張智霖拉定筋練「十字步」 謝天華大讚家燕姐修身成功
2018年11月29日11:44

張智霖、謝天華日前為12月舉行的《薛家燕愛你無限60年》演唱會進行綵排,張智霖與家燕姐合唱大展歌喉,佢仲話拍劇個陣已結緣,所以對方開騷點都力撐,仲練定「十字步」以備不時之需:「我已經拉定筋架啦,隨時準備好!不過我同家燕姐唱歌就好夾,但跳舞就真係唔多夾,記得上一次同佢拍劇個陣,因為跳一小段舞,搞佢整親要入醫院,呢個成為我童年陰影。」

家燕姐聽到合不攏嘴,笑指當年全靠Chilam急才避過急症室排長龍睇醫生:「個時跳舞整親要去急症室,點知等好耐都冇醫生睇我,Chilam冇啦啦攞份馬經入黎問我買邊隻,我心諗依家咪搞我啦!原來佢就係想分散我注意力,靜靜雞急Call跌打師傅黎,然後佢對護士話鐵打師傅係我亞叔,當時我仲一頭霧水唔知邊個亞叔黎探病,鐵打師傅幾下手勢就搞掂,原來係我軟骨移位,我仲可以急急腳出院。」

演唱會綵排踏入最後階段,家燕姐與樂隊默契十足,不過因疲勞過度出現喉嚨痛,嚇得家燕姐急急搵醫生保護聲帶:「我好乖依時食藥,依家就冇咩事,不過唔可以講太多野,要小心食野先得。」

而謝天華早前笑為家燕姐「有份量」,激發對方減磅,天華呢日亦大讚家燕姐修身有成效:「因為我地一見面都攬攬,好明顯都瘦左,為觀眾做到最好狀態係值得的。(你仍然一日只可抱佢一次?)我嘗試緊一日抱佢兩次,因為我自己都做緊健身,加上之後都要綵排,所以希望做到兩次啦!(家燕姐瘦咗話著褲鬆怕走光?)叫造型師幫佢改晒像筋褲頭啦,一定包冇事!」

關注我們Facebook專頁
    相關新聞
      更多瀏覽