謝賢自揭怒摑曾江係做戲
2018年07月05日03:00
謝賢前晚與胡楓及前妻狄波拉兩公婆,一起出席鮑魚宴。

【星島日報報道】久未受訪的謝賢(四哥),前晚出席晚宴時開心得如開籠雀,大爆2015年出手打曾江其實只是宣伎倆,事前大家已有共識,原先想由胡楓(修哥)出手,只怕他口窒窒沒人信,最終四哥代為出手後雖感到很過癮,卻被人責罵而變成陰公豬。

謝賢(四哥)、胡楓、狄波拉與老公鬍鬚Kong,前晚一起出席福臨門舉辦的「青邊鮑名人珍味宴」活動。四哥笑稱兒子霆鋒出色的廚藝可能是從他身上偷師,因為在霆鋒兒時,自己已煮了很多鮑魚給他吃。四哥又笑指霆鋒搶了自己風頭,搞到他無野做,連記者也不理睬他。

問到霆鋒可有再買物業給他收租?四哥說︰「買畀我做乜?佢唔想我搬來搬去,我同佢講,遲早我啲物業都係佢的。(買樓畀你收租嘛!)而家我無錢要使,唔知點解好少用錢,可能年紀大甚麼都有,所以很慳。霆鋒而家有咁多錢,就係唔使為我用錢。哈哈!(你要花多些錢讓霆鋒再賺多些?)我唔知點使錢,車又有,船又玩過,而家少浪費佢啲錢。(你怕霆鋒賺錢辛苦嗎?)唔理佢賺錢辛唔辛苦,我以前賺錢唔辛苦呀?」

此外,問到可想霆鋒與王菲盡快結婚?四哥稱這是霆鋒的私事,自己當然希望霆鋒開心做人,所以大家不需問他這件事。追問是否怕霆鋒責罵而不談王菲?四哥說︰「唔係!因為呢件係佢的私事,我當年也不會跟爸爸談感情事。」

四哥又坦言,現在一個人住在屋內,每日只望住個海一個人吃飯,真是很枯燥,若然有些工作找上門會開心些,他說︰「之前真的很似坐監咁陰公。」問到會否願意再做旅遊節目?四哥直言若有人邀請,甚麼工作也願意做。

至於事前是否需要篩選一下拍檔,若再找曾江同行會否接受?四哥即爆料說︰「黐線! 我哋不知幾好朋友,嗰次掌摑事件只是做戲,當然演得真到不得了。(修哥連眼鏡都飛甩?) 佢有用手按住眼鏡,佢係老戲骨好好戲,我也要學佢。 那一巴掌事前四人有溝通過, 最終是我去做,將我擺上檯,我沒所謂,很威呢!摑佢一巴很過癮,但之後人人都鬧我就真的很陰功。(你有請曾江飲茶嗎?)唔只飲茶,請佢吃雪糕讓佢塊面冷卻下來,而家爆呢件事出來也不遲,當時出盡辦法宣傳,我很無辜,是我謝老四咁蠢,本來是胡楓做,佢好醒目,因為佢說話口窒窒邊個會信佢。」

另外,對於謝賢自爆當年出手掌摑曾江只是宣傳伎倆,曾江昨日接受本報電話訪問時表示:「係咩?(為宣傳?)係啦!(重提舊事得啖笑?)係啦!我同佢無事。(依然老友?)係啦!」問到可想跟謝賢再次合作做節目?他說:「我唔知道佢喎!唔知點安排,我哋好被動嘅,如果有機會,無問題呀!」

關注我們Facebook專頁
    相關新聞
      更多瀏覽