姊弟戀收埋12年 家燕姐苦盡甘來
2018年09月29日20:12

薛家燕早前接受專訪時,自爆自己一直都有男朋友,而且呢段姊弟戀一拍就係12年,雖然感情未有公開,但係「身份」早就得到家燕姐3個仔女嘅認可!家燕姐終於苦盡甘來喇!

撰文:Joanne 圖片:新傳媒資料室、薛家燕Facebook專頁

延伸閱讀:

女童赤腳試鞋染惡菌 6個揀鞋試鞋小貼士

【親子好去處】免費任玩「水+沙+滑梯」屯門公園共融遊樂場 即將啟用

秘戀12年 兩度求婚

家燕姐同前夫有過一段11年婚姻,前夫一走了之後,就也已經獨自撫養3名子女,如今仔大女大,連奶奶都埋喇!日前家燕姐喺接受訪問時自爆,原來佢同一個比佢年輕十幾年嘅商人,已經秘密拍拖12年,而且對方仲曾經兩度求婚,但係都被家燕姐所拒絕!

家姐姐喺訪問中透露,對方係一個喺上海創業嘅商人,兩人係透過朋友介紹認識,好傾得埋,完全冇因為年齡問題而出現障礙。男友曾經兩次求婚,但係家燕姐一直都未有答應,一來係兩人年齡有差距(家燕姐今年68歲),二來係因為上一段婚姻,仍然對家燕姐留有好大嘅陰影。

而大女珊珊亦都表明,三姊弟都好支持家燕姐呢段感情,以前見到媽咪有人追,都會擔心對方唔知係咪對媽咪有咩目的,但係經過12年嘅觀察,深深感受到對方對媽咪好好,好細心。但係因為對方唔係圈中人,所以家燕姐會繼續保持低調,好好保護呢段感情。

薛家燕入行60年,但係佢嘅夢想唔係事業,而係家庭。家燕姐話自己係一個好傳統嘅女人,婚姻對女人嚟講係好重要,只是諗唔到會遇上婚姻觸礁

萬千寵愛到婚姻觸礁

8歲入行做童星,你係點入行?

薛:我阿爺擺大壽,我負責表演折子戲,當時有製片想開《七兒八女九狀詞》,睇到我演出,搵我演其中一個角色,我就入咗行嘞。跟住好多人請我拍戲,但我爸爸唔畀,佢覺得做戲子唔正當,想我讀書,但我媽咪覺得我好有天份,入到廠就識做戲、要喊就喊,嘈到去我阿爺度,我阿爺對八字有研究,佢一睇話我八字啱做呢行,將會名揚四海,就叫我爸爸栽培我,我朝早五點上堂學跳舞、學戲,之後先返學,放學做完功課,又學其他演戲嘅嘢。

明年入行60年:「睇唔出我咁大年紀哩,我8歲入行嘞!」

咁細個流連片場開工賺錢,你童年係開心定唔開心?

薛:我童年係好開心,屋企環境又好,又唔係忙得好交關,因為我唔係拍好多戲,一到考試爸爸就唔接戲,所以我係比陳寶珠、馮寶寶接少好多戲,開心因為我鍾意吖嘛,就算拍天光我照返學,因為驚唔返學我爸爸唔畀我拍,學識咗上堂點瞓覺,就係隻手郁、好似寫緊字,其實係恰緊眼瞓。

你係七公主之一,應該好多公子哥兒追求?

薛:係呀,但嗰時我媽咪成日跟住,好難有人埋到身。去party,男同學想請我跳舞,一望到我媽咪就轉身。我爸爸都係,佢五個女,屋企接到電話,只要係男仔打嚟,就話:「唔喺度。」我覺得都幾阻礙。

你婚姻觸礁復出,但賺多過婚前二千倍都唔止,觀眾又有福,大家都開心!你當時經歷姻觸礁,心情係點?點樣捱過?

我好傳統嘅,我覺得婚姻對女人嚟講係好重要,所以當我結婚,我退出幕前,要相夫教子,為佢生兒育女,我34歲至結婚,算遲婚,所以婚後即刻生小朋友傳宗接代,我唔要事業,為我先生嘅事業做所有嘢,但人算不如天算,唔係每個人都咁好彩,遇到真係咁愛你嘅人、或者咁守本份嘅人,我嗰時真係好唔好彩,跌咗落低谷,咁點算呢?我最愛嘅人竟然唔愛我,嗰種慘法係講唔出,尤其是我自細得到萬千寵愛,我行出嚟,個個都話:「我好鍾意你!」但我最愛嘅人竟然唔要我,我先生走咗三年,嗰種失望,成日問「點解?唔要我都要三個仔女吖!」

