[BEAUTY] 免整容15分鐘即有網紅鼻!實試大熱抖音假鼻套裝
2018年08月21日21:00
0
0

前排碌Facebook睇到啲抖音卸妝合集,個個囡囡都拎支針插落個鼻樑度,第一次睇真係嚇到編輯個心離一離,細心啲睇原來係「了」咗舊嘢出嚟,好彩原來個鼻係假嘅姐!極具冒險精神嘅C編同M編就做勇士,幫大家試下呢套抖音假鼻套裝係咪真係咁使得!

寶貝詳情

呢套抖音假鼻套裝係喺淘寶度淘返嚟,15g嘅五件套包含酒精膠、鼻泥、調刀、延展油同封閉油,價值RMB98,聲稱可以用5次,仲有教學可以畀你跟住做。編輯們之前都冇用過類似嘅產品,睇完一次教學就即刻試用喇〜

買家秀

首先要喺鼻度搽上酒精膠,等啲膠水可以幫手黐實啲鼻泥,唔會咁容易甩落嚟。

之後就要開鼻泥!原來呢啲鼻泥其實係舞台/特效化妝用嘅膚膠嚟,碰唔係啲咩新嘢,只係拎咗嚟日常咁用姐〜要注意嘅係呢啲鼻泥未開之前係超級硬,要挖出嚟之後不停搞匀佢先會變軟同黏。

另一個重點係調色,因為如果鼻泥同本身膚色差太遠嘅話就算上咗粉底都救你唔到,好明顯會見到有舊唔同色嘅嘢黐住喺個鼻度,所以加果想調色要買多隻淺色啲嘅鼻泥去慢慢調色。

軟化咗舊膠之後就可以喺卡紙上塑型,如果想整高鼻樑可以先堆一個長條形,再成舊刮落嚟黐喺個鼻樑度 (btw呢個時候啲酒精膠好大機會已經乾咗,所以其實編輯都建議開咗鼻膠先搽酒精膠),再用調刀調整形狀。

調整好形狀之後就可以用喺鼻泥上搽上延展油,再用手將唔平滑嘅表面慢慢抹到好似皮膚表面咁平滑,做最後嘅微調。

完成造型之後用封閉油定型,記得唔好搽太多,如果唔係會白咗一撻。最後上埋粉底就完成喇〜

寶貝評論

如果有修Art嘅朋友應該會幾易上手又整得好睇,因為整假鼻嘅感覺就好似整雕塑咁,不停批下批下、抆下抆下咁,但手冇咁靈巧嘅都係學下點打鼻影會比較好。

另外就係整完之後記得唔好太大表情,如果唔係舊假鼻就會有坑紋同黐唔實個鼻。如果你問自唔自然,編輯就覺得平日用就應該會覺得假到爆炸,但上鏡唔係超Close Up嘅話就都唔太覺係假嘅〜

這篇文章 [BEAUTY] 免整容15分鐘即有網紅鼻!實試大熱抖音假鼻套裝

關注我們Facebook專頁
    相關新聞
      更多瀏覽