診所職場事【寶豬趣聞】又中又西 |珍寶豬
2018年12月13日17:01

【診所職場事】有日兩婆孫嚟到診所。

婆婆行埋嚟同我講:「唉,同佢登記啦」

我:「小朋友睇過未啊?」

佢:「佢阿媽成日帶佢嚟㗎啦!你登記啦!」

又唔駛咁快醒到我一臉屁嘅~

撰文:珍寶豬

延伸閱讀:

借稅貸再造定存賺息差 坐定定穩袋7,426元攻略|大新銀行|華僑永亨信用財務

樓市大踢爆 通街劈價盤 點解樓價指數跌咁少 | 香港樓市2018 | CCL | 黃良昇 | 中原城市領先指數

我:「咁有冇覆診卡俾我,或者登記嘅電話號碼?」

佢問孫仔:「你阿媽幾號電話呀?」

孫仔口窒窒回應:「XXXX-XXXX」

我搵到紀錄:「你係咪叫乜乜乜呀?」

孫仔點頭。我:「登記咗㗎啦,咁你哋坐坐先,等嗌名得㗎啦」

婆婆拍拍孫仔個頭:「講個電話都講到一舊舊,梗係食得西藥多食到個人恰恰吓」

佢哋坐低後,婆婆唔知係咪越坐越激心,開始發火炳孫仔:「你呀!成日食埋咁多西藥呀!唔曉高㗎!會變侏儒㗎!」

咦,婆婆對藥物有自己嘅一番見解咁喎~

婆婆繼續講:「你唔知你阿媽點做人阿媽㗎,成日塞西藥俾個仔食,冇事都食到有事啦!越諗越唔妥啦,都唔知係咪個醫生有問題!有咩可能睇完一次又一次呀?慌死唔係俾啲會上癮嘅藥你食呀?」

孫仔,你平時喺屋企會追藥食嗎?

婆婆拉起孫仔:「咪啦,我同你去睇中醫!走啦」

孫仔扯返低婆婆:「唔得㗎,阿媽會鬧我哋㗎!」

婆婆覺得孫仔言之有理坐返低:「係喎,咁你睇完呢個再同我去睇中醫啦」

我怕出事就開口講:「婆婆呀,西藥唔可以同中藥一齊食㗎,同一日內都唔好啦」

婆婆:「你咁霸道㗎咩?中藥都冇話唔可以同你啲藥一齊食啦!」

我:「如果大家都有藥性嘅,真係唔可以一齊食㗎」

婆婆:「我而家冇話要一齊食,你唔俾我睇完唔食㗎?」

…你咁講,我都冇嘢好反駁啦,家陣小朋友齊嗌交咩~

我:「冇一齊食就最好啦,小朋友你都記住西藥同中藥係唔可以一齊食喎,知唔知呀?」

孫仔點頭。婆婆:「多多事幹」

呢啲多事都係唔想你搞出人命啫~

診所職場事 寶豬趣聞 被HIGH死的太太 珍寶豬
診所職場事 寶豬趣聞 被HIGH死的太太 珍寶豬

診所職場事【寶豬趣聞】被HIGH死的太太 下集

診所職場事 寶豬趣聞 被HIGH死的太太 下集 珍寶豬
診所職場事 寶豬趣聞 被HIGH死的太太 下集 珍寶豬

【診所職場事】有晚有位先生睇完醫生,出埋藥~

我:「呢度三百呀」

佢打開銀包望望,之後哄埋嚟同我講:「淨係收現金?」

我:「係呀」

佢拎出幾張紙幣:「三百呀,呢度」

撰文:珍寶豬

我接過,望望手上嘅紙幣:「咦?你係咪俾錯我呀?呢幾張台幣嚟喎?」

佢:「我係得呢啲咋」

我:「我哋唔收外幣㗎,而且三百蚊係港幣喎~你台幣三百嘅話係港幣一百蚊都冇喎?」

佢:「你話三百㗎嘛」

我頂你啦,你不如俾盡啲,俾300YEN我?你唔好再惹起我把火啦,我冇得去旅行見到外幣會殺人㗎!

