恨生兩個鎖定名校網慳家謙謙送樓獎楊怡

2018年09月07日18:34

16年10月，楊怡與羅仲謙姊弟戀開花結果，在香港舉行婚禮，當時血氣方剛的謙謙揚言想三年抱兩，下個月便結婚兩周年，楊怡又剛踏入39歲，係時候快馬加鞭喇！為遷就長期在國內搵食的謙謙，楊怡不時移船就磡北上探班兼就時間造人，最近雙雙留港休養，恨做媽咪的楊怡希望今年一擊即中，謙謙亦好配合，日日操肌養精做個好腰好腎好男人。

家庭計劃，男人有責，平時甚為慳家的謙謙，這幾年在國內愈撈愈掂，賺夠人仔準備在港買樓獎楊怡，仲鎖定九龍城名校網區，為仔女第時讀書做好準備。謙謙出錢又出力，難怪楊怡完全冇後顧之憂，可以印印腳等生B啦！

撰文：東方新地｜圖片：新傳媒圖片庫、楊怡IG、羅仲謙IG

楊怡放輕鬆再衝刺

楊怡16年嫁給細她五年的羅仲謙，同年約滿亦決定離開無綫向外闖，一心結婚生仔退下火線的她，這兩年選擇性地工作，去年只拍了一部無綫劇《再創世紀》，煞科即宣布停工調理身體，作好準備生B，今年不是北上陪老公開工，就是周遊列國好梳乎。每次現身公開場合，楊怡都被追問幾時有好消息宣布，年屆39歲的她口說順其自然，但已是高齡產婦的她怎會不心急，月前謙謙完成手頭上內地所有工作，即急急返港陪老婆。

楊怡羅仲謙 — 楊怡與謙謙拍拖六年結婚兩年，婚後感情有增無減，曾揚言想三年抱兩，不過因工作聚少離多未能好好配合。

據知情者透露：「雖然阿怡呢兩年成日飛國內陪謙謙，但始終開緊工會好攰，舟車勞頓再加上有壓力，所以一直都未成功。女人40歲後就更加難成孕，所以阿怡一直有睇中醫調理身體，鍾意飲番兩杯嘅佢依家出嚟食飯仲滴酒不沾，早睡早起又做運動，今年盡量唔接嘢做，想放慢心情同腳步，希望喺冇壓力下成事，而謙謙亦應承阿怡拍完兩部戲就停工，呢幾個月留喺香港，佢哋咁努力，相信好快就有好消息啦！」

謙謙家庭觀念甚重，當日在婚禮上表示想與楊怡生個女，然後再追多個仔湊個「好」字，他深知生兒育女責任甚大，早已有了全盤計劃，現在與楊怡及岳母租住大埔比華利山的謙謙，現時目標是買樓送楊怡。知情人爆料：「謙謙向來都唔會亂使錢，佢將近年賺嘅錢滾大，一有機會就上車買層樓寫老婆名，佢覺得女人生仔其實犧牲好大，所以佢好錫媽咪同老婆。阿怡同佢拍拖初期，謙謙仲未紅亦未賺到錢，但阿怡都肯同佢一齊捱，所以佢話過搵到錢要畀最好嘅嘢老婆同仔女，仲諗定小朋友第時讀書要搵學校，會主攻九龍城41校網附近嘅樓，即係九龍塘附近，喇沙同瑪利諾都喺嗰區，生女生仔都冇問題喎！」

楊怡

幸福漏口風

婚後有謙謙錫到燶的楊怡，上周二(8月28日)出席新劇宣傳被指因為生日及有劇上而「雙喜臨門」，再加上老公謙謙34歲生日兼生B就會是「大四喜」？她聞言笑說：「承你貴言啦！我依家好fit，順其自然啦！」問到謙謙送甚麼生日禮物？她笑說：「我成日叫佢儲錢買層樓寫我個名，佢就會話『唔使送啦，唔需要慶祝一剎那，我哋係細水長流！』買樓可以要嚟投資，我唔會嫌多，我都想有驚喜！」幸福滿瀉的楊怡，看來已急不及待想與大家分享開心事。