新五虎重現 古巨基自誇堅挺
2018年05月15日03:00
古巨基、劉愷威、古天樂、何遠恒和吳家樂再擺當年「新五虎」舊合照甫士重新合照。

【星島日報報道】古巨基《we我們世界巡迴演唱會香港站特別版》前晚舉行第4場,基仔特別邀請昔日獲無線力捧為「新五虎」的拍檔好友古天樂、吳家樂、劉愷威和何遠恒做嘉賓,在台上再擺當年舊合照甫士重新合照,當四虎輪流開基仔玩笑時,古仔被玩返轉頭,現場響起《今期流行》音樂,四虎即大跳古仔經典「拜神舞」,搞到他大叫:「唔係玩野呀?!」

昔日「新五虎」前晚合體現身紅館,合唱《當年情》,又合力搞笑掀起一片笑聲。基仔前晚介紹表演嘉賓出場時,起初提到「今日好難得,上次約得4個,差1個,今日幾經辛苦搵齊5個。」然後古天樂、吳家樂、劉愷威和何遠恒徐徐升上台,令觀眾驚喜歡呼。古仔叫兄弟站前少少安全些,笑言那是基仔跌落台的案發現場,基仔即表示:「案發現場就是企前呢個位啦,反而企番後少少安全。」古仔卻又笑基仔:「哈!你都好野,咁都冇事!堅挺即係堅挺!」基仔反擊︰「我巨肌嚟吖嘛!」古仔繼續進攻︰「哦,你就係落台嗰吓靠條巨肌撐撐所以冇事!」基仔乘機自誇︰「係呀,我動L咁彈番轉頭,哈哈哈!」吳家樂即笑言︰「唔怪得Lorraine跟你咁多年啦!」台上連翻互窒,令台下笑聲不斷。

之後四虎大講對基仔印象,劉愷威指基仔好濕,何遠恒讚基仔是好男人,卻被古仔取笑:「即係冇講野啦!我最近睇新聞,你同個咩彩華散咗,係咪嗰晚我哋約食飯你冇出現,去咗滾所以散?」何遠恒即耍手擰頭:「唔好講呢啲啦。」當四虎問觀眾想聽甚麼歌,觀眾大叫《男朋友》、《今期流行》,現場即響起《今期流行》的音樂,古仔即指着控制台監製錢國偉大叫:「肥仔,你唔係真係玩野呀?!」何遠恒、吳家樂更大跳古仔經典拜神舞,觀眾呼聲四起!古仔求大家放他一馬:「歌可以唱,舞就唔好逼我跳!我拜神拜咗咁多年,唔好搞我啦!」

昨午5時半基仔為尾場個唱拜神,未知是否因墮台意外留陰影,他做足儀式,高舉3支大香時唸唸有詞兩分鐘,又食燒豬取好意頭。傷勢未瘉的基仔步履生硬,回望身後也要移動整個身,最初神情嚴肅,切燒豬時聽到大家高呼才稍露微笑;期間古太Lorraine也關心地偷望老公,公司高層霍汶希慰問基仔頸傷,基仔見有歌迷到場打氣也親切揮手。

關注我們Facebook專頁
    相關新聞
      更多瀏覽