我:「呢度香港地方,正常人都知係用港幣結算㗎啦,先生,你唔好玩啦」

佢:「你話收現金我俾咗現金你啦喎,我係得呢啲咋」

佢打開銀包俾我睇,又真係全部台幣喎!

我:「我哋淨係收港幣㗎咋,或者你出去拎錢啦,對面都有櫃員機」

佢:「姑娘,我都好講道理嘅,我就唔係專登做西客留難你」

係咩?你大大個西字寫上臉啦喎。

我:「我明~不過我哋只收港幣現金」

佢:「咁我係冇嘅話,咁點呀?」

你大大個樣『奈我咩何呀~吹咩?』,冇嘅,你做初一我做十五。

我:「冇咩嘅,你俾唔到嘅,我哋取消你張病假紙同睇醫生紀錄,啲嘢收返啫,唯有當你冇嚟睇過啦」

佢口窒窒:「我啱啱落機咋嘛,我今日一定要攞假紙㗎」

我露出笑容:「你一定要攞病假紙,我一定要收足港幣現金」

佢:「你幾點收工呀?」

我:「我哋今日收九點」

佢:「我晏啲返嚟俾錢得唔得呀?」

我:「得呀,冇問題,九點前返嚟俾錢就得㗎啦」

佢邊講邊離開:「台幣都係三百啫」

你老闆出糧用台幣計算好冇?

診所職場事 寶豬趣聞 身分證下集 珍寶豬
診所職場事 寶豬趣聞 身分證下集 珍寶豬

診所職場事【寶豬趣聞】身分證上集

診所職場事 寶豬趣聞 身分證上集 珍寶豬
診所職場事 寶豬趣聞 身分證上集 珍寶豬

【診所職場事】有日一位叔叔嚟到診所。

佢UN身UN勢行埋嚟問我:「喂~阿妹,入面有醫生呀?」

我:「係呀,你係咪睇醫生?係嘅俾身分證我登記呀」

佢側側身繼續UN笑住講:「邊係睇咩醫生呀,有啲嘢請教佢啫」

撰文:珍寶豬

我冷酷無情:「咁即係睇醫生啦,身分證啊唔該~」

佢繼續UN:「請教佢喎」

我:「即係要見醫生睇醫生問醫生嘢~俾身分證我登記啱㗎啦」

佢終於停一停:「吓?問吓都當係睇㗎?」

你咁鍾意問,上網問呀嘛~大把人覆你啊…如果個問題夠戇居的話。

我:「係呀,入得醫生房見醫生都係睇醫生㗎啦,就算冇藥我哋都會收診金㗎」

佢又開始UN:「駛唔駛咁孤寒呀?當問答遊戲咁咋嘛」

醫生鍾意玩問答遊戲嘅就上咗百萬富翁玩啦,同你玩有咩好玩呀?你UN嚟UN去又冇大波波搖俾我哋睇,可觀性太低啦。

我:「我哋唔玩㗎,醫生係好認真咁診症嘅」

佢:「Aiaiaiai!我唔係話醫生唔專業唔認真,阿妹你唔好屈我呀!」

我:「咁你係咪俾身分證我登記呀?」

佢繼續UN:「男人當兄弟傾吓計呀,我請飲酒冇問題喎!」

兄弟幫阿BOB,有人搵你呀~

我:「如果你唔係登記睇醫生嘅,我冇其他嘢可以幫到你㗎啦,你有需要就登記睇醫生啦,先生。」

佢:「唔俾咪唔俾,馨香有寶!我求其喺街捉一個都係醫生呀,一街都係兄弟呀」

一街都兄弟啊?你媽媽好生得吓喎~真係恭喜你呀。快啲去捉啦嘛~千其唔好捉咗扮醫生嘅劉以達啊。

診所職場事 寶豬趣聞 成為有錢人 珍寶豬
診所職場事 寶豬趣聞 成為有錢人 珍寶豬

診所職場事【寶豬趣聞】成為有錢人 上回

診所職場事 寶豬趣聞 成為有錢人 珍寶豬
診所職場事 寶豬趣聞 成為有錢人 珍寶豬

延伸閱讀:

香港樓市新形勢 10條大家最關心的樓市問題 幾時上車 要買首置上車盤 點揀白居二 | 香港樓市2018

關注我們Facebook專頁
    相關新聞
      更多瀏覽