家燕姐開騷送抱 頂親張智霖
2018年12月07日03:00
家燕姐與張智霖因《十月初五的月光》結緣。

【星島日報報道】《薛家燕愛你無限60年演唱會2018》前晚於紅館演出尾場,表演嘉賓陣容強勁,家燕姐男友都有捧場,更有跟她握手,看到她三名子女上台獻唱,男友都感動到喊。對於被催婚,家燕姐則坦言:「咁嘅年紀結乜婚呀!」

家燕姐個唱前晚尾場吸引到陳敏之、徐小鳳、劉松仁、羅霖、邵音音及樂易玲等入場欣賞。嘉賓方面相當強勁,包括有張智霖(ChiLam)、譚詠麟(校長)、草蜢、羅家良、鄭欣宜及七公主其中四位的陳寶珠、王愛明、馮素波與沈芝華等。張智霖以角色初哥哥的打扮出場,家燕姐大爆ChiLam好錫她,有次一起到馬來西亞登台,對方出錢請她吃價值6千多元的魚。她說:「我咁大個女都未食過咁滑的魚,仲滑過我啲肉。」ChiLam則謂今次以初哥哥身分出來,要送個擁抱給家燕姐。家燕說:「攬完有啲暈陀陀。」ChiLam搞笑謂:「我直情缺氧,又有野頂親」。家燕姐唱多首向天王級歌手致敬歌曲後,她特意多謝小鳳姐。她說:「佢問我係咪有跳舞?但佢話唔跳舞,因為好索氣。我好開心佢特登來支持,仲畀好多意見我。」

最爆笑譚校長笑笑口話可以畀佢嗌得做前輩,現時仲屹立喺舞台上嘅人寥寥可數,所以嗌家燕姐嗌得好順口,又謂在60年代睇黑白電視已經睇家燕姐,並自認係粉絲。其後從袋中拎粒癦出來黐在額頭。他說:「呢粒癦如有神助,並唔係等閒之輩,今時今日仲可以有激光放射出嚟!我粒癦就黐上去,你粒癦應該有根。」家燕姐笑言自己粒癦有毛。

Encore時,草蜢三子蔡一傑、蔡一智及蘇志威與家燕姐唱《忘情森巴舞》後,蔡一智笑言覺得家燕姐似家人,因弟弟蔡一傑額頭都有粒細癦,見到家燕姐好似家姐,最後家燕姐唱出《皆大歡喜》為個唱劃上句號。

家燕姐在慶功時受訪,表示完成個唱鬆一口氣,但心情興奮,今次個唱籌備了半年,初時好大壓力,因為要唱十幾首歌又排好多舞,就連排舞師Sunny Wong話她跳舞多過郭富城,不過要記歌又記舞步,最擔心自己唔夠魄力。她說:「一首歌只得分幾鐘時間換衫,所以跟自己講要做到最好。每日都練歌跳舞,做好自己想做的事。我覺得做到呢個演唱會係我畢生難忘的事,見到親戚朋友對自己的支持,團隊亦好專業同好大付出。」她直言長女珊珊為今次個唱做統籌搞到入院,當三子女上台獻唱,令她忍不住落淚,當中播放的片段是子女找資料製作,覺得好有心思,加上在演藝界60年獲得大家支持同愛錫,認為人生無求,感覺好快樂同安慰。

問到男友可有入場睇騷,家燕姐表現得含羞答答說:「應該有,人哋睇唔到就算啦!(陳寶珠指未見過你男友!)無呀!在後台時都無見過,因為我在後台好忙,無辦法照顧佢,怕會影響我心情。」她笑言會作安排帶男友見「七公主」。問到明年可會成事?家燕姐一度會錯意說:「無咁快!仲以為你哋話結婚。(蕭芳芳向你催婚喎。)唔好啦!馮素波都話今年忙到不得了,娶完新抱又開演唱會,所以遲啲先啦!等我個女結婚先啦。(長女珊珊結婚後到你?)搞掂珊珊先啦!」提到個唱歌衫密實,問到是否為男友收起性感?家燕姐解釋好多跳舞動作,所以要有矜持,但男友睇到她的子女上台獻環節都話有喊,覺得好感動,也擔心她太辛苦,又透露舉行演唱會時男友有跟她握手,並坐在第一行,稍後也會與男友及家人到日本旅行。她說:「坦白講我唔會結婚,咁嘅年紀結乜婚呀!唔好要人唔安樂,要對人有交代。(與男友有共識不結婚?)好似蕭芳芳話我哋有『景轟』,唔係滾。(清純愛情?)係囉!」

關注我們Facebook專頁
    相關新聞
      更多瀏覽