家燕開騷預告男友會捧場
2018年10月02日03:00
家燕姐承認跟男友相戀10幾年,但不會再婚。

【星島日報報道】薛家燕爆出姊弟戀,與男友拍拖逾10年;前晚她與吳業坤(坤哥)和JW等為無線節目《流行經典50年》錄影時,其戀情亦成為焦點話題。

家燕姐承認跟男友相戀10幾年,但就表示不會再婚,因為年紀大,並指12月演唱會後會抽時間陪家人和喜歡的人。她說:「人生要有啲空間,其實有啲內疚。今年聖誕節會去旅行開心吓,原本想去歐洲,但女兒石佑珊話可能好多地方唔開同好凍,所以再度過另一啲地方。」當提議她不如去拉斯維加斯閃婚,家燕姐說:「可以順便登台,我又諗工作添!我唔知,唔知發展成點,最緊要兩個人開心。」對於子女很支持拍拖,她坦言子女初時擔心,因為男友年紀細過她,但子女後來發覺對方幾好,所以也放心,又指男友未曾結過婚。談到男友有何招數打動她,她笑言自己為人好大懵,如遇到不開心或勞氣事情,男友會分析事情,反而相比她更成熟。問到男友是否好浪漫?她說:「每年我生日佢都記得,仲會一個月前安排又成日提,但佢生日我唔記得。」問到演唱會可會公開介紹男友?她表示會叫男友睇騷,但希望低調一點。

談到於社交網站大爆何超蓮曾經是吳業坤的夢中情人,JW笑言超蓮是好多人的夢中情人,但現在吳業坤視她為夢中情人,不過她經常跟坤哥閒聊。問到坤哥可有叫過她介紹女生認識?JW說:「佢有叫過!我哋成日講啲無聊野,但他條件咁好,要就應該有。」對於家燕姐承認跟圈外男友相戀10幾年,坤哥即表現錯愕,他說:「係咩?真㗎!恭喜佢!我覺得晴天霹靂,戥佢高興。」

關注我們Facebook專頁
    相關新聞
      更多瀏覽