【搬入愛巢】秘婚半年鄉郊簽紙 蕭正楠廉娶黃翠如
2018年12月27日11:45

剛過去的台慶頒獎禮,蕭正楠一句:「多謝我太太黃翠如!」自我引爆公開婚訊,被指騎劫頒獎禮,蕭生蕭太風頭蓋過視帝視后。沒有華麗的婚禮,沒有親友同行見證,二人在新西蘭鄉郊簽紙結婚,用餐具捲成的婚戒是在當地農夫市集臨時買,認真平靚正。

難得百億身家岳父唔介意,更拒收禮金把女兒的幸福交託蕭正楠,比起早前高調出嫁的陳凱琳與單文柔,黃翠如顯得與別不同。娶到個非一般港女老婆,蕭正楠幾生修到,荷包仲慳唔少,今次在台慶頒獎禮直播上突然感動致辭,讓黃翠如正式冠以蕭太之名,誠意十足,令黃翠如既感動又有face。

撰文:東方新地 |編輯:Chloe | 圖片:新傳媒圖片庫、黃翠如IG蕭正楠IG、TVB節目截圖、Facebook | 原文刊於:東方新地

延伸閱讀:

全港53間直資私小學費一覽 10大學費最平直資私立小學

【好感動!】結婚誓詞的意義 6段最真摯動人的明星誓詞

蕭正楠廉娶黃翠如

蕭正楠選擇在上周日(16日)的《萬千星輝頒獎典禮》,鼓起勇氣口震震當住鏡頭直播面前,宣布2018的人生重要決定就是與黃翠如結了婚,並多謝對方一直在身邊支持,此話一出全場嘩然,原來二人已秘婚達半年,今年四月在新西蘭旅行註冊結婚,他們卻一直密冚喜事,只有家人及幾名身邊密友知情。隨住陳凱琳與鄭嘉穎、單文柔與陳展鵬一窩蜂雙喜臨門,蕭正楠自知終有一日紙包唔住火,決定在台慶頒獎禮自爆。

0
0
在周日晚(16日)的台慶頒獎禮上,蕭正楠攞咗個「最受歡迎電視拍檔」,頒獎嘉賓是黃翠如,致謝辭時蕭明顯有備而來,公開多謝太太黃翠如,被指騎劫了整個頒獎禮。

愛的騎劫

頒獎禮上突然宣布婚訊,事前全不知情的黃翠如真情流露,用手掩嘴一臉驚訝

喜極而泣

蕭正楠緊張到聲都震埋,黃翠如表現得非常感動,眼濕濕在旁支持老公。

叫蕭生收口

蕭生講極唔完,黃翠如突然搶咪講:「呢個係頒獎禮呀!夠喇!」

事出突然,全場大叫「咀佢!咀佢」就連當晚主持Do姐鄭裕玲、麥美恩與陸浩明都忍唔住要衝上台,仲成功起哄要蕭生蕭太咀嘴。

世紀一吻後,蕭正楠攬實老婆笑晒落台。

洪永城拍面

蕭正楠搶fo認結婚只有極少人知情,就連與黃翠如感情好到不得了的洪永城亦震驚 到要拍打蕭正楠塊面。

全場嘩然

黃翠如這晚冇獎攞,但卻成為最多人恭喜的當家花旦,風頭勁過視后。

首次求婚失敗

事後翠如在IG上載二人戴上婚戒的照片,並寫了一段長文交代心情及略略談及結婚經過,其他詳情就交由蕭正楠回應記者,當晚頒獎禮結束後,蕭正楠與曹永廉一齊接受訪問,被問到求婚過程,蕭正楠自爆第一次求婚是失敗的:「當時我和翠如去玩過山車,搵咗全歐洲最快嘅過山車,點知上到去後佢好驚,我拎起戒指叫佢望過來,但佢死都唔肯望,一直叫唔好、唔好,我又怕戒指會跌走,最終要取消行動。」他表示翠如喜歡簡單的方式,所以第二次求婚成功後,就到新西蘭旅行結婚,並於事前已知會雙方父母,而結婚公證人都是在當地搵的。至於那對非一般的婚戒,蕭正楠透露求婚時已向翠如送上鑽戒,但對方卻鍾情在新西蘭買的手工戒指:「我哋結婚冇好周詳嘅計劃,只係準備咗個幾星期就出發,但一直搵唔到心水婚戒,直至去到farm market,喺攤位發現呢對用餐具捲成嘅戒指,大家都鍾意。」

黃翠如以長文交代在外地求婚及完婚經過:「他在過山車上向我求婚,我在河邊向他求婚……我們給對方的,是陪伴的承諾。沒有奢華的浪漫,但足夠。」蕭正楠則一句:「你快樂所以我快樂。」一樣咁sweet!

