【西貢短線行山!麻籃笏白馬咀靚海景!】
2018年08月09日23:39

[駐場博客: 小牛牛快樂行山郊遊相集by Chan Keung]最近呢幾次行山,上到山頂都行雷閃電,或者突然落大雨,真係難觸摸。唯有揀啲矮山,又撤退較容易嘅山徑行吓啦。今次介紹一條矮山路線比大家~麻籃笏和白馬咀。

到達獅子會自然教育中心落車後,過對面馬路直入, 呢度有好多設施,不過今次唔介紹住, 一直沿蕉坑自然教育徑上, 初段係石屎路,之後經過幾間村屋之後,就進入泥路山徑,走到第一個分叉路線位,可以選擇落去三星灣,不過今次安排短程快閃,所以冇去到,直接去麻籃笏,經過三星漁排,發現好多人在漁排上唱歌,燒烤,仲有水上滑梯,原來現在啲漁排已改變為多用途場所,小編真係孤陋寡聞呢。好快到達了麻籃笏石灘邊,打算綑邊去白馬咀,但係綑咗一段路之後,發現啲岩石邊越來越難行,崎嶇,仲周不時有大浪湧至,所以中途唯有折返,改經大岩口其中一條穿林隱徑前往白馬咀,呢段路經,可能歷過連場大雨沖洗,變得滿佈泥濘,惡蚊多到嘔,仲有超多黑色巨型大蜘蛛,行前面真係無乜著數,小編親吻了幾隻大黒蜘蛛。在叢林𥚃穿穿插插足一個多小時後,卒之去到白馬咀,呢度係海邊,西貢區南端,比較空曠,刮起狂風時,大風到有啲企唔穩,近岸邊又倦起大浪,真係不宜走近,不過風景一流,來到呢度都拿起手機不停哋打卡。拍過夠之後,由另一條明顯山徑折返獅子會自然教育中心,完成今次行程。

▲獅子會自然教育中心起步

▲獅子會自然教育中心内部有多個設施,不過今次暫時不介紹住

▲轉入去蕉坑自然教育徑之後,初段石屎路,之後進入泥路山徑

▲途中見到有棵樹,樹身漏滴樹脂,行山時都周不時遇見

▲山徑上落坡幅不大,易行

▲到達分叉路口,此路段可以落三星灣泳灣

▲三星釣魚埸碼頭

▲到達麻籃笏常試從石灘綑邊往白馬咀

▲初段石灘路不太困難,風平浪静

▲接著突然刮起大風,加上潮漲,卷起大浪要立即撤退!

▲改為行山徑前往白馬咀

▲經過ㄧ段被山火焚燒過的路徑

▲到達今次目的地~白馬咀

▲近岸邊刮起狂風 週不時都企唔穩

▲ 切勿走近岸邊,狅風加上大浪,必須要小心

▲白馬咀風景優美,旅遊打卡熱點

▲白馬咀位予西貢南端

▲觀賞完白馬咀可以沿另一平緩山徑捷返獅子山會自然教育中心

路線: 獅子會自然教育中心蕉坑自然教育徑麻籃笏三星魚排大岩口白馬咀康富路獅子會自然教育中心 全程來回共7.5公里

交通: 彩虹坐1A小巴往西貢,獅子會自然教育中心落車

注意事項:

麻籃笏,大岩口 蚊患嚴重,請做足防蚊措施

白馬咀近海邊比較空曠,常刮起狅風,風急浪大,切勿走石灘旁邊,注意安全

愛護郊野清潔人人有責自己垃圾自己帶走

文字/圖片來源 :小牛牛快樂行山郊遊相集by Chan Keung

小牛牛快樂行山郊遊相集by Chan Keung

======================================================================

相關文章:

【大澳虎山超靚景!眺望港珠澳大橋+南中國海!】

【#香港三尖之一!完美海景釣魚翁】

關注我們Facebook專頁
    相關新聞
      更多瀏覽