軒仔請Kenny做嘉賓 令紅館大地震
2018年06月19日03:00
張敬軒前晚請來入行已相識的好友Boyz,擔任演唱會嘉賓。

【星島日報報道】張敬軒《Hinsideout演唱會》前晚舉行第4場,引爆台下不斷歡呼,皆因Boyz成員張智恆(Steven)、關智斌(Kenny)現身擔任表演嘉賓。軒仔和Kenny的密友傳聞成為Steven大玩對象,Kenny被Steven問到點解來做嘉賓時竟表示是來報仇,Steven乘機笑問:「隔夜嗰啲呀?昨晚嗰啲仇呀?」令全場興奮尖叫!

張敬軒前晚的第4場紅館演唱會,獲謝霆鋒、謝賢、黃秋生、鄭希怡、何超蓮、鄧萃雯與阮兆祥等捧場,更獲多年好友Boyz擔任表演嘉賓,三人上台合唱《死性不改》,令觀眾驚喜歡呼。在中段的讀白中,三人大改台詞,Steven望向Kenny問:「點解你會來做嘉賓?」Kenny大聲答:「我鍾意呀!你吹呀?」惹來觀眾尖叫聲震爆紅館有如地震。唱完歌,無論 Steven或軒仔講甚麼,觀眾都一直狂叫。兩分鐘後台下終於靜下來,軒仔笑問:「知唔知咩叫無敵嘅嘉賓?」Steven重覆問Kenny,觀眾即狂叫,Kenny大方站到軒仔身旁更攬他,博得觀眾拍爛手掌。

軒仔坦言Boyz是他初入行時相識的好友,所以決定首次紅館六場個唱一定要請二人來分享,並搞鬼地說:「既然咁耐無見,有私人恩怨想喺度解決。我聽講網上有人寫故仔話你哋兩個為咗我喺Salon打交,究竟係咪?」Kenny搶答:「你諗多咗啦!張生,我哋兩個成日打交,每次打完,Mani(經理人霍汶希)就會打來話打還打,唔好打面,話晒靠個樣搵食。」此時,軒仔問Steven何以不作聲,Steven即插嘴:「我見你哋咁耐無見,比你講埋先!」惹得台下不斷大叫「咀佢!咀佢!」

其後,軒仔認真表示要答謝Steven特意從橫店趕回來做嘉賓,Steven即坦言自己可在這個圈繼續生存是多得軒仔一路以來的幫忙。正經話講完後,Steven又繼續玩軒仔,反問他:「我想問你做咩多謝我,唔多謝佢(Kenny)?」軒仔回應:「我點會唔多謝佢,我仲要恭喜佢做咗業主。」然後Steven連Kenny都玩:「你仲未講點解會嚟做嘉賓?」Kenny竟表示:「我嚟報仇呀!」被Steven再追問:「報咩仇?隔夜個啲?昨晚嗰啲仇呀?」惹來台下一片大笑兼大叫,軒仔見Kenny招架不來便幫口:「喂!我哋下午綵排啲稿唔係咁喎!」

關注我們Facebook專頁
    相關新聞
      更多瀏覽