在台慶頒獎禮自爆婚已結後翌日,黃翠如與蕭正楠在IG上載一張戴上結婚戒指的兩手合照,零卡鑽石的婚戒用餐具銀器捲成,是二人在新西蘭的農夫市集地攤尋寶所得。

「翠蕭戀」拍拖4年修成正果,下一站就是努力造人為人父母,不過翠如就快開劇,真係要好好把握時間。

新西蘭旅行結婚,蕭正楠整個旅程花費幾萬認真實惠,但已令堂堂百億千金翠如覺得非常難忘,而她的父母竟然都冇詐型,據知情者透露:「Edwin(蕭正楠)覺得好委屈翠如,結咗婚都唔可以名正言順,所以佢想趁頒獎禮話畀大家知,算係為翠如做番啲嘢,以後亦唔使再瞞來瞞去。個個都驚訝佢哋結婚結得咁求其,事實係翠如從來唔渴望公主式出嫁,佢好怕麻煩,所以早已同Edwin有晒共識唔會大搞,翠如父母亦好開通,佢哋覺得最緊要個女開心,仲話唔使特登畀禮金,有錢都留番佢哋買樓,因為翠如好想靠自己賺番嚟嘅錢置業,唔會靠屋企。不過Edwin都好識做,諗住公開後會補擺酒,話晒岳父岳母養到個女咁大,不過都係一切從簡,唔會搞大龍鳳。」

View this post on Instagram

我的老豆,媽子。 #祝您們身體健康 #祝您們幸福快樂

A post shared by Priscilla Wong 黃翠如 (@wongtsuiyu) on Feb 19, 2018 at 12:53pm PST

老二搶閘

黃翠如搶閘率先出嫁,雖然無大排筵席,但父母非常開心,早前黃翠如更請父母外遊,外嫁女一樣咁窩心。

夫妻檔升身價

近年蕭正楠與黃翠如不時孖住接job,現在名 言順夫妻檔上陣,身價又再跳升,有錢齊齊搵。

打亂生B大計

近年翠如在事業上明顯放慢腳步,去年請大假休息,唔拍劇跑去第三世界做慈善探訪,幾度傳出她想與蕭正楠結婚生B,事實上婚是結了,但生B計劃卻要一再延遲,知情者說:「翠如今年都37歲,佢同Edwin都想婚後試吓努力,點知早排收到公司通知要幫出爐視后Ali(李佳芯)頂咗個新劇角色,伯樂余詠珊出到口,翠如亦乖乖從命。不過生仔唔係話咁易,翠如向來身體都唔太好,今年開始跟好姊妹唐詩詠做吓運動先好少少,啱啱先拍完套《過街英雄》,依家又要開新劇,睇嚟半年內都唔可以成事,要生都係出年打後嘅事。」

今年4月,蕭正楠與黃翠如飛去新西蘭秘密結婚兼度蜜月,翻查二人當時的IG,上載了多張互影的照片,黃翠如更以「great MOMENT」來形容當時的心情。

蕭正楠與翠如定情於14年的劇集《師奶madam》,感情一直非常穩定,雖然結婚大事無雙方父母在場做見證,但孝順翠如婚後即把愛巢搬近娘家,她與蕭正楠本來於華景山莊與蕭母同住,但早前翠如被本刊記者影到車載胞妹到大埔康樂園辦事,原來婚後她與蕭正楠已入住康樂園,而娘家則位於大埔寶馬山,方便她經常返回娘家。

