26場棟篤笑開鑼!黃子華 寸盡黃藍屍、梁振英、暗角七警…
2018年07月06日22:24

「棟篤男神」黃子華嘅最後一個棟篤笑騷《黃子華棟篤笑金盆𠺘口》,今晚喺紅館開鑼,為咗趕絕黃牛,子華神一口氣開足26場,一眾粉絲熱切期待!個騷講明係十八禁,仲要只限香港,不設巡迴,題目都離不開關於香港本土,講民生,諷刺時弊……

撰文 : 東方新地 | 圖片 : 子華本部fb , 新傳媒圖片

延伸閱讀:

【2018韓國小姐】勝在夠自然!冠亞季軍逐個睇!網民:司儀比佳麗更搶鏡

黃子華最後棟篤笑今開騷 又係時候回顧金句錄

《黃子華棟篤笑金盆𠺘口》 售限量𠺘口杯

晚上七時喺紅館門外大會已有攤檔賣紀念品,就係「金盆𠺘口」杯,子華事前喺Facebook留言:「飲水又得,食飯又得,𠺘口又得,擺設又得,紀念又得,總之…..你想到就得,而最緊要,係限量㗎!」限量喎!賣100蚊,抵啦!當然仲有就係《唔黐線唔正常》嘅DVD,賣$150,逾百人排隊幫襯,十分墟冚。

這位男士買了5隻𠺘口杯!

20:11,場內廣播宣佈:黃子華棟篤笑,即將開始,將會一氣呵成兩個多小時,大家要好好準備喇。如果晏瞓爭取時間恰一陣,鍾意講野爭取時間講哂佢!

一如以往,棟篤笑開騷前,播出由1990年黃子華第一個棟篤笑開始——《娛樂圈血肉史》、《色情家庭》、《末世財神》、《棟篤笑雙打之玩無可玩》、《秋前算帳》、《唔黐線 唔正常》等歷年棟篤笑金句片段!其中《唔黐線 唔正常》畫面播出子華雞蛋高牆片段:「我哋有仁,有勇,我希望我哋都有智慧,去保護我哋自己,不容一粒雞蛋粉碎,好唔好?」全場報以熱烈掌聲,精華片段播足十幾分鐘。之後廣播繼續:請大家放低手機。不准拍攝錄影,勸身邊朋友唔好玩電腦……

論盡黃屍藍屍阿爺

千呼萬喚嘅子華神棟篤笑,終於20:25子華出場由台邊上台,全場嗌到地板都震埋,一開始子華就話要同大家講最重要嘅兩句金句:

「就係,就係……回水冇得傾!除褲冇得傾,太高清!冇錯,金盆o浪口喇,最後喇,有得嗌好嗌喇。嗌唔嗌呢,唔需要懶煽情嘅,因為都係你哋搞到我冇得做嘅啫!大家都知今時今日喺香港做個藝人係幾咁困難啦,大家對顏色嘅喜好唔同啫,冇得撈啦。『佢好鍾意黃色0架,死咗呢條屍唔要發黑,要發黃呀!黃屍嚟0架!黃屍華,冇得撈啦!佢就唔啦,佢襟撈呀,佢個人好憂鬱,好blue,變藍屍。』咁點解襟撈?有孝心,瀨阿爺吖嘛。瀨阿爺喎,仲唔係廿四孝之最?『阿爺早晨,你邊度痕?』」全場笑到肚痛!

想生存 扮色盲

「今時今日喺香港做藝人唯一生存機會係色盲,我都唔知黃同藍有咩分別, 黑同白我都唔係太清楚,彩虹我就分到,彩虹係咖啡色嘛,彩熊即係啤啤熊啫!識唱歌㗎嘛。今時今日係識唱歌嘅啤啤熊都死呀,係以前你唱歌勁就叫勁㗎啦,我叫做張國友呀,我係張國榮加張學友呀,王菲見到我因為我太勁,都要改姓,依家叫做張菲呀,我一人唱歌都未輸過,但係依家就輸俾一個,都唔知係咩人嚟㗎,爛口爛舌,佢唔係唱贏我呀,佢係喺上面唱我呀!

「梁振英係好嘢嚟嘅!」

「咁樣今時今日,我哋做一個藝人,搵食唯有咁,有老婆仔女,咁就唯有唔講嘢啦,但唔講嘢又講:『搵人仔…』乜你講到好似拐子佬咁喎,捉啲人仔當錢洗,咁所以我依家喺大陸搵嘅錢,我會同人解釋清楚,我唔係exactly係大陸搵嘅,我係過關嗰時搵嘅,我係一路過關一路唱:『做個勇敢中港人…』一地兩唱ok吖,你話一地兩唱OK,你又會冇得撈㗎喇。

「你唔生性又講一句:『梁振英係好嘢嚟嘅!』但係冇得連任,共產黨冇眼光啦,恭喜你喇,你邊度都唔使去喇,從此你嘅職業就係o浪口,人哋返工你o浪口就得喇,邊度都唔使去,依家做生意真係好困難。」

