曾志偉默認被無線封殺
2018年08月20日03:00
曾志偉笑言世界難撈。

【星島日報報道】早前有報道指曾志偉因「港姐西貢論」被無線封殺。前晚志偉為到活動擔任嘉賓並首度回應,更主動建議記者直入主題。志偉借力打力,令到整個訪問都笑聲不斷。他笑說:「TVB又唔係真係無得做嘅,2035年啦,等佢換晒啲人先!」

前晚曾志偉現身「香港人撐香港品牌」3周年活動擔任嘉賓。無線娛樂新聞台亦有派出採訪隊伍到場,而主播王鎮泉沒有問及有關被封殺一事。

問到志偉何以曬得一身古銅膚色?志偉笑說:「入正題啦!唔好講埋啲無謂野喇!(真係想知你做乜咁黑。)周圍搵野做囉,畀人封殺,唔使搵野做咩!世界難撈,唔係想做就有得做。」問到可有求證是否被封殺?他笑說:「我信報道嘅,唔知啊,不過(TVB)就係無搵我。」提到ViuTV及亞視搶着邀請他幫手,志偉笑說:「報道嚟啫!我仲係求緊職。」

提到不少市民留言支持他繼續擔任港姐司儀,志偉笑說:「唔係想做就做,不過係想做好嘅節目觀眾睇。(叻哥話你阻住晒啊!)所以咪畀佢做囉。我出於好意,今年真係諗過返去做,不過可能Format唔同咗,所以無搵我。(即係從來無搵你?)係,都無叫我去澳門影相。(都戥港姐開心可以衝出香港去澳門?)梗係,好過去西貢啊!」

問到志偉認為是亮相ViuTV還是因「西貢論」被無線封殺?

志偉笑說:「累積!禍從口出。」提到亞視有意邀請他參與亞姐,他笑說:「睇吓啦!我真係有打畀何麗全,都打唔通,想問候佢同恭喜佢。佢咁多兼職,要關照吓。」提到ViuTV有類似選美節目《廣告女皇》,他笑說:「港姐都唔做,做呢啲會畀人笑。其實節目邊度做都OK,最緊要係好節目。TVB又唔係真係無得做嘅,2035年啦,等佢換晒啲人先。」

另外,談到香港品牌,劉倩婷就認為香港小姐跟慧妍雅集正正是有名氣的香港品牌。劉倩婷透露暑假都是忙於湊女,而囡囡就剛剛加入學前班,她就逼丈夫李丞責請假陪囡囡開學。她笑說:「畀咗兩條尿片佢、叫佢試吓湊女。囡囡都好黐爹哋,會樹熊抱抱爹哋。」

談到暑假可會出外旅行,劉倩婷說:「都唔會出去,或者籌備吓老公嘅生日驚喜。都係一齊出海,因為我同囡囡都鍾意游水,佢就歎住紅酒用望遠鏡睇住我哋,好似救生員咁,不過有咩事就叫人。」

關注我們Facebook專頁
    相關新聞
      更多瀏覽