張家輝呻宣傳攰過開戲
2019年01月31日03:00
劉青雲、林嘉欣、張家輝近日為賀歲片《廉政風雲 煙幕》四出宣傳,忙個不停。

【星島日報報道】劉青雲、張家輝和林嘉欣昨日現身維園年宵市場、宣傳英皇賀歲片《廉政風雲 煙幕》。家輝明日出發往蘇州繼續宣傳,笑言跑二、三十組辛苦過開部戲拍十組八組,他會帶太太及女兒入場睇。青雲則笑言入場睇非為視察反應,而為陪太太郭藹明。嘉欣以前常拍喊戲,不敢帶囡囡入場睇,今次終可母女齊捧場。

劉青雲本身有行年宵,通常下午時間靜悄悄行,但無去過維園年宵市場,兒時也會跟爸爸行年宵,都會買吹氣膠公仔同玩具,爸爸則會買花,他說:「之前屋企都會擺放桃花,但呢幾年無擺。(桃花太旺?)擺唔落。」家輝則謂年輕時去行年宵,因為喜歡有新年氣氛,不過好少購物,大多會吃魚蛋同豬皮感覺好似過節,但未去過維園年宵,本身居於九龍區。林嘉欣坦言以前住銅鑼灣,但有十幾年未行過年宵,亦沒帶女兒去。

馬不停蹄為該片宣傳的張家輝透露明日出發蘇州宣傳,更認為辛苦過開部戲,他說:「好多時一部戲10組8組,但宣傳則20、30組。」談到該片題材嚴肅,問到可有信心撼贏其他賀歲片對手?家輝說:「咁先正!有個性又有內涵,新年不一定搞笑,可以睇部正正經經嘅戲,都是一個好選擇,不一定新年紅噹噹搞笑。」談到可會入場欣賞其他賀歲片?家輝表示有時間都會睇,哪部電影有門票就去睇那部。

對於可會為該片而喬裝入場視察觀眾反應?家輝表示會跟太太關詠荷及女兒入場睇;青雲笑言入場睇並非為視察反應,反而是為了陪伴太太郭藹明;嘉欣則坦言今年終於可帶同女兒入場睇,因以往拍喊戲,擔心女兒入場睇會大叫媽咪會心痛,有份聲演的卡通片就有帶過女兒入場欣賞。

提到對該片票房成績可有信心?家輝說:「自己部戲大家做得咁辛苦,唔通未出來見人就話自己輸咩!況且新年睇戲人次咁多,大家都好啦!」嘉欣認為作為電影一分子,希望每部電影都有好成績,票房好才會陸續有好電影。青雲亦直言有信心,獨樂不如眾樂,大家有好成績就開心。

關注我們Facebook專頁
    相關新聞
      更多瀏覽