,執屋煮飯完全唔使老公操勞,好似屋企要換燈膽,或者簡單嘅髹牆,Amy都會自己落手搞掂,雖然有啲事可以用錢請人做,不過Amy唔想亂花老公啲辛苦錢,會應使得使,平日生活都好平民化!」

劉青雲
劉青雲

劉青雲
劉青雲

兩年幾打造4千萬堡壘

持家有道的Amy,一直手握青雲財政大權,十多年來負責幫老公投資,先後買賣超過十個物業,除咗買樓,亦有買舖及商廈,幾乎每次都賺錢離場,成功幫老公滾大副身家。劉氏夫婦鍾情西貢區,之前租住西貢龍嶺獨立屋多年,14年底以3,280萬買入現居的西貢西沙小築獨立屋,現市值近4千萬,由於該屋苑樓齡已經三十多年,青雲夫婦要將新居全面翻新,裝修工程搞足兩年幾先完成;雖然間屋面對無敵西貢海,但二人卻放棄裝落地玻璃,更封閉唔少窗位,貫徹其低調作風。

劉青雲
劉青雲

據知情者透露:「佢兩個都鍾意住郊區,特別鍾情西貢 區,不過西沙小築好少有放盤,嗰次佢兩公婆一齊去睇樓,Amy 一睇已經好鍾意嗰度嘅無敵海景,就即刻扑槌買,但因為嗰度樓齡已經有三十幾年,間屋要大翻新,Amy仲搵咗設計師同風水師幫手,喺高人教路下,刻意喺大廳唔裝落地玻璃,裝修搞咗兩年幾先完成!」

劉青雲
劉青雲

劉青雲
劉青雲
新居有無敵海景,落沙灘只需十分鐘,兩公婆隨時想行沙灘浪漫吓都好容易,而平日鍾意跑步做瑜伽的Amy,對住個海做運動,相信亦特別心曠神怡。

為打造安樂窩 單拖去旺角揀建材

影帝背後女人一啲都唔簡單,知道老公在外拍戲相當忙,郭藹明就一個人為西沙小築新居搞裝修,兩年多來,經常一個人落上海街,親自買裝修物料,過去曾被本刊拍得打扮樸素去睇裝修材料,當日Amy無論揀地磚、櫥櫃、浴室材料甚至門柄都非常細心,再落手落腳度尺,完全係完美妻子典範。

劉青雲
劉青雲

劉青雲
劉青雲

劉青雲 五大冧妻語錄

平時不苟言笑的青雲,15年憑《竊聽風雲3》奪金像影帝,公開發表 「太空船論」多謝老婆,少有公開講「愛的宣言」的他,唔止台下老婆被感動到眼濕濕,仲冧盡全港雌性動物。

最經典:冧上太空

2015年劉青雲憑《竊聽風雲3》贏得第34屆香港電影金像獎頒獎禮「最佳男主角」,這是他第二次擠身金像獎影帝寶座。劉青雲在台上強忍淚水,感謝太太郭藹明,他說:「我要多謝我太太,每次當我揸住隻太空船,飛到去宇宙唔知邊一度嘅時候,你總係有辦法,令我好安全咁返嚟地球,多謝!」郭藹明聽到劉青雲的話,感動得用手指抹眼淚。

劉青雲
劉青雲
青雲15年再奪金像影帝:「我要多謝我太太,每次當我揸住隻太空船,飛到去宇宙唔知邊一度嘅時候,你總係有辦法,令我好安全咁返嚟地球,多謝!」

公司名以老婆而命名

劉青雲所開製作公司名為「小飛船」,問佢係咪為咗老婆而命名,佢冇否認,只係直言個名順口好聽,冇大家諗得咁複雜喎!

劉青雲所
劉青雲所

最冇符:逢嘈必輸

論到夫妻相處之道,青雲自認次次鬧交都認輸:「一來我英文唔夠佢好,二來佢根本唔怕我!冇辦法,遇上佢,我只能夠投降。」

劉青雲
劉青雲
夫婦二人曾合拍的EPS廣告,演恩愛夫妻完全真情流露,唔少觀眾畀二人感動,大讚兩人互動夠甜蜜,劉太郭藹明更凍齡一樣,身材樣貌仍然省鏡!

最有共識 唔諗生仔

結婚20年,好多人都問過青雲夫婦點解唔生B?他說:「我哋根本唔打算要小朋友,好珍惜二人世界,陪老婆行街市,享有一般人嘅生活。有老婆陪喺身邊,係我最開心、最好嘅減壓方法。」

劉青雲
劉青雲

最謙虛:老婆叻晒

郭藹明係美國南加州大學機械工程學碩士:「佢學歷高,對我嚟講係件好事,我可以向佢學英文、學騎馬、學普通話,佢仲會修理電視機㖭!」

劉青雲
劉青雲

最安心:坦白至上

能令青雲感到安心的是家和太太,佢話郭藹明既是妻子,也是他最好朋友:「我哋早就講好,彼此有咩事都講出嚟,唔希望對方喺外人口中知道,呢個係我哋彼此信任嘅態度。」

劉青雲
劉青雲

延伸閱讀:

細數10位與視帝視后無緣藝員 林峯提名xx次都慘食白果!

關注我們Facebook專頁
    相關新聞
      更多瀏覽