子華續說:「睇佢前面憎佢後面,唔係,係睇佢後面憎佢前面,我點知佢咩樣啫,佢睇籮友就知佢小器,兩股嘢夾實晒。喂,依家香港唔使睇喇,係聽到佢把聲,憎埋自己個friend。以前係一竹篙打一船人,依家係一竹篙打最後一隻救生艇。『你隔籬沉咗喇,唔好理啦。』『嗰度有隻救生艇喎,個個咪黃子華!』之後扮普通話講:『你還看甚麼,叫我呀,叫救命呀!』又得佢,收工,有冇咁過份呀?你知唔知依家香港,係會恭祝人哋屋企死人,撞正生日仲有歌聽。」之後子華唱恭喜你今日個仔摺埋,晚上再恐死埋老竇,年年都有今日,你晚晚都要裝香,恭喜你。』

「人哋屋企死人,你恭喜佢,你有冇人性呀?社會上群起辯論,竟然係有得辯論,因為宜家辯論嘅邏輯變咗係,『希特拉死老母應否恭喜佢?』『希特拉X家鏟應否成為公眾假期呢?』咁邊個係希特拉呢?咁就睇吓你鍾意嘢顏色,暗角7警、暗角打鑊,冇可能係啱呱?」

暗角打鑊啱定唔啱?

「呢度完全冇人敢表態?你睇吓香港幾恐佈,呢啲不嬲日日報紙,個個發晒癲,但係入到場冇人敢表態?你哋醒目,因為我影低你哋。暗角7警、暗角打鑊認為啱嘅,拍吓手?(子華再問現場觀眾 )認為唔啱嘅?」全場即有不少人拍手。

「歷代嘅忠良,係俾啲狗官迫害」

子華說:「認為啱嗰啲,官都判埋喎,點解有得坳呢?歷代嘅忠良,係俾啲狗官迫害,打人就唔啱,岳飛咪唔啱,打人所以咪死囉,但係岳飛死之前,都有幾塊金牌喎!依家真係難分真與假,呢個社會真係、吓,我喺街見到一幅對聯,你點演繹呢?佢寫住:『暗角7警執死雞、善用私刑龍咁威!』」

外母比喻佔中

「特焦(焦慮症)大爆發,你諗下喇,焦慮症崩潰,佔中嘅口號係乜嘢呀,係『用愛與和平佔領中環』,你要佔領人哋個女,你都唔可以咁樂觀啦,剩係得呢兩樣嘢,你都要約伯母出嚟飲茶,『你有咩即管問吖伯母!』,太古城,問我有冇,不如你問我有冇郭富城吖!

「我屋企有兩個figure,我有兩個呀,現金我係有嘅,不過依家月底呢……過幾日我又會再有,伯母不如你直接啲,我想同你個女結婚,我係有兩樣嘅,愛、和平。「我係唔搞嘢,你唔係咁都要考慮呀,一個人樂觀成咁,其實係一個焦慮症嘅反彈,真正嘅問題係呢個焦慮症要點醫,呢個焦慮症係點嚟㗎?呢數點計,係咪要計到鴉片戰爭咁遠?無論你點計,個問題係,香港已經大撕裂開始咗喇。點解決?唔知,因為呢啲嘢係從來未發生過。有人話,等如香港依家啲樓係咁升,冇得解決?no,香港啲樓係跌過0架嘛!幾時?沙士。所以你依家想啲樓跌好容易,你去睇樓,你拖隻穿山甲去囉。」

「左手拖隻穿山甲,右手拖隻果子狸,睇你買邊層。然後最緊要搵個示範單位,搵個風口位,隊隻雞上去。」做咗個吹pat pat動作。

「呢啲嘢發生過,我哋知點解決,香港大撕裂之前冇發生過,唔知道點解決。真係。依家,好簡單,阿強,同阿爺點解,我都唔知。阿強哥得罪咗阿爺!」

「嗱,阿強咁依家你即係當正湯唯啦阿強你係,咁你搵到你嘅梁朝偉未?『黐線,我點會搵個男人?我梗係搵個女人,西環有女人o架嘛係咪呀?』『我真係唔係好熟,應該有嘅。咁你有冇諗住佔領邊個?』『都係嗰啲囉,5尺7、8吋高、唔好過30歲,29+1頂到盡,瓜子口臉,整過容都得,但要整得實淨,你知啦,調情呢家嘢,好激烈o架嘛。』「『阿強,如果真係畀你佔領到一個喇,你可唔可以話我聽你打算點?』阿強話:『我打算點?我打算長期打算,充份利用。』」

