姜皓文男人身女人心 結婚18年易服上癮
2018年04月21日17:00

姜皓文(黑仔)捱足32年,由亞視年代扮鬼扮馬到殺入電影圈做綠葉,默默由二打六做到男主角,今年更憑電影《拆彈專家》及《大樂師.為愛配樂》兩片叫兩飛,終於首奪金像獎「最佳男配角」。被叫足多年的黑仔不再黑仔,現在紅到發紫的他表面形象粗獷Man到爆,不過去年擔正以變性人做主題的電影《翠絲》,黑仔投入角色扮女人,姣塗甲油又剃毛著褻衣,竟然易服上晒癮難以自拔。黑仔愈變愈貪靚,食素狂操肌唔畀自己發福,又勤做美容,老公男人身女人心,結婚18年的太太殷寧(原名金慧英)不知幾冧,去年10月仲兩公婆一齊反串慶生。套戲未上黑仔已經入晒戲,想明年衝擊影帝寶座?

撰文:東方新地|圖片:新傳媒圖片庫、姜皓文IG

延伸閱讀:

Stephy獲黃百鳴全力捧 吳千語Out

影后毛舜筠是藍帶高手 星級靚媽也愛學煮

姜皓文 拖老婆行紅地氈

金像獎出爐「最佳男配角」51歲的姜皓文被指守得雲開,實至名歸,努力多年演技終於被認同,上台領獎時他激動說:「我冇乜運氣,啲運氣唔知去晒邊度,但呢幾年遇到好多錫我嘅人,我嘅運氣返晒嚟,驚好運太多會好快死!老婆⋯⋯攞咗喇!多謝導演邱禮濤,多謝編劇李敏同我傾角色,令我更得心應手。我加入咗間好公司,多謝老闆古天樂先生,亦多謝我嘅舊老闆林家棟先生,多謝我嘅一班好朋友、多謝我嘅細佬妹,大佬攞咗喇!以後我會繼續享受每一個角色,因為我愛香港電影。」

姜皓文
姜皓文
周日晚(15日)姜皓文拖實老婆殷寧踏上金像獎紅地氈,二人打扮襯到絕,黑仔沒有以傳統西裝出席,反而大膽玩味,穿上灰藍色大關刀領孖襟西裝配白色長闊褲、白鞋,時尚感即時大大提升,最終先拔頭籌奪得今屆金像獎最佳衣著獎,雙喜臨門。
姜皓文
姜皓文
姜皓文今年同時憑《大樂師.為愛配樂》及《拆彈專家》獲提名第37屆香港電影金像獎「最佳男配角」獎,最終憑後者首度奪獎。
姜皓文
姜皓文
曾三度提名最佳男配角的黑仔,去年被曾志偉摘下最佳男配角時爆出一句「我一部撼你26部」後,今年終首奪金像獎最佳男配角,他在台上激動對台下的太太講:「老婆!攞咗喇!」
姜皓文
姜皓文
黑仔強調要多謝劉德華一次又一次給予機會,並多謝新老闆古天樂及舊老闆林家棟,說時熱淚盈眶。

豁出去演變性人

入行32年來,黑仔從不計較角色輕重,多年來參與眾多港產片,即使是二打六,他都盡力去演,近年演出的角色佔大部分都是比較粗獷,如紀律部隊或黑社會大佬,去年他接受挑戰在電影《翠絲》中演變性人,雖然易服打扮仍然掩飾不了他周身毛髮與肌肉之軀,但一舉手一投足他都極盡嫵媚,對於演戲多年的專業演員來說,惟有百分百投入才可以成功。

姜皓文
姜皓文
黑仔向來演的角色亦正亦邪,演變性人還是第一次,在電影《翠絲》中黑仔擔正做男主角,多場內心戲考驗演技,雖未上映但穿喱士褻衣配吊帶襪影海報已夠震撼,還要單手輕撥恤衫衣領,展現媚態及自憐感覺,超級極度吸睛。
姜皓文
姜皓文
為投入變性人翠絲的角色,黑仔在電影拍攝期間當正自己是翠絲,男人身內藏住女人心。

姜皓文
姜皓文

知情者透露:「黑仔開拍前已經睇咗好多有關變性人嘅資料,佢亦親身接觸過一啲變性人,佢好想了解佢哋嘅心態。雖然佢扮極個樣都仲係好男人,皮膚又黑毛孔又大,但係佢好投入,形態同 表情都似一個女人,因為戲中要著褻衣唔可以毛茸茸令人見到反胃,所以佢要剃晒啲體毛,男人剃完好快就會生,所以要keep住剃,仲要每日都塗手甲同腳甲。黑仔完全係上晒癮,佢話剃完毛皮膚滑好多,有時見佢好似投入得滯,講嘢開始乸乸哋。」

姜皓文
姜皓文
為了在片中著褻衣表現出女性的嫵媚性感一面,本來體毛濃密的黑仔要keep住用剃毛器剃掉身上的體毛,他更在網上po相話自己剃毛剃到上了癮。

姜皓文
姜皓文
姜皓文
姜皓文

其實16年黑仔在網劇《無間道》中演社團太子爺已經畫晒黑眼線塗甲油,對於這類角色早已駕輕就熟。

姜皓文
姜皓文
在網劇《無間道》內,黑仔飾演黑幫社團太子爺,畫晒粗黑眼線塗上黑色甲油,未拍《翠絲》前他已經有中性打扮的前科。
姜皓文
姜皓文
《翠絲》中的黑仔與惠英紅結婚多年育有一子,但他卻發現自己有做女性的傾向,逐步去實踐變性時,面對不少困難和遏抑。要Man爆的黑仔去演繹變性人,他說:「絕對係我從影生涯一個最大挑戰同突破,事前都做足身、心上嘅準備,係有啲心理關口要突破嘅!」
姜皓文
姜皓文
扮女人除了要修靚手甲腳甲,仲要日日塗甲油,難得黑仔完全唔抗拒,仲不時影低自己毛孔粗大又黑的雙手及腳掌,看來甚為欣賞自己身體每一個部分。

