[LIFE] 用餐叉反鎖房門保命?學識呢幾招去旅行玩得更安心!
2018年12月15日21:00
0
0

去旅行梗係想玩得開心又安心,但唔知點解有個friend硬係會跌銀包、唔見passport,去啲東南亞地方又怕畀人爆門入屋偷嘢,唔想呢啲事影響你嘅放假心情,就要學下呢幾招保護自己!

藏錢保命大法

分開銀包

阿媽成日教落去旅行啲錢一定要分開擺唔可以集中喺晒一個袋度,要分開銀包同留返啲錢喺喼入面,咁樣就算畀人偷咗個銀包都仲有錢可以用,唔會一下子冇晒錢唔知點算咁。

製作假銀包

旅客通常都會成為啲小偷嘅頭號目標,所以各位記得整定個假銀包旁身,只要用個舊銀包、過咗期或者已經cut咗嘅信用卡、舊會員卡同少量現金就以呃得下人。一個唔好彩畀人被到埋牆角,就交一早準備定嘅假銀包畀賊人保命!

利用小物

仲有個方法就係用啲最唔起眼嘅日常小物去「禾桿冚珍珠」〜將應急錢摺細攝收喺唔同小物例如唇膏、電話殼、梳中間甚至鞋底,咁就算行街銀包畀人偷咗或者跌咗,都唔怕冇錢返酒店。

鎖門保命大法

餐叉鎖門

估唔到餐叉可以鎖門!不過都要喺事前花工夫準備定先至用得到〜先預好門鎖位置,再用鐵錘將餐叉腳屈成90度直角,令佢可以勾喺門鎖個窿度。之後就睇大家手頭有嘅工具而有兩種做法:(1) 將叉柄用工具磨斷再攝入叉腳中間、(2) 用另一支細啲嘅鐵餐具攝入叉腳中間,簡單DIY安全門鎖,外面點推都入唔到房。

衣架鎖門

如果冇事先準備就要學識就地取材保命,講緊係用酒店必備嘅木衣架〜將掛勾掛住除盜鎖,而下面部分套入門柄,咁樣就算外面打開咗門,都會因為有衣架撠實咗防盜鎖同門柄所以入唔到黎!

門塞鎖門

平時用門塞多數都係打開門之後要嚟頂住道門,等佢唔好閂埋方便出入。但去旅行嘅時候咁簡單嘅門塞就會自動升級成為自保嘅好幫手!閂好房門再上鎖後,就將門塞好似平時咁攝實門罅,咁樣就算畀人喺外面開咗鎖都推唔開道門啦〜另外仲有一觸動就會響警報嘅門塞,就算訓着都即刻會嘈醒,仲可以嚇走入侵者添,淘寶搵下可能有得買。

獨女保命大法

旺區住宿

女仔如果自己去旅行,記得唔好揀啲冇乜人嘅地方住。去旅行通常都會玩到夜晚先返住宿點,如果行啲大路還好,要行好幾條橫街窄巷返去嘅就唔好揀,黑麻麻咩都睇唔到自己一個人行實在太危險。住旺區係會貴少少,但勝在夜少少都仲有人喺街、燈火又通明,安全更重要!

唔亂識朋友

相信大家早排都睇過韓國路人搭訕呃錢嘅事件,會比以前更加小心路上嘅陌生人,但其實酒吧、餐廳等等地方都要注意安全,唔好傾幾句就以為好熟對方唔會害你,就接受佢哋嘅任何邀請例如飲酒、去某個地方,一唔小心畀人迷暈咗後果就不堪設想,亦冇人救到你。所以保護自己,都係留喺啲身己預計好、熟識嘅地方會更安心又安全。

同家人朋友保持聯絡

無論係自己去定有旅伴都好,旅程途中最好都係同喺香港嘅親友保持聯繫,有咩事可以即刻搵佢哋幫手,又或者自己出咗事同佢哋突然失聯,起碼佢哋都會察覺到知道自己唔見咗而去通知其他人幫手,唔會死咗都唔知咩事。

All Photos from Internet and Youtube Screen Shots

這篇文章 [LIFE] 用餐叉反鎖房門保命?學識呢幾招去旅行玩得更安心! 最早出現於 GIRLTALK 有班女仔

關注我們Facebook專頁
    相關新聞
      更多瀏覽