資優連跳兩級!陳浩民大女 6歲半讀三年級
2018年07月17日12:46

要數圈中多仔公,陳浩民封王,佢同太太蔣麗莎Lisa結婚五年,育有3女1仔,現在凡事以四個仔女為先,陳浩民夫婦學「孟母三遷」,早年由港島東區搬去紅磡過千呎單位,去年中再搬去傳統豪宅地段何文田半山壹號一個天台泳池屋,愈住愈豪,皆因全家都鍾意游水,而且又想近仔女返學!

昨日蔣麗莎喺微博上載咗大女陳雅薷嘅畢業照,並留言話囡囡9月就入讀小三,不過大女年僅6歲半,正常情況下應該嚟緊係入讀小一,原來佢成績好一跳就跳兩級,真係叻叻豬呀⋯

撰文:東方新地| 圖片:陳浩民微博蔣麗莎微博、蔣麗莎IG、新傳媒圖片

延伸閱讀:

鄺潔楹自爆被外國男嚇怕 曾因一句話嚇至花容失色!

陀B後即返加拿大安胎!李亞男孖鍾嘉欣晒孕肚

陳浩民大女 6歲半讀三年班

陳浩民太太蔣麗莎話大女幼稚園畢業照,有一種好似即將送囡囡出國留學嘅不捨感覺!不過有心水清網民問點解唔係讀小一,蔣麗莎就回應網民囡囡係跳咗兩級,而且唔係7歲,而係6歲半,犀利呀!

陳浩民
陳浩民

去年成績表全部「表現優異」

蔣麗莎去年喺微博上載大女嘅成績表,見佢科科都剔咗星星嗰欄,代表佢「表現優異」,蔣麗莎梗係最開心,仲話屋企有個「學霸」:「想不到陳家出了一個『學霸』為你感到驕傲~戒驕戒傲,繼續保持! ​​​​」

大女一轉眼咁大個,真係亭亭玉立!小編都相信好多家長好想知佢哋屋企教子女方法,點樣可以培育出咁叻嘅小朋友呀!

大女做小助手 陪媽媽出埠拍戲

大女年紀小小但好乖女又幫得手,今年6月蔣麗莎返內地長沙拍戲,就帶雅薷跟身充當小助手,囡囡幫媽咪手推行李拎嘢,蔣麗莎都忍唔住大讚佢!

蔣麗莎 教子有方

其實陳浩民經常留國內拍戲,湊仔女嘅重任當然交畀太太啦!睇番蔣麗莎嘅微博,都見佢平日親力親為湊仔女,甚少旨意工人姐姐,加上見佢經常一拖四帶小朋友周圍去都絕對冇難度,就知佢管教小朋友有一手!

陳浩民夫婦仲話想追多一個小朋友⋯

陳浩民 月租10萬天池屋

陳浩民與太太Lisa蔣麗莎五年抱四,早年已在國內崛起的浩民愈生愈旺,愈旺愈生,去年中全家由紅磡過千呎複式單位,進駐月租10萬的何文田半山壹號的天台特色泳池屋,事關間屋絕對可以滿足全家嘅需要。因為一來方便仔女在九龍塘返學,更重要的是四個子女都熱愛游水,近日天氣開始炎熱,Lisa就同仔女上天台游水,仲拍片影相放上社交平台開心share⋯⋯

陳浩民
陳浩民
近日天氣開始炎熱,陳浩民老婆Lisa就同仔女又再出動,齊齊上天台游水,仲拍片影相放上社交平台開心share⋯⋯

陳浩民成日留在大陸拍戲開工,但太太同四個仔女都不愁寂寞,因為留喺屋企都大把娛樂,近日佢哋就上天台做至愛嘅活動 — 游水!

無敵天池屋

屋內的實用面積有千六呎左右,未計天台及泳池,坐落山上居高臨下私隱度非常高,10萬月租對今時今日的陳浩民來說濕濕碎,仔女老婆住得舒適最緊要。

蔣麗莎:全家都鍾意游水

Lisa話搬呢個單位係有原因:「我哋依家住嘅係樓頂特色單位,有自家泳池,原因係我哋全家都比較喜歡游泳,我大肚8個月時,每週都游3次。再加上依家小朋友主要讀書範圍喺九龍塘,為咗佢哋每日有多啲時間睡覺,所以特意安排離學校近啲嘅地方住。」

天台景靚到咁,Lisa不時當布景板係咁影靚相!

老公辛苦搵錢養家,老婆負責照顧小朋友睇住頭家,Lisa連生四胎身材仍然弗到漏,搬大屋後隨時開工等生第五胎。

單位享開揚景致

仲可以BBQ

除咗游水,仲夠位喺游泳側邊燒烤,真係足不出戶都冇問題!

陳浩民在國內開工的日子,Lisa全副精神照顧孩子,有空又會同子女夜晚上天台BBQ,甚至坐喺池邊食住甜品睇夜景,好溫馨!

睇完天台,唔少得睇埋室內,單位分上下兩層。下層客廳同飯廳好闊落,用落地玻璃窗,樓底又高。客廳的櫃放滿許多家庭照,好溫馨!

養一家六口(未計照顧小朋友的外傭姐姐),少個崩都唔得,陳浩民近年在國內密密做冇停手,Lisa就負責留港照顧小朋友,見她湊仔女絕不假手於人,接送大女與二仔返學放學再加課外活動,還有照顧仍未入學的三女與細女,Lisa這個萬能鐵人媽咪認真唔易做。

客廳夠大,幾個小朋友坐喺地玩具一啲都唔逼!

樓底高又用落地玻璃,夠晒光猛,放巨型聖誕節都唔會有壓迫感!

而下層都有長長的露台,最愛種植的Lisa放滿鮮花及盆栽,小朋友會幫手整植物盆景同淋水!

露台夠寬,具豪宅氣派。

囡囡都會幫手剪雜草及收割果實﹐早前就有自家種植的紅椒!

一屋都係小朋友,為照顧他們平時已勞心勞力,但陳浩民與Lisa甚懂分配時間,也會預留拍拖時間,不會冷落另一半。

陳浩民在國內搵錢速度同印銀紙一樣快,生夠一隊足球隊都冇問題啦!

親自掃家品

陳浩民一直在國內忙拍戲拍電影及宣傳,不過佢一有空都會即回港陪Lisa同四個仔女,之前佢就同太太拍拖到九龍灣Mega Box的宜家傢俬掃家品,這日只有夫婦二人,四位小朋友及外傭未有同行。二人買了大量家品,陳浩民自己做埋司機與咕哩,與Lisa合力把家品塞入七人車內,之後再去土瓜灣的平民麵店買外賣,返抵何文田半山一號時,陳浩民把車停下再借用手推車把家品推回家中。雖然住豪宅,但陳浩民夫婦的日常生活仍非常貼地,湊仔與搬屋一樣,全部親力親為。

沒有仔女在身邊團團轉,陳浩民夫婦難得有拍拖時間,二人邊行邊講笑,Lisa仲餵老公食零食,隔住個芒都覺得甜。

返家前二人去土瓜灣買外賣,Lisa去完平民粥店,再與陳浩民幫襯平民麵店,兩公婆貼地搵食,絕無架子。
陳浩民把車停在何文田半山一號的停車處後,先行去管理處借手推車,Lisa未等老公折返,自行把車廂內的物件逐一搬出,估唔到身形纖瘦的她原來力大無窮。

延伸閱讀:

《刑事偵緝檔案IV》劇情第16-17集 | 陳錦鴻背住佘詩曼冧李珊珊

關注我們Facebook專頁
    相關新聞
      更多瀏覽