【萬千星輝頒獎典禮2018】抗癌成功 演大小姐彈出 林淑敏眾望所歸成「最佳女配角」
2018年12月17日08:50

在處境劇《愛回家之開心速遞》中,飾演巴辣大小姐龍力蓮的林淑敏,以誇張惡死的演繹成功上位!7年前曾患乳癌的林淑敏,逆境重生後一直默默做好綠葉每個角色,終於等到發圍的好機會,今年在網民力撐下,終在《萬千星輝頒獎典禮2018》,獲頒「最佳女配角」一獎,可謂眾望所歸。

原文:東方新地 圖片:東方新地、林淑敏Facebook、新傳媒資料室 編輯:Joanne@Sunday Kiss

延伸閱讀:

【好感動!】結婚誓詞的意義 6段最真摯動人的明星誓詞

全港53間直資私小學費一覽 10大學費最平直資私立小學

「大小姐」成就最佳女配角

舊年獲得大批網民力撐嘅「大小姐」林淑敏,竟然畀朱晨麗爆冷跑出而「撻Q」,搞到網民好嬲,仲揚言要杯葛大台!

萬千星輝頒獎典禮
萬千星輝頒獎典禮

今年「大小姐」終於眾望所歸坐正!憑《愛回家之開心速遞》攞到「最佳女配角」 。

好拍檔「送水輝」、「KC」同「Terry」,都第一時間向「大小姐」道賀!

林淑敏喺台上致謝時說:「7年前嗰場大病之後,我諗仲做得乜,樂小姐一個電話,叫我唔使擔心。」最後「大小姐」都感謝老公多年來嘅無私支持!事後林淑敏接受訪問時表示:「老公一直好支持我,好多時夜晚同我對劇本,成日扮送水輝。得獎覺得好意外同驚喜,覺得自己係唔配攞呢個獎,我只係代表《愛.回家之開心速遞》去攞。」

林淑敏 年半抗癌日子

林淑敏2000年加入無綫,同年遇上丈夫陳中原,感情與事業同樣經歷長時間的浸淫,今日都見收成。不過林淑敏走過的路並不平坦,2010年患上乳癌,佢堅強面對,接受手術、化療、電療及標靶藥,藉此減低癌症復發的風險,但受到副作用影響,頭髮在一夜之間脫清光。

歷時年半的抗癌日子,林淑敏當作放了一次長假,當時仍是男友的陳中原陪伴在側,無綫亦安排佢擔任《都市閒情》主持,工作時間和收入都較穩定,不用應付日以繼夜的拍劇模式。完成18次標靶針注射療程後,林淑敏宣告抗癌成功,重新投入工作。

活在當下

林淑敏在2010年患上乳癌,經歷過多次化療同手術切除腫瘤後,終抗癌成功,講到呢個病令佢脫胎換骨,林淑敏笑言:「其實係祝福嚟,好多人會覺得,病一定好慘、一定係唔好,但我有呢個困難面對過,我又覺得一路行落嚟,其實所有嘢對我嚟講都係祝福、成長,我嘅性格改變咗好多,以前係好憂慮,好似好識計劃咁,會計劃到六十歲、七十歲,但係今日嘅我,我會比較傾向活喺當下,我會顧好今日、明日,將來嘅事,船到橋頭就自然直㗎嘞。我少咗好多憂慮,我覺得我諗咁多,一來未必會發生,再講我都未必會有六十歲、七十歲,唔知㗎嘛!個人豁咗出去,輕鬆好多、開心好多,演戲其實都係內心嘅反射,當我放輕鬆咗,其實對我自己嘅演技係有一啲幫助。」

林淑敏
林淑敏
2010年不幸患上第二期乳癌,林淑敏在患癌初期隱瞞雙親,「經歷過上次,依家我學識出事會話畀屋企人知,大家一齊行、一齊成長。」

問到林淑敏當初係點發現患乳癌?佢話:「我自己摸到㗎!乳癌有好多係深藏喺裡面,去到有徵兆被發現可能已經處於好危險嘅階段,我都算係好好彩,我嘅腫瘤係生喺表皮下面,凸起咗,唔去理都唔得,去睇醫生,好快做咗個決定,做手術,因為係表皮下,唔需要做全乳切除,但就要剪皮,剪走感染嘅皮。」

林淑敏
林淑敏

確診後三日做手術

同樣成功抗癌嘅薛芷倫話佢冇喊過一次,淨係知道要全力以赴去戰勝癌病,問林淑敏當時嘅心態又係點?佢答:「我有喊㗎,我係人嚟,哈哈哈哈!我唔係話薛芷倫唔係人,我相信每個人嘅處理方法都唔同。嗰時我仲開緊工,要同當時套劇嘅監製講,因為無啦啦失場人哋都要知咩事,對住佢又喊咗一餐,對住男朋友又喊咗一餐。但好快就消化咗件事,因為確診後,醫生第二句就同我講:『你唔使死嘅,你只係需要接受一個好長嘅治療啫!』我知道自己唔使死,再唔開心落去,我都係要繼續生活。確診之後三日就做手術,快到都冇時間諗。」

