診所職場事【寶豬趣聞】熱氣 |珍寶豬
2018年11月08日17:02

【診所職場事】有日有位小姐嚟到診所。

佢驚慌問:「姑娘,我俾薯片刮到呀點算呀?」

薯片割脈意粉吊頸啲朋友嚟啊~

我:「整親邊度呀?俾醫生睇吓啦~我同你登記呀」

佢:「好呀好呀」

撰文:珍寶豬

延伸閱讀:

新智能身份證12.27起更換 34-35歲優先換 8大換證攻略懶人包|分階段換證|多重防偽特徵|加快過關|影靚相Tips

火鍋之王海底撈張勇 8,000元起家 到650億元身家 | 名人視野 | 富豪智慧

坐喺度等緊睇醫生嘅阿姨搭嗲:「熱氣啦肯定!駛咩睇醫生呀?」

喂!阿姨你唔好做架兩呀!你唔好幫醫生趕客呀!

小姐同姨姨講:「真係㗎?咁點好呀?」

我力挽:「小姐我同你登記先呀?俾醫生望望先好冇?」

姨姨:「唔駛睇醫生㗎啦,出去買枝涼茶飲就冇事㗎啦,再唔係去藥房買枝飛滋膏就得㗎啦,好小事咋嘛」

小姐行過去姨姨度,擘大口俾姨姨睇:「呢度喎」

姨姨:「咁黑睇唔到呀,有冇電筒呀?」

小姐擰轉頭同我講:「姑娘,電筒呀」

電你屎忽呀!放隻螢火蟲入去啦!

我:「我冇電筒呀」

姨姨:「咁黑我睇唔到㗎喎」

小姐:「呀!電話!電話有電筒」

小姐拎住電話照照自己口腔,姨姨探頭望望:「係啦,肯定係熱氣啦」

小姐安心:「咁我去買邊款涼茶呀?」

姨姨:「廿四啦,飲一枝包有效!」

小姐:「咁就好啦」

姨姨:「唔駛咁驚,少少嘢就睇醫生,多多錢都唔夠俾醫生賺啦,啲醫生好無良㗎,咩都叫你睇醫生㗎,少少嘢都話要睇醫生㗎」

小姐望望眼神死嘅我,一言不發咁離開咗診所。

嗱!今次唔係我趕客㗎!真係唔關我事㗎~

診所職場事【寶豬趣聞】成為有錢人 上回

診所職場事 寶豬趣聞 成為有錢人 珍寶豬
診所職場事 寶豬趣聞 成為有錢人 珍寶豬

【診所職場事】有日一位小姐嚟到診所。

佢睇完醫生攞藥時,我同佢講:「呢度三百蚊啊」

佢拎出一張信用卡:「嗯」

我:「唔好意思呀小姐,我哋唔收信用卡啊,只收現金」

撰文:珍寶豬

佢:「我夠二百蚊喎,點解唔可以用呀?」

我:「唔係呢個問題呀,係我哋唔收信用卡,只收現金啊」

佢:「吓?我夠二百喎,你仲可以唔收卡㗎咩?」

你係咪有少少障礙啊?

我:「我哋係冇卡機啊~只收現金啊小姐,冇機呀,明唔明呀?」

佢:「唔明呀」

一槍打爆我個頭好冇?

我:「我哋咩卡都唔收啊~」

佢:「但係你哋唔係話夠二百就可以碌卡㗎咩?」

你係咪以為自己飲完茶呀?

我:「我哋冇講過啊~你可能記錯咗第二度啦」

佢:「唔係喎,你貼咗張紙出嚟㗎?」

你搵到有張咁嘅紙,我批個雪梨過你食!

我:「邊度啊?你指俾我睇睇」

佢指住玻璃上嘅一張紙…

『只收現金』。

我:「小姐,你可唔可以講我知張紙寫咗咩呀?」

佢:「二百蚊以上可用信用卡」

高手呀!厲害呀!四個字變咗十個字呀!跪求小姐將我戶口四位數變成十位數呀~

我啞咗,爭啲想舉起雙手拍掌…

佢一臉天真問:「唔係咩?」

我忍唔住細細聲講咗句:「估唔到香港地仲有人唔識字…」

佢問我:「你講咩話?」

我已經冇氣:「啊~冇~我哋部卡機壞咗呀,應該十年八載都唔會用到㗎啦,小姐你介唔介意俾現金呢?」

佢邊拎出現金邊講:「壞機早講呀嘛」

對唔住,係我錯啦~

診所職場事 【寶豬趣聞】 差額

診所職場事 寶豬趣聞 差額 珍寶豬
診所職場事 寶豬趣聞 差額 珍寶豬

【診所職場事】有日一位先生嚟到診所。

佢登記後問我:「你呢度有冇廁所呀?」

我:「冇呀,你要去商場洗手間啊,唔駛鎖匙都去得嘅」

佢:「遠唔遠呀?」

撰文:珍寶豬

我:「唔係好遠㗎咋,行一陣到㗎啦,你出門口睇指示牌就見到點行去」

佢深呼吸:「我唔知有冇機會行到過去」

你唔係諗住喺度瀨嘛?肚屙係好慘…不過我做拖地嗰個都好慘啊~我求吓你救救我,唔好攬炒好嗎?

我:「你個肚唔舒服到咁呀?忍唔忍到行過去呀?唔係好遠㗎咋,真㗎~」

佢:「我而家夾住咗呀,行得過去我唔知仲夾唔夾得住呀」

我:「咁我有咩幫到你啊?你都唔可以喺度屙㗎,我哋呢度都冇廁所」

佢:「你送我過去得唔得呀?」

我點送你過去好呢?公主式抱你過去,我怕會抱唔得耐? 我:「我帶你去都一樣要行㗎喎?」

佢拍枱:「諗啲唔駛我行嘅方法」

我望住佢塊青青的臉,深深感受到佢嘅痛苦,我被感動了:「一係我用輪椅推你過去啦」

佢點頭。

我推出輪椅,佢坐上了,我哋出發啦!我以最快嘅推速帶佢前往目的地,唔知係咪我推得太快,有啲風,風中夾雜住一陣又一陣嘅味…

我喺路途上忍唔住問佢:「先生,你係咪放屁呀?我喺你後面食正風位喎」

佢冇出聲。

目的地就在眼前,我:「到啦,你快啲去廁所啦」

佢掩住屁股離開後,我推住輪椅返診所…望見坐位上有股濕氣…

肚屙真係好辛苦,我明㗎~

診所職場事 寶豬趣聞 牙醫 珍寶豬
診所職場事 寶豬趣聞 牙醫 珍寶豬

診所職場事 【寶豬趣聞】 青春期

診所職場事 寶豬趣聞 青春期 珍寶豬
診所職場事 寶豬趣聞 青春期 珍寶豬

延伸閱讀:

90後創超市格價App 三個月吸逾兩萬用戶登記|慳D啦|創業個案|Startup

關注我們Facebook專頁
    相關新聞
      更多瀏覽