相片截自薛家燕Facebook專頁。

遇上「好姨」 改變一生

我記得我由120磅瘦到得90磅,企起身條褲係即刻跌落嚟,嗰時覺得三個仔女係包袱,因為養大佢哋真係唔簡單,嗰時佢哋五歲、七歲同九歲,後來見到三個細路哥真係唔捨得,佢哋都好乖,我冇理由就咁走咗去,都要諗辦法養大佢哋,咁啱無綫搵我拍《真情》,話「好姨」個角色搵咗成年幾,覺得我好啱做,但酬勞好少,所以我推咗,我覺得我出嚟拍,得咁少錢,但又冇時間照顧三個小朋友,點知嗰日我去惠天賜同斑斑結婚,見到黎小田,我同佢真係好有淵源,佢話:「你離婚呀?早啲嫁畀我吖嘛!」我話:「你唔係依家嚟講呢啲嘢吖嘛!」佢問我有咩幫手,我同佢講無綫搵我拍《真情》,不過錢唔多、我推咗,佢問:「點解你唔搵陳冠明?」陳冠明係當年《家燕與小田》嘅資料搜集,但當時升到去綫電視藝員科經理,點知講講下,陳冠明行過嚟,小田話:「你做咩恰家燕姐,畀咁少錢嗌佢拍劇!」

相片截自薛家燕Facebook專頁。

一人捱大三子女

陳冠明唔知咩事,返去問珍姐(戲劇部主管曾勵珍),珍姐就話:「佢冇話錢少,佢話唔拍咋嘛!」之後請我入無綫傾,開個銀碼畀我,我一睇,話諗下,佢哋話:「黎明都係呢個價嘞!」仲話我著件花衫、戴個襟花已經似十足當年內地嚟嘅人,不作他人選,我就做咗「好姨」嘞,真係諗唔到,拍咗兩個禮拜,套劇出街,我個Call機響唔停,搵我登台、拍廣告,嗰時忙到飛起,但機會難得,嗰時開始每日瞓兩、三個鐘,因為我冇司機,自己揸車,返到屋企睇仔女功課、再要睇劇本,第朝一早又開車開工。我嗰時搞到自己好忙,譬如中秋節,有三度請我,我三度都接,因為我驚去少一度,又唔見咗(口舊)錢,起碼經濟上安穩,唔使擔心冇錢供小朋友讀書。

額上的癦,是家燕姐的標記,「冇諗過脫,我阿媽同我問過,話係盞燈嚟;最近李居明大師話:『對你婚姻有影響,但對事業有幫助。』依家婚姻對我唔係咁緊要嘞,我都冇諗到呢個年紀要再嫁,哈哈哈!無謂分我身家。哈哈哈!」

你最強勁試過連踩幾多個鐘?

薛:最耐試過四、五日冇瞓覺,我日瞓四個鐘唔係一年,係好多年,我由《真情》到《皆大歡喜》,日日拍,仲要登台、做event,拍廣告、顧屋企,小朋友學校有咩活動,我全部都去,我唔想畀佢哋感覺冇人back up。

《真情》好姨一角令家燕姐自強翻生,但原來多年來她忙得未有時間看自己的作品:「好多都冇睇過,係依家《皆大歡喜》重播至有機會睇下。」

你大女成日擔心你捱壞身體!

薛:我係辛苦,但我enjoy過程,我入到廠,咩都唔記得,一做戲,好有滿足感,尤其有場戲做得好嘅時候,even做電台,我咁鍾意講嘢,難得你畀個咪我,仲要畀錢我,去邊度搵?我又鍾意唱歌、扮靚,呢行好啱我做。

家燕姐更親自出馬,邀來昔日七公主的馮素波和沈芝華在新劇客串,家燕姐透露一直以來,都有不少娛樂商想拉攏七公主合體做騷,但大家各有各忙,未知有否機會。

大女冇同王梓軒拍拖

你見證仔仔耀庭求婚,心情點?滿意新抱?

薛:我好開心,我個仔識呢個女朋友兩年幾,我第一次見已經好鍾意,有幾次我哋出外,我哋都邀請佢一齊去,佢好得體、好有禮貌,有樣嘢好緊要,佢好錫我個仔,同埋佢唔係奢侈嘅人,佢好細心,久唔久煲湯叫我個仔攞畀我,好體貼,見到阿仔遇到意中人,我好開心,但我有排忙嘞,要幫手參與安排。過兩日見親家,我心情都好興奮。

「最近我個仔宣布結婚,幾多朋友發訊息恭喜我、戥我高興,因為佢哋睇住我帶大三個。」她又一再強調大女非跟王梓軒拍拖。大女祐珊 次子耀庭 幼女耀珠

大女祐珊係咪如外傳同王梓軒拍拖?你對佢婚事急唔急?

薛:其實急,所以我同啲傳媒講,如果佢唔係同王梓軒就唔好再寫嘞,因為妨礙㗎,有男仔想追,以為佢同王梓軒,咪望而卻步?佢兩個真係唔係拍拖,佢哋成日一齊,因為工作嘛!

相片截自薛家燕Facebook專頁。

有冇催大女結婚?