談警員被問候

講到警察被人侮辱,子華說:「你唔會知我講乜,你唔好拍(掌)拍得咁快,可能唔係你想聽嘅嘢,點解叫『武』警?唔係武力個武,係伯母嘅母呀,因為o依家香港做警察嘅首要條件,就係願意接受人哋問候呀伯母,我係網上睇條片有個警察抄牌,嗰個被抄嘅一分鐘問候咗佢60次,我哋正常人嘅語速係一秒講4粒字,啱啱好啦,X老母……,60次(全場拍掌),一秒鐘都冇嘥,當然有啲人會話警察係抵㗎啦,各位,大家仲記唔記得有本叫《查理周刊》呢《查理周刊》當年喺法國就取笑回教徒話(晚晚)發生恐襲,被恐襲,整死好多人,全世界都憲責、教宗當然都憲責啦,但教宗同時又講:「不過你成日問候我阿媽,我都會揼你個鼻㗎,即係呢,你o依家喺香港做警察你要好脾氣過教宗,我可以想像到啊各位,o依家警察喺學堂,最重要嘅訓練係乜嘢?企喺度!立正!FXXK YOU!FXXK your mother!FXXK FXXK FXXK FXXK FXXK!」

「香港最危險嘅職業係影評人…」

「香港嘅黑社會仲有全世界最強勁嘅公關,亞洲荷里活、香港嘅電影圈,我哋唔單止10套戲有9套係講黑社會嘅,我哋10個電影老闆有5個就係幫會,你睇香港人幾引以為傲,係咪呀,威囉,我唔叫佢做黑社會我叫佢做幫會,因為好多都幫咗我嘅。其實10個裏面唔係得5個咁少㗎各位,其實10個裏面有成8個㗎,點解話得5個?因為有3個…死咗,仲係畀人打死咗,你有冇諗過你聽日唔使返工,唔係因為打風,係因為你老闆畀人打死咗,好彩冇人拍手,仲係畀對家個老闆打死咗喎,即係依家係講緊『麥當勞休息一天,因為肯德雞做咗嘢!』

「香港最危險,我認為最勇武嘅職業係乜,就係影評人,你做馬評人呀、股評人呀,就算你累死人,你好少會聽到佢哋俾人打㗎喎,點解呀?因為你落咗注,無論係股票又好,隊個冧目,一嘢就落咗去㗎喎。但係你拍戲唔同喎,你拍戲係一個漫長嘅過程呀,我要日日用把槍指住呢個小器華,指到手指都抽筋,然後指指下我個細佬又俾啃德雞啃死咗,我要當睇唔到,然後我晚晚臨瞓前,舐下個雞籮柚,卧身嚐籮,然後我千辛萬苦,腥風血雨,拍完我呢部傑作,母女風雲食鴨棍,無錯你無聽錯,唔係食夾棍,係食鴨棍,剩係呢個名都收八千萬啦,依家就俾你條四眼仔影評人,一嚟就兩句說話:『小心入場…睇完會內傷…』」

喬裝者勿去靈堂

大家都知,子華其中一句金句係「卸妝認得你叫化妝﹐卸妝唔認得你叫喬裝」呢晚佢對喬裝,再有一番說明…

「你去到靈堂,你都會見到,『靈堂範圍,面斥不雅』,咩意思呢?你係可以鞠躬,但你真係唔好太喬裝,唔係你陣間瞻仰遺容時候,你個妝仲厚過佢,咁,依家都唔知邊個死咗,係唔係?講嚟講去,面斥不雅咩意思,無非好簡單,你知㗎,大家心裡面都有把尺嘅,你知道應該係點樣做㗎,唔使講到明,係咪?成個香港好似大嘅武館咁,上面寫住『切磋武藝,面斥不雅』,即係咩意思?即係講手,唔好拆祠堂,點解呀?因為你唔係拆卸公司,你係『一代宗師』,係唔係?唔係『一代乞兒』,面斥就不雅。」

「各位,喺香港嘅黃金年代,我哋去到一個境界係可以面斥不雅,全香港大街小巷,因為我哋大家練咗香港呢套內功:Jetso得嚟賑災,王晶得嚟家衛。佢既返幫會,同時亦都返教會,大家唔係聖人,但都唔係人……渣,『全球獨家 面斥不雅』。」

圈中人紛朝聖

子華人緣極佳,睇頭場嘅圈中人勁多,包括子華神老友古巨基夫婦、黎耀祥一家三口、吳鎮宇、劉嘉玲、李嘉欣、蔡一傑、谷德昭同女友林子瑄、鄭中基、林子善夫婦、金燕玲,蘇絲黃、蘇永康夫婦、關心妍夫婦、蕭定一、鄺美雲,就連90歲嘅「仙姐」白雪仙都出山,同徒弟陳寶珠捧場。

黃子華最後棟篤笑今開騷 又係時候回顧金句錄

黃子華腦力爆煲 完騷避世 快斬1億收咪

子華神 長情才子多波折

子華母恨抱孫 孝順子華御准女友入門

延伸閱讀:

20歲男教師被「搶精黨」迷暈!4個女人強行搶精後隨即拋棄佢

關注我們Facebook專頁
    相關新聞
      更多瀏覽