空少教路|空服員推介 8大長途機隨身小物|舒舒服服去旅行!
2018年05月02日13:42

做我地呢行三日唔埋兩日就要出門一次,逐次執行李都真係好花時間。如果話飛短途機去酒店過一晚夜的話,隨便帶一套換洗衣服就可以。但係要飛長途嘅話,我個大喼入面長期都會準備好以下8大長途機隨身小物,今日同大家分享我出遠門嘅standard loading。

延伸閱讀:

【韓國購物】韓國首爾必去! 2 大江南地下街讓你買到手軟走不動啊!

【 FlyJapan 】2018東京必買手信20強:人氣燒棉花糖撻+流心焦糖曲奇…

8大長途機隨身小物

01 | 全球通用Wifi蛋

係呢個無網上就好似世界末日咁嘅年代,飛之前一定要諗定去到外地要點樣上網。好多同事都會有好幾個國家嘅sim卡。市面上其實已經有好幾款可以支援多國使用嘅wifi蛋或者sim卡,我自己就用緊一款支援70個國家/地區嘅wifi蛋。增值六蚊美金就可以有1GB data,如果唔用黎睇video,整係開google map搵下路或者碌下instagram同facebook,都夠用好幾轉長途機架啦!

0
0

如果預左自己需要大量使用數據仲可以買day-pass,同樣六蚊美金一日任用。好處係唔駛換卡同埋都可以share俾人一齊用,由於佢開「行」左都會發出熱力,有啲同事仲攞黎當暖蛋用添〜

02 | 迷你電熱水壺

成日都聽好多都市傳說,講到好多無公德心嘅人會用酒店電熱水壺黎「煲內衣褲」,搞到我地都唔敢亂咁用酒店個公家壺,惟有準備個私家壺。市面上有種可摺疊式嘅旅行裝水壺,摺起左都算輕巧慳位,唔錯架!

03 | 私家拖鞋

講起酒店公家野仲有拖鞋。有啲酒店人員爆料話佢地嘅拖鞋係唔會洗架!雖然都有即棄式嘅拖鞋,但係好似唔係太環保,都係帶返對私伙野穩陣。你話唔著?唔好制呀!塊地氈分分鐘仲老過你呀!

04 | 退黑素片

有時去到時差大嘅地方,唔係咁容易瞓得好同瞓得著。怕食安眠藥太傷身可以考慮下去買退黑素片。佢聲稱係補充劑,退黑素都係人體會自然產生嘅激素,但係有無效都係好視乎個人體質(戴定頭盔先)。有啲同事食3+就夠,有啲同事就話食到10+都無乜用。個人經驗分享係,食完之後通常起碼都會瞓到兩個零鐘熟睡,之後再繼續瞓唔瞓到落去就真係睇彩數。不過好處係食完佢瞓唔會有安眠藥個種「wingwing地」嘅感覺。

05 | USB放濕器

唔知點解好多酒店房都好乾,尤其係有暖氣個啲房間,成日瞓到半夜都會喉嚨乾到醒左,只要係床頭位開住個放濕器瞓就可以改善呢個問題。我用緊一隻球狀可以代替枝裝水樽蓋嘅款式,基本上有水樽或者水杯都可以用黎放濕,幾方便!

06 | 潤唇膏

承上題,除左係酒店房會好乾,其實係飛機上面都好乾。飛十個八個鐘唔搽定潤唇膏通常嘴唇就會甩晒皮。所以要記住唔好check in左枝潤唇膏呀!

07 | Heat Tech/保暖功能內衣

外國有好多地方,即使係夏天,日夜溫差都差好多。為左唔想帶太多件外套咁阻地方,我通常會帶定保暖內衣,夜晚凍嘅時候先著係入面打底。又唔駛再帶一件外套出街,又唔駛諗佢襯唔襯原本個套衫咁煩。

08 | 紙底褲

正所謂「天氣不似預期」,有時行程可以因為好多唔同理由而受到阻滯,好似紐約冬天成日會暴風雪飛唔到,或者香港打風機場運作唔到。滯留係外地最怕就係唔夠換洗嘅內衣褲。唔通真係正面著完反轉再著過咩?啲細菌都有穿透力架嘛。紙底褲質感差就差少少,但係起碼衛生啲先啦。帶定少少未雨綢繆無死錯人嘅。

下一頁:空姐教路|避免Jet lag、帶漏保濕 機艙護膚4大急救妙法

下一頁:【空姐話你知】為何空姐穿著制服到機場的原因!

延伸閱讀:

酒店房務員盤點 | 10樣未必會日日清潔的酒店用品

關注我們Facebook專頁
    相關新聞
      更多瀏覽