8大御用警察演員 個個又型又高大
2018年05月24日20:48

演員要演好一個角色,除咗要有好演技外,最重要個外型同個樣要似。因為演員做戲做得入型入格,係絕對會影響觀眾嘅睇戲嘅投入程度。所以,今次小編就決定同大家一齊睇睇,有邊啲演員係似扮演警察!

撰文:東方新地|圖片:新傳媒圖片庫、電視及電影截圖

延伸閱讀:

《宮心計2》女星激多 邊個古裝look最索?

【深宮計】放棄愛情 籌百萬醫藥費|張慧儀獨力撫養患病養子

吳卓羲

而家38歲嘅吳卓羲由2005年《學警雄心》開始扮演警察,喺呢十幾年間就多次飾演警隊唔同部門嘅角色。之前,更被網友總括出多年嚟佢演嘅警隊角色中,性格一般都離唔開火爆衝動,仲笑指佢過去13年喺警隊不停轉部門,履歷不斷更新。

2005年《學警雄心》
吳卓羲由《學警雄心》就開始佢警察生涯。

有網友仲抵死咁話警隊內部架構好大,吳卓羲仍然有好多警隊職位未做過,相信佢可以做到退休咁話。相反,小編就比較期待想睇到吳卓羲做到「一哥」嘅時候!

今年嘅《飛虎之潛行極戰》扮o記高級督察。

劉德華

華仔扮演警察都相信好有印象,一諗到佢扮警察大家都可能會諗起2002年嘅經典電影《無間道》。

其後華仔都有間唔時扮演唔同嘅警察角色,例如有《盲探》、《拆彈專家》等,又型又靚仔嘅華仔扮警務人員都真係好似!

電影《盲探》劇照。
電影《拆彈專家》劇照。

王敏德

擁有中法荷蘭血統嘅王敏德,身形高大兼一臉硬漢樣,最擅長就係飾演警察中飛虎嘅角色。多年來,王敏德多次出演警察角色,而佢扮演警隊高層嘅形象,更可謂完全入屋!

電影《飛虎出征》劇照。
電視劇《飛虎之潛行極戰》劇照。

2003年,王敏德更憑1994年嘅《飛虎雄心》中,飾演香港警務處特別任務連教官Stone Wong一角,並喺香港電台和香港警務處聯合舉辦嘅「香港理想銀幕警察」選舉中奪冠,可想而知佢警察形象如何深入民心!

任達華

現年63歲嘅任達華多年來在影圈拍攝多套作品,電視電影皆有其影,而佢無論係外形定外貌,飾演紀侓部隊都入木三分,其中喺《PTU》沙展一角就夠晒經典!

電影《PTU》劇照。
電影《衝鋒戰警》劇照。

電影《機動部隊》劇照。

苗僑偉

而家59歲嘅苗僑偉外表夠哂型就唔多講,身型高大之餘,行出嚟個感覺亦只啱做大佬或者尸警隊較高級職位嘅角色。

電視劇《使徒行者》劇照。
三哥眼神幾煞食!
電視劇《刑警》劇照。
電視劇《雷霆掃毒》。

就算平時三哥唔係拍戲,只係出席活動,睇佢一身衣著打扮都好難掩蓋佢個種英氣同有型嘅感覺!所以,小編真心覺得三哥暫時喺TVB入面,係冇人可以型得過佢!

古天樂

古仔所拍嘅電影數目為數唔少,其中佢亦有嘗試飾演警隊角色,例如有電影《爆裂刑警》、《掃毒》、《殺破狼·貪狼》等。

電影《掃毒》劇照。
電影《殺破狼·貪狼》劇照。

其實古仔外形高大,加上膚色黝黑,要扮演一個紀侓部隊人員對佢嚟講都幾適合。

河國榮

睇開TVB劇嘅觀眾,應該唔會對今年53歲嘅河國榮感到陌生,皆因佢經常喺TVB劇入面扮演一啲警察角色,例如有警官同警司。值得一提嘅,係佢喺28年前所拍嘅電視劇《我本善良》中,扮演一位英國警司,年輕時嘅河國榮靚仔程度,真係令小編對眼發哂光!

講到河國榮,佢本身係個澳洲人,因讀書時聽到張國榮的歌曲,自此愛上廣東歌,同時亦間接影響到佢長大後,決心放棄成長地嘅生活,從澳洲到香港闖一闖。

河國榮來港至今己31年。

曾守明

去年不幸離世嘅綠葉演員曾守明,入行超過30年,其演藝生涯做得最多嘅角色大多同警察有關,曾演活多個唔同警察部門嘅角色,包括交通警、便衣警察、飛虎隊、督察、警司等。

《鐵馬戰車》中,曾守明扮演一名交通警員。

原來曾守明唔止戲裡經常飾演警察嘅角色,現實生活中佢同時係一個輔警,其官階為警長,其後於2013年退休,並獲頒授「香港輔助警察長期服務獎章」,以表揚佢作出嘅貢獻。

電視劇《神槍狙擊2013》宣傳。
電視劇《飛虎》。

延伸閱讀:

【深宮計】死得人多!曾偉權被斬頭 陳煒下場仲慘⋯⋯

關注我們Facebook專頁
    相關新聞
      更多瀏覽