【護眼有方】眼科檢查二三事+護眼小貼士
2018年11月11日09:40

俗語有話「眼睛係靈魂之窗」,所以我地應該要好好愛惜及保護我地嘅一雙眼晴。除咗要多加注意日常護理之外,其實我地亦應該定期去做眼科檢查,呢一點亦係好重要嘅!

撰文:傑。斯與晴 |圖片:傑。斯與晴|編輯:Kamen

延伸閱讀:

【BB濕疹】濕疹告急!4個牛油果對皮膚的好處

影后林嘉欣笑談湊女經:正向管教 放手讓小朋友自由探索!

早係三、四月嘅時候,小JM婆婆因為眼部不適而去做簡單檢查,但醫生未能揾到婆婆眼部不適嘅原因,只好再另行安排日子再檢查。

剛好前幾日去探小JM婆婆時,醒起自己要做眼科檢查,於是就打電話去預約。誰知剛收線,婆婆就向我訴說其實眼睛一直都有不適,亦透露因為前次檢查不出原因而擔心自己有眼疾,所以我就勸婆婆一齊去做詳細嘅眼科檢查,同時我亦可以代為向眼科視光師查詢情況。婆婆同意後我就即刻打去幫婆婆查詢咗檢查會包括嘅項目,順便更改預約日子、時間及人數。

圖片:傑。斯與晴
圖片:傑。斯與晴

而今次我同婆婆就去咗去位於銅鑼灣嘅理大護眼度做檢查。眼科中心空間都幾大,除咗設有眼科檢查之餘,仲有得配埋眼鏡。

除此之外,亦有小朋友嘅眼科檢查服務提供。

圖片:傑。斯與晴

場內亦同時設有圖書閣及玩具閣,而電視亦會播放一系列與護眼相關嘅卡通俾小朋友欣賞架。

所以小JM亦可以乖乖咁陪住我同婆婆做檢查,不過小JM未夠三歲,所以就無份做檢查啦!

事不宜遲,即刻為大家講解一下我同婆婆今次接受眼科檢查嘅細節啦!

我同婆婆都揀咗接受全面眼科視光檢查,務求可以釋除婆婆嘅疑慮,以及搵到婆婆眼部不適嘅真係原因。

小提示:

1.) 記得要提早預約,星期六、日嘅日子可能要提早一個月預約添架!

2.) 如有配戴眼鏡的話,記得帶埋一齊俾眼科視光師做檢測喔!

3.) 檢查時係需要除低隱形眼鏡嘅,盡可能戴眼鏡會更方便

4.) 如需要使用擴瞳藥的話,就有可能有數小時睇唔到近嘢架啦!

(即係唔駛旨意玩電話住)

全面眼科視光檢查。細節大曝光!

1.) 填寫詳細個人資料及紀錄

圖片:傑。斯與晴

登記後,工作人員將會提供一份問卷資料俾應診者填寫,不論大人同小朋友都一樣需要填寫及提交,以作初步嘅紀錄及了解。問卷內容包括:眼睛問題、日常生活習慣、家庭病歷、藥物過敏 等

2.) 基礎度數測試

圖片:傑。斯與晴

呢款係一般去驗眼都會使用嘅儀器,所以應該大家都唔會陌生。

主要係用作初步測試應診者嘅視力及度數。

只要望住儀器中的小車或小屋,儀器就可以測出你嘅初步度數架啦!

3.) 色感檢測

圖片:傑。斯與晴

視光師助理會利用「石原氏圖表」來考驗你嘅眼會唔會有色弱。呢一個環節婆婆拎滿分添架!果然寶刀未老!

4.) 測試雙眼協調感

視光師助理將會提供一副特別功能嘅眼鏡俾應診者戴,而應診者戴上後就要從圖案板中揀出最為有立體感嘅圖案。

5.) 眼壓量度

圖片:傑。斯與晴

視光師助理將利用儀器檢測眼睛嘅眼壓,以初步測驗睇下有無患上青光眼。

6.) 眼睛內外檢查

眼科視光師將會利用儀器及親身為應診者作全面嘅眼部檢查,比起只用儀器就更加萬全啦!

畢竟眼晴總會有死角位係儀器不必會睇到,所以由眼科視光師檢查埋就更放心。

圖片:傑。斯與晴
婆婆正在檢查視力喔!仲會檢查埋睇遠及近嘢嘅視力添架!-圖片:傑。斯與晴
各個不同度數嘅鏡片-圖片:傑。斯與晴

7.) 拍攝眼底影像

圖片:傑。斯與晴

拍攝眼底影像之前係需要滴擴瞳藥水嘅,係滴藥水後要等15~20分鐘左右先可以進行拍攝架!眼科視光師透過眼底影像可以了解我地嘅視網膜、視神經、血管、黃斑點等有無問題,而且仲可以作為一個存檔嘅紀錄添。

8.) 診斷報告講解

圖片:傑。斯與晴

眼科視光師係完成晒全部檢查後會向應診者提供一份紀錄卡,

以方便應診者了解自己嘅眼睛情況,同時卡仔亦會註明建議嘅覆診日期添。

同時,如果有需要使用到眼藥水的話亦會係卡仔註明架。

眼科視光師話去配眼鏡拎埋呢張卡仔去就一定無問題添!

講解完咁詳盡嘅全面眼科檢查資料,係咪都有啲心思思想去檢查呢?

其實檢查一次亦唔貴,只需要HKD$450-

價錢同出面一般檢查一樣,但服務就更為詳細,就連婆婆都一樣大讚。

而我最開心嘅係可以幫婆婆揾到問題嘅原因,

原來婆婆眼睛好健康,只係淚水唔夠,需要使用人造淚水來輔以幫助者。

我同婆婆都安樂晒。

不過,我自己就驗到右邊眼嘅右上角眼膜有啲變薄,

眼科視光師建議我半年後再返去檢查,睇下眼睛嘅情況。

原來一般近視嘅人都會比較容易出現眼膜變薄嘅問題架!

所以大家都要好好注意護眼啦!

護眼小知識:

1.) 每一至兩年進行眼科檢查,小朋友3歲起都需要定期驗眼喔!

2.) 要係適當距離及光線充足下使用電腦或閱讀

3.) 唔好趴低打機、閱讀或使用電腦,應該挺腰垂肩而坐

4.) 盡可能每30分鐘就俾對眼抖一抖,可以望一望遠景放鬆一下

5.) 要保持均衡飲食,吸收多啲含不同維他命嘅食物

6.) 要保持雙手清潔及減少捽眼

7.) 遇有外物入眼可以毛巾凍敷眼睛或以人造淚水沖走異物

8.) 出外時可以使用太陽眼鏡以減低紫外線對眼睛嘅影響

理大護眼 PolyVision

網址: http://www.polyvision.com.hk

https://www.facebook.com/理大護眼-PolyVision-426745597520035/

延伸閱讀:

【躺著也變瘦】正確睡眠等於慢跑1個鐘 唔做運動月減5公斤

關注我們Facebook專頁
    相關新聞
      更多瀏覽