薛:有,我叫佢唔好咁忙,畀啲時間尋求Mr. Right,佢答我:「遇到就遇到㗎嘞!」不過佢真係好忙。你記得幫我寫佢唔係同王梓軒拍拖,畀個機會珊珊。

欣賞Celine

賺到錢,你將啲錢投資?

薛:我買磚頭,我覺得買物業最穩陣,股票、基金要跟得好緊貼、要了解市場,有失有得,但買物業,因為香港人多地方少,升值嘅能力係高,所以我買物業,亦都因為咁儲到錢。同埋我個人唔大使,你見慣嗰啲名牌,喺我身上搵唔到,哈哈哈!

外傳你每個仔女都送間樓!

薛:我儲到錢,買物業,當然唔係買一間,既然第日都係畀佢哋,不如分好佢,我2009年已經寫好平安紙,嗰時係沈殿霞提我嘅,因為佢入院做手術,佢唔知要住成個月,乜嘢都冇準備,連銀行過戶嘅錢都冇,要去簽名攞錢,佢同我講:「有啲嘢好難講,一定要做定。」所以2009年我做手術割膽,我去做平安紙,將啲物業分畀三個仔女,估唔到呢幾年我原來多咗好多嘢,哈哈哈,我最近都要去補充文件,橫豎第時都係佢哋㗎嘞。

明年入行60年:「睇唔出我咁大年紀哩,我8歲入行嘞!」

買物業最犀利賺過幾多錢?有冇試過損手?

薛:有,我嗰時買過縮水舖,嗰時好慘呀,得嗰幾十萬積蓄,買嗰時間舖二百幾萬,人哋同我講好快有人接手,實賺,點知冇,嗰時月供萬幾蚊,又要養家,好吃力,後來好平賣咗出去,可以講係畀人呃。賺嘅都有,嗰時我「家燕媽媽藝術中心」係借場地上堂,上完堂啲家長學生想留多陣,都畀人趕走,我同自己講要慳啲買個地方,人哋介紹我三百幾萬買觀塘二千幾呎,依家升到千幾萬,但我買嚟唔係諗住賺錢,係想畀學生聚埋研究演戲。

「《燦爛的外母》可以講係度身訂造,講一家人面對外來衝擊點去解決困難,拍完呢部,我又抖下,唔拍咁多嘞,依家最多一年一部。」

你都算早辦教育,現時「家燕媽媽」生意點?你諗住為呢行作育英材發揚光大?

薛:坦白講,我咁嘅方法做教育就賺唔到錢嘅,但你又諗唔到買咗個物業,個物業幫我賺錢,仲賺得快過教育,哈哈哈哈!而栽培小朋友係要從細開始,到大先學已經遲,因為香港演藝學院要中五畢業先可以考,小朋友係冇途徑去學。小朋友知道自己喺呢方面有天份,係好enjoy、好開心,除此之外,我係想推行《弟子規》,裡頭教好多做人嘅道理,依家社會唔會生得多,好多家長當小朋友如珠如寶,可能疏忽咗教導,《弟子規》對人嘅品行可以好提高,推行咗一段時間,so far效果好好。一個人點叻都好,如果人際關係做得唔好,都係有缺口,但如果你嘅人際關係好,你有少少差錯,大家都會扶你一把,以我咁多年人生經驗,我覺得呢樣嘢係值得去發揚光大。

家燕姐指她主持《流行經典50年》的衫都是從歐洲訂來,笑言:「不過係大碼咋嘛!」

我覺得你一句說話K.O.咗Celine爸爸(《全美一叮》摘Golden Buzzer及直入半準決賽的9歲香港小巨肺譚芷昀Celine的父親),好犀利!

薛:我欣賞Celine嘅,佢係好有天份嘅小朋友,佢上堂好乖、學嘢好快,至於佢爸爸,佢最近都做咗應該做嘅嘢(道歉及捐款予慈善機構),我唔再計較以前嘅嘢,最緊要佢識得點去培育Celine,等佢為我哋香港人爭光。如果佢有醒悟,可能會覺得全靠家燕姐提一提,因為佢嘅所作所為,對個女嘅影響係好大。

多謝網民畀面

網民好鍾意將你個樣萬能key,你有冇睇過?

薛:我有,因為我好多好激昂嘅表情,可以key好多嘢,都冇乜所謂啦,令人睇到開心笑,我覺得都係榮幸。

家燕姐表情豐富,是網友萬能key改圖的熱門對象。

呢個階段算唔算苦盡甘來?

薛:應該OK嘅,哈哈!

係咪永不言休?

薛:今次拍完個劇,我有啲提自己,可能年紀大咗,日夜日夜咁拍好傷,我記性好好,但依家有啲嘢都記唔到,同埋依家拍嘢係高清,皮膚會乾,影出嚟驚唔靚,所以要減少啲、唔好咁密。

延伸閱讀:

【親子旅遊】曼谷兒童探索博物館 五大玩樂設施免費任玩

關注我們Facebook專頁
    相關新聞
      更多瀏覽