阿Sa獲阿嬌送花球 公然被催婚
2018年05月27日03:00
多年好拍檔阿嬌出嫁,令阿Sa感慨萬千。

【星島日報報道】鍾欣潼(阿嬌)與賴弘國(Michael)昨日凌晨於洛杉磯舉行婚禮,與阿嬌組成Twins達17年的好姐妹蔡卓妍(阿Sa)又喊又笑,興奮又激動,獲新娘子直接送贈花球,公然向她催婚。而阿Sa則反過來催阿嬌快生B,果然是好姐妹,幸福都要一起分享!

鍾欣潼(阿嬌)、蔡卓妍(阿Sa)、容祖兒(Joey)與鄭希怡(Yumiko)同屬英皇娛樂旗下,一同成長,並自封為「龍虎豹蛇」。好姊妹阿嬌出嫁,三位閨密都非常激動,尤其是與阿嬌組成Twins達17年之久的阿Sa,在婚禮上致辭時用力抱實阿嬌喊住說:「自從阿嬌同我講,求咗婚啦,嗰一下係完全激動到,真係由17年前開始我哋兩個,中間咁多年,大家一齊有過好多唔同嘅Up and Down,但係無論點樣都係一齊去度過。去到今日,見到佢終於搵到一個好錫佢嘅人,呢幾日的心情係好唔識形容,好戥佢高興,同埋真係好得意呀個感覺,大家一齊大!佢而家要嫁人喇!我真係衷心祝福佢哋,要永遠幸福快樂,日日都咁開心。就算嫁咗去台灣都要成日番嚟睇我哋。」阿Sa最後還當眾警告新郎哥Michael:「你要對佢好好哋,不然我哋唔會放過你,哈哈!」

覓得幸福的阿嬌則當眾向阿Sa催婚,在拋花球環節,阿嬌邀請單身的賓客出來搶花球,包括阿Sa、Joey及何超蓮等,阿嬌首先裝作要拋,第二次準備再拋出的時候,她卻直接把花球交到阿Sa手上,令阿Sa不知所措,只是不停傻笑,最後亦欣然接受了好姊妹的祝福。

阿Sa在阿嬌的婚禮上又笑又喊,後來又在社交平台發表感言:「大概是因為我們兩個人一起經歷,一起面對過的一切,旁人根本不能體會,但是只有你懂我、我懂你,只有你知道我有多替你高興,我有多希望你永遠可以幸福快樂就夠了,雖然你再不是蔡太,要變成賴太了!但你永遠永遠都是我的小嬌嬌!」

新娘子阿嬌未有接受傳媒訪問,三位送嫁好姊妹則在婚禮場外接受無線娛樂新聞台的訪問,剛被當眾催婚的阿Sa反過來催阿嬌生B,她直言:「阿嬌值得被愛,值得擁有好錫佢嘅一個人照顧佢。最緊要開開心心、永遠熱戀期,快啲、期待(愛情)結晶品,快啲生BB畀我哋呢班姨姨玩吓!」而身旁的Joey亦鬼馬地說:「聽講佢呢幾日都唔出酒店!」Yumiko亦感動地說︰「今日經歷好溫馨、充滿愛嘅婚禮,希望佢哋一齊行落去,白頭到老!」

之前因簽證過期幾乎未能前來見證阿嬌出嫁的Joey,排除萬難在最後一刻來到現場,她興奮地說:「上天保佑我今日可以企喺呢度見證阿嬌呢個咁大嘅日子,如果我攞唔到簽證,嚟唔到呢個地方,我諗好多年後我都會覺得好遺憾,最開心係咁齊人,雙方父母都有致辭,好感動。我最有感覺係阿Sa講野喎,無論邊個都好,真正同佢(阿嬌)並肩作戰十幾年嘅係呢個人,所以佢講嘅野都好感動、好有畫面,真係由細到大經歷唔同起跌、好精采,所有畫面番晒嚟!」

關注我們Facebook專頁
    相關新聞
      更多瀏覽