【美女廚房】首集負評如潮!Bob:我哋有開會檢視
2018年06月03日07:00

事隔十二年《美女廚房》再次回歸,不過主持就由鄭中基、方力申同梁漢文,換咗做阿 Bob、蕭正楠同張振朗。未播出街之前大家都已經起勢「負皮」.事關大家都唔睇好今次主持組合。

Bob喺節目出街前已經「打定底」,佢喺微博話:「可能,你會覺得今晚嗰集冇乜驚喜,可能,你會覺得今晚嗰集冇乜笑點,可能,你會覺得同上一輯有啲落差。必須承認,第一集大家都有d拘緊,默契亦有待改善,好多地方要改進。衷心希望大家可以俾多少少時間我哋,請放心,之後嘅集數一定會越做越好。」

至於出街之後,當然非常符合大家預期:負評如潮!「King Jer」就幫大家做咗個總結:「今晚終於就播咗第一集,意料之內:網上一地負評,多到不能盡錄。唯一嘅好評,就係成集好彩有農夫 carry,同埋龔嘉欣嘅廚藝唔錯。」

Bob 睇完之後有回應,佢話:「其實拍攝完第一集之後,我哋都有去開會去檢視,無論台前定幕後嘅表現,大家都覺得有好大嘅進步空間,亦好認真去檢討如何改善。」

Bob 又話,會汲取各位觀眾同網友們嘅意見:「努力去再做好個節目,希望之後嘅集數令大家有驚喜,令大家睇得開心,再次感謝每一位朋友」

面對觀眾當然係好,希望嚟緊嗰幾集,大家真係會見到進步啦!

關注我們Facebook專頁
    相關新聞
      更多瀏覽