台慶壓軸大獎得主黃庭鋒大起底 揀入行放棄做英超球員?
2018年11月21日15:24

每年《萬千星輝賀台慶》嘅壓軸大獎都會掀起全晚高潮,今年就由一位非常生口面嘅男藝人黃庭鋒(Telford)奪得!唔少人都話唔知佢係邊位,所以今次就同大家介紹呢位由「IG紅人」汪明荃手中奪過51萬現金大獎及大量獎品嘅幸運兒黃庭鋒!

撰文:東方新地|圖片:電視截圖、黃庭鋒Instagram

延伸閱讀:

《義不容情》第5-9集劇情 | 周海媚登場暗戀溫兆倫、有康有健兄弟多次爆爭執

《義不容情》第1-4集劇情 | (附精華片段!)藍潔瑛演活窮媽媽梅芬芳 捲入謀殺案被岳華判死刑

台慶大獎得主黃庭鋒大起底

今年台慶終極大獎得主由一位非常新鮮面孔嘅黃庭鋒(Telford)奪得,當中唔少人都對於呢位藝人感到非常陌生,有網民更直言唔知佢喺邊位!

入行之路

話說今年30歲嘅黃庭鋒曾經喺Now TV做過體育節目主持,兩年前過檔TVB,當時正值巴西夏季奧林匹克運動會,所以啱啱加入TVB嘅Telford獲安排參與奧運節目,並繼續做體育節目主持。

其後TVB決心唔再對體育組繼續投放資源,而Telford就好好彩當時已獲安排到其他綜藝節目,成功避過一劫。

若大家有留意明珠台節目,相信對佢都唔陌生,皆因Telford有份主持明珠台節目《港生活.港享受》,曾與宋熙年、郭田葰等人合作主持節目。

上年,Telford獲安排簽經理人合約轉做「親生仔」,出鏡機會愈嚟愈多,依家繼續喺明珠台主持英文生活節目《港生活‧港享受》,以及周末節目《Y Angle》。

參與劇集拍攝

上年曾客串劇集《雜警奇兵》,而今年就首次正式參與劇集《救妻同學會》,並即將於今個星期日播出。

據知,由於Telford喺綜藝節目中經常「扮嘢」展現演藝細胞,所以好快就被監製睇中加入劇組,首先就喺網劇《守護神》中客串一角,之後再被睇中參演《救妻》,同時與胡鴻鈞、朱智賢、劉佩玥等成為老友!

差啲做英國職業球員?!

然而,Telford入行前曾喺國際學校教書,喺英國讀中學時更係一位半職業球員!據了解,當年佢嘅教練係前英格蘭代表隊預備成員,踢過狼隊同阿士東維拉,當時教練更揀Telford去試腳!

原過由於英國球壇始終競爭太大,而Telford又認為就算好熱愛運動都唔係一定要做球員,故此決定揀返香港讀體育系!最近,Telford就攞咗香港中文大學體育系文學碩士學位,又多一位高學歷藝人!

View this post on Instagram

記得3年班個年我考到全班第34名(全班36人),爸爸要我自己反省點解會咁差?當時我只係諗我根本就對讀書無興趣,資質低,不如放棄罷啦。雖然父母從來唔會比壓力,但佢地會用任何方法鼓勵我!對讀書並無太大興趣既我去到英國留學之後慢慢揾倒當中既樂趣,但關鍵係我被當地既運動文化深深吸引住。大學回港入倒中文大學,至今已經係第六個年頭,最後選擇體育文學碩士課程,半工讀既壓力多次想放棄,連拍攝既時候都要睇住溫習筆記,但無論如何最後都跨過,讓我可以專心工作!我終於碩士畢業啦!#一生無悔#最愛爸媽#默默支持#專心工作#投入演藝#團體相再post#hkig #igdaily #多謝所有支持我既人

A post shared by Telford Wong 黃庭鋒 (@tingfung0602) on Nov 18, 2018 at 3:47am PST

操弗身型

咪睇佢平日著住衫好似瘦底人,原來Telford私底下都趁一得閒就去操下肌,手瓜都會起𦟌嫁!

聽講佢最近仲想增磅20磅,唔知係咪想操到好似郭子豪咁大隻呢?

選擇追夢想

雖然喺佢畢業後曾選擇教書,但最終都係放棄教師呢份穩定職業,皆因選擇做幕前工作先至係自己夢想,於是放手一試,成為入行主因!

據知,Telford曾表示曾擔心過自己唔係科班出身而演技唔夠熟練,所以今次喺《救妻》中盡量做到最自然表情,同時表示希望觀眾會睇到其努力。

雖然劇集仲有幾日先出街,但Telford已經咁上心自己喺劇集嘅表現,相信佢嘅努力大家都會有目共睹!

延伸閱讀:

【是咁的,法官閣下】黃智賢同老婆恩愛27年:有共識唔生B

關注我們Facebook專頁
    相關新聞
      更多瀏覽