蕭太出巡

周一(17日)下午,黃翠如正式孭 住蕭太個名出街,這日她由新愛巢康樂園出發,到荃灣搵車房為愛車打胎氣。

新愛巢近娘家

蕭太唔肯回應搬新愛巢一事,但全程笑盈盈心情勁靚,最後駕車返回大埔娘家,孝順女始終都想住近父母,可以經常返屋企探望兩老同姊妹。

蕭太耍太極

正式公開成為蕭太的翌日(17日),翠如駕車離開新愛巢到荃灣整車,當她聽到在場記者不停「恭喜蕭太」時即笑到四萬咁口,問到何時搬入康樂園愛巢?她只笑不答,再追問是否趕生豬仔?她說:「唔係、唔係。」全程嘻嘻哈哈耍太極的翠如,以趕時間為由離開,最後返回娘家探親。蕭正楠以愛的騎劫來讓太太翠如有個最難忘的頒獎禮,對於他們來說,彼此的幸福與快樂,比起攞視帝視后更為珍貴,期望明年的頒獎禮,他們會有愛的結晶品。

黃翠如家有四姊妹,她是二家姐,其父聯旺集團(8217)股東黃永華喜歡大家庭,據知黃父為人豪爽,第一次嫁女亦無為難女婿,未有要求收禮金。

我瞞結婚了

去年黃翠如與洪永城拍了一套《我瞞結婚了》,估唔到現實生活中她與蕭正楠成了男女主角,瞞婚達半年才公開,而這段期間二人做 戲做全套,鏡頭前後都矢口否認,果然是藝人。

好兄弟被傳婚訊, 一早知情的曹永廉出席公開活動時曾 漏口風說:「可能已經結咗呢!」不過蕭正楠即反駁:「信佢一成雙目失明!」

頂李佳芯角色 延生B

出爐視后李佳芯以健康為由推掉 即將開拍的新劇《禍後》,角色由黃翠如義氣頂上,日前本刊更影到黃翠如與無綫助理總經理余詠珊開心食飯。

翠如與余詠珊言談甚歡,二人邊食邊傾,有高層出馬,本來諗住減產的黃翠如,都要捱義氣頂上。

喜歡小朋友的黃翠如助養兒童多年,近年更減產不時去第三國家做探訪,又為生B養好身體勤做運動。不過新劇一開拍就拍幾個月,打亂 其造人大計。

37歲黃翠如 毋懼素顏

蕭正楠拍拖3年愈嚟愈恩愛,近年黃翠如去到邊就梗見男友一定喺身邊。二人合體時固然sweet sweet,難得見翠如BB一個人出動,仲要素顏現身,37歲依然仙氣十足,難怪蕭正楠咬實唔肯放手。當日翠如一個人自駕去大角咀宣明會,疑似要取文件。不施脂粉、長髮飄飄咁,落車過馬路時帶著甜笑、小心翼翼留意來往車輛,然後一陣風咁辦完正經事又再開車走人。

黃翠如
黃翠如

黃翠如不施脂粉、長髮飄飄,過馬路都面帶微笑,依然童顏。

翠如泊好車後回頭確定鎖好車門才離開,非常謹慎。

即將奔四嘅翠如依然baby face ,攞住疊白紙喺手又輕輕撥吓吹散咗嘅頭髮,好有文青大學生氣質囉!

去大角咀宣明會攞完文件後極速走人,手持大疊白紙嘅翠如BB望落十足十大學生。

黃翠如同蕭正楠拍拖多年依然甜蜜,其實翠如BB同Edwin 自2014年五月公開戀情後,至今已經拍拖三年!兩人戀情一直十分高調,有如糖痴豆。不論鏡頭前後都可現二人甜蜜蹤影!

其實佢哋嘅戀情萌芽於拍攝《師奶MADAM》之時!翠如喺「定情劇」中飾演由千金小姐變做屋邨師奶的女卧底,而蕭正楠就飾演翠如嘅兒時夢中情人,與翠如扮演夫妻,一同查案。劇中二人有情人終成眷屬,由假夫妻變成真夫妻,而喺現實生活中,Edwin都一樣係翠如BB嘅Mr. Right!個個都Like爆佢哋,二人仲多次一齊奪得 熒幕情侶獎添!

熒幕情侶
熒幕情侶

話翠如、蕭正楠係TVB最Sweet嘅熒幕情侶,相信冇人會反對吧!唔少FANS都希望二人早日拉埋天窗!

延伸閱讀:

【童星兄弟】「大喊十」浸大畢業 王秉熹奪全球大學電影獎

關注我們Facebook專頁
    相關新聞
      更多瀏覽