嘉玲爆偉仔仲放緊假:離晒大譜!
2019年03月01日03:00

【星島日報報道】劉嘉玲昨日貴氣亮相BVLGARI珠寶展,談到早前跟老公梁朝偉去日本拍拖滑雪,她爆老公這位旗下藝人仍在放長假未返來,不禁笑言「離晒大譜」,但明白他想休息尋找突破點,承認有很多劇本邀約。

劉嘉玲昨日出席BVLGARI珠寶展覽,手上戴巨型紅寶石戒指,穿透視馬甲襯黑外套,相當搶眼。嘉玲姐笑言年中也會買珠寶獎勵自己,隨年齡增長而經濟許可,坦承女生見到珠寶就鍾意,她說:「每個階段不同,初時鍾意白鑽,依家鍾意紅寶石,亦好難搵到。」談到老公梁朝偉可會懂得欣賞珠寶?她說:「佢識得欣賞我就得,我就係最值得的珠寶。佢都會驚喜送珠寶畀我,但我習慣自己喜歡乜都可以買,好理所當然。」

提到她在上海擁有的豪宅,嘉玲表示媽媽居住,香港「花樣年華」豪宅用作宴客,其他地方沒投資物業。她說:「唔好講到我係地主!香港呢啲物業我識賺錢買,海外有諗過投資,但力不到不為財,仲要維修,自己住不到好浪費,又不捨得租出去。買珠寶就可以攞走隨時戴在身上。」

她又表示之前同老公去日本滑雪,自己再去澳洲,老公仍未返來,指他現時玩滑浪、越野單車,更笑謂他在當地不用戴口罩,就快會有人認識。問到偉仔是否想做業餘運動員?嘉玲認為有健康嗜好就好。當笑她讓旗下藝人放長假期,她即說:「離晒大譜!靠佢咁慘!佢鍾意就得,佢搵緊突破點,好多人搵佢,好多劇本。(為老公篩選劇本?)我無資格篩選,只係pass畀佢,好明白要唞吓搵新方向,佢咁好演員有90幾分,再突破自己好難,希望佢搵到一個新高峰。」

提到財政預算案向電影發展基金注資十億,擴大首部劇情計畫規模及資助額增加,同時提高電影融資計畫製作上限,她說:「好消息,係強心針。香港不應放棄,咁好先天條件,咁多專業人才,之前香港帶領亞洲電影唔可以俾人過頭,不要放棄,政府一早要咁做。」談到政府會注資2000萬元復修孤本、菲林電影,她直言應建博物館,認為大家有責任推動香港電影。

關注我們Facebook專頁
    相關新聞
      更多瀏覽