林淑敏
林淑敏
林淑敏憶述:「當時我屋企人唔知我生cancer,去到打第三針,我媽咪返嚟香港,我冇辦法瞞至講,我好驚佢唔開心,但原來諗埋佢嗰份係好戇居,我媽咪知道後話:『哦,你講咁耐,你想講你生cancer呀!你一定要醫喎,阿邊個就係堅持唔打化療,走得好辛苦,你一定要打呀!』」

問林淑敏當時要做電療同化療?佢表示:「要!需要做化療,打標靶藥同電療。電療就一個月,化療就四針、三個月,標靶十八針,啱啱一年,成個療程差唔多年半。過程冇想像中咁痛苦,我所經歷嘅副作用唔多,化療會嘔、會爛口,喺我身上都冇發生過,甚至乎我有能力做運動,甚至標靶藥未打哂我已經返番工。」

林淑敏
林淑敏
講到飲食方面嘅改變,林淑敏話:「我淨係有兩樣嘢唔得,唔食過甜嘅嘢,控制一日攝取大概六粒糖。六粒糖來自水果、飯、五穀,甜品、精製過嘅嘢我唔食,油炸嘅嘢我唔食,烤過嘅皮、動物油脂我唔食。另外莓類、抗氧化嘅嘢我會食多啲,但試過抗氧化嘅嘢食太多,血小板過低,咁我咪又食番少啲。依家我每日食兩個拳頭份量嘅連皮水果。」

求婚似開會

林淑敏同老公陳中原(Tommy)拍拖十三年,喺2013年結婚,問佢哋中間有冇低潮?佢答:「病嗰段時間,我同佢講不如算啦,當時大家都後生、三十幾歲正常會諗結婚生仔,當時我有病未必可以行落去。嗰時我覺得,甩咗佢我仲舒服,可以返加拿大養病。但係佢唔係咁諗,佢話:『唔係個個拍拖都係結婚、生仔、抱孫,我哋互相扶持,有幾耐命得幾耐命。』佢唔識煮飯,但佢知道食得好對我好緊要,佢去學煮飯,我打化療期間,佢每晚都煮五餸一湯。怕污糟我會感染,一放工就洗衫、煮飯、掃地,我好似大爺咁攤喺度睇住佢做,佢就係一個咁好嘅人囉!」

林淑敏
林淑敏
提到丈夫的關愛照顧,林淑敏多次表示:「我好好彩遇到佢。」

林淑敏又指自己原本冇諗過要結婚:「做完晒療程,再抖咗幾個月,有一日佢同我講:『你其實有冇諗過結婚㗎?』我答:『老實講,冇喎!』跟住佢話:『有冇搞錯!咁幾時結?你講嘞!結唔結?你講!』咁都已經唔係求婚啦,哈哈哈,我話:『要結咪結囉,咁結囉!』就係咁嘞,大家好似開咗個會咁。」

林淑敏
林淑敏

老公拒冒險生B

講到林淑敏依家41歲,其實都趕得切生小朋友,但佢話:「唔得嘞,我有雌激素過高,要食荷爾蒙藥,原本係五年一個療程,上年食完五年,醫生同我講:『你諗唔諗住繼續食第二個療程?如果你要生小朋友,你就要快嘞,依家就要停藥嘞,半年之後你可以準備生小朋友。』但依家醫學上整個荷爾蒙療程一睇係睇十年,我諗唔掂,我就返去同我老公講,問佢繼續食藥定生小朋友好,我老公就話:『唔好生,女人大肚雌激素好高㗎,好危險,我唔想要一個我唔識嘅𡃁仔,而令到你有危險。』好感動佢幫我做咗呢個決定。」

林淑敏
林淑敏

憑「大小姐」一角彈出

康復期內林淑敏堅持工作,其不撓精神令人敬佩,康復後即使被獲派的都是閒角,佢亦默默做好本份,終於等到大小姐這個令人又愛又恨的角色。獲得觀眾讚賞的林淑敏,今年更首次躋身最佳女配角候選名單,甚至有網民追捧佢成為最佳女主角、民間視后!

《愛回家之開心速遞》角色眾多,其中林淑敏(大小姐)與許家傑(送水輝)呢條感情線備受觀眾喜愛!劇中大小姐自小被父親羅樂林寵壞,角色尖酸刻薄又乞人憎,但一遇到送水輝時就含羞答答,層次豐富!

18年密密做

林淑敏2000年參加香港小姐奪「最奪目小姐」,當年冠軍係劉蘊慧,之後便加盟無綫至今,演過無數套劇,但一直只做路人甲乙丙,2011年終憑《真相》的巴辣闊太Emily,令觀眾留下較深刻印象。在《愛回家之開心速遞》的大小姐一角,令林淑敏成功入屋,終奪得「最受歡女配角」一獎。

當年入無綫做小花,與黃𨥈塋、汪琳及宋之齡同期。

《都市閒情》

《是咁的,法官閣下》

延伸閱讀:

【童星兄弟】「大喊十」浸大畢業 王秉熹奪全球大學電影獎

關注我們Facebook專頁
    相關新聞
      更多瀏覽