被學友笑國語唔掂 張家輝獲封「渣渣輝」:好玩有親切感
2018年05月03日14:31

【星島日報報道】張家輝自導自演的電影《低壓槽》舉行首映禮,有份參演的張可頤、苗僑偉、張繼聰出席外,身為張家輝的好友張學友和陳慧琳也現身支持。

忙於演出巡迴演唱會的學友,表示明日到江西開騷,又指日前台灣開騷時曾志偉等一班朋友捧場,因為他們為朋友慶祝生日,於是他幫手訂房,原本好秘密,但眾人在社交平台上載相片「洩密」。張家輝未想過學友會出席首映禮,皆因對方起勢開巡迴演唱會,所以沒有聯絡,適逢近日學友在港,於是邀請對方來參與。問到兩人可有合作機會?家輝說:「佢巡咗幾年,好似行咇咁。」

學友睇過《低壓槽》的宣傳片,大讚家輝進步好多,在鏡頭上運用意識形態有個人風格,更笑謂相比他有份參與的電影《陀地驅魔人》成熟好多,打鬥戲好特別。在旁的家輝笑言自己還有好大進步空間,亦多謝投資方容許他任性,望日後有機會嘗試其他戲。記者笑指他可以等學友完成巡唱才開戲,學友謂:「巡到1月可以,你唔會咁快開嘛!」家輝表示一直安守本份,好清楚自己是一個演員,如果有好劇本會再做導演。學友聞言即謂:「做導演唔同咗,以前好似我咁無乜point,做咗導演好正經好有風格,我有啲驚,想嗌佢做大佬。」家輝搞笑謂:「唔使驚!細佬。」

提到在內地拍廣告以國語介紹自己,因發音不準,被網民稱為「渣渣輝」,家輝說:「我不介意,好玩有親切感,當然自己不會鼓吹,亦阻止不到。」學友笑稱聽聞家輝講國語的問題,家輝也被學友也笑過好多次,國語上沒有進步空間,好多香港藝人在內地拍戲也會找北京人配音,就算練到流利國語亦不會採用,這個不是他的偏見而是一套標準。笑問是否不會學國語?家輝直言:「我忠於自己,比較反叛。」對於會否跟太太關詠荷合作拍戲,家輝坦言機會微,始終家中要有人睇住,他較自私不會畀太太拍戲。

關注我們Facebook專頁
    相關新聞
      更多瀏覽