姜皓文
姜皓文

老婆大讚靚仔

拍完《翠絲》,黑仔愈來愈貪靚,閒時要求老婆殷寧為她用美容機做Facial,又習慣了修甲,姿整得像個女人,可能演過變性人,他亦開始了解女人心,從前性格火爆老粗一名的他,對老婆亦變得溫柔。結婚18年,殷寧早前在電台公開分享與老公姜皓文夫妻相處之道,她表示大家都要遷就容忍,但黑仔近年性格明顯有改變,變得如另一個人:「依家出街佢會幫我拎手袋,我嘅事佢會好緊張,食蝦都剝埋蝦殼。」對於近年黑仔開始愛打扮,她謂唔驚老公多艷遇:「初相識覺得佢黑到似阿差,估唔到依家發現嫁咗個靚仔老公,唔怕嘅,女人都係自強增值會好啲。」

姜皓文
姜皓文
以前的黑仔不修邊幅打扮求其,自從拍完《翠絲》,他開始對自己的皮膚及儀容好講究,不時要求老婆幫佢做Facial。
姜皓文
姜皓文
黑仔為演變性人唔止要易服、化妝及塗甲油,心理方面都要作出調整才能投入角色,黑仔表示很想電影快上映,到時便可知道外界對其破格演出的反應。

易服開派對

黑仔與殷寧都在10月生日,去年二人為慶生兼結婚18周年,在馬來西亞檳城度假搞派對,邀請了林建明及寶珮如等圈中好友一齊狂歡,黑仔要求大 搞反串化妝舞會,當日他戴上白色長假髮扮美少女戰士,而老婆就反串扮日本武士,身為公眾人物,拍戲做變性人的機會可遇不可求,開派對易服就可以盡情過足癮,兩公婆不知玩得幾開心投入,一班朋友為黑仔與殷寧送驚喜,先為黑仔編排專屬的生日歌與舞蹈,令姜氏夫婦在旅程中又笑又喊,還影了不少合照留念。

姜皓文
姜皓文
為慶祝結婚18周年兼夫婦同月生日,去年10月黑仔與老婆殷寧孖老友去大馬開P玩到癲,他們邀請多位好友包括林建明、寶珮如等到馬來西亞檳城度假。
姜皓文
姜皓文
黑仔戴美少女戰士假髮反串扮日本藝妓,老婆則扮日本武士,從相中可見,當時正拍《翠絲》的他入晒戲,表情比女人更女人。

甘做老婆出氣袋

早年黑仔半紅不黑,有傳他脾氣極臭經常當老婆殷寧是出氣袋,但近年事業開始順景,才頻頻見他拖實老婆出席公開活動晒恩愛,這些年來殷寧一直在她身邊默默扶持,二人曾共患難步過低潮期,黑仔現為圈中炙手可熱的男演員,發財立品的他對老婆愈來愈好。周日晚(15日)黑仔在金像獎頒獎禮台上忘記了答謝老婆,在慶功宴上被問會否再買樓給老婆作獎勵,他笑說未知,大呻搵食艱難:「我成日都獎勵佢。其實我好想做番佢嘅出氣袋,佢好多嘢遷就我,知我火爆,收埋好多嘢唔講,我好唔好意思,想同佢講我以後唔會點火爆,可以放心傾。佢冇嬲我冇多謝佢,佢話應該講多啲幫過我嘅人,佢真係好到不得了,仲叫我唔好成日提住佢。」

姜皓文
姜皓文
宣布獲獎的一刻,黑仔第一時間擁吻身邊的老婆殷寧,表現非常激動,上台拿獎時更以哭腔問:「真係我嘅?」
姜皓文
姜皓文
黑仔在慶功宴風騷滿場飛,他透露將會飛泰國拍新片,起程前會與太太及一班街坊舉行小型慶功。對於在台上忘記多謝太太,黑仔說:「佢冇嬲我,仲叫我要多謝應該多謝嘅人,真係好到不得了,佢好多事都為我著想,比我更識大體。」

黑仔事業家庭兩得意,電影長拍長有,又簽了古天樂投資的天下一藝人管理有限公司,身價十級跳,日前本刊記者見他與殷寧現身中環IFC逛名店,最初見黑仔單拖掃完貨趕去與老婆會合,紅咗都唔囂的他見記者亦大方打招呼,臨走仲扮鬼臉,看來唔止有女人心,仲有無限童心。

姜皓文
姜皓文
早前黑仔現身中環IFC,手持一袋戰利品的他撳住手機快步行,原來是趕住去會合在商場內的老婆殷寧。

姜皓文
姜皓文

姜皓文
姜皓文
黑仔與老婆見到本刊記者一直保持笑容非常友善,入到𨋢仲直豎拇指扮鬼臉。

古天樂首奪影帝 多年來低調行善 內地建逾百學校

金像獎紅地毯大戰 女星爆乳大激鬥

延伸閱讀:

《蝸居宅急變》粉紅色「催情部屋」好驚嚇…

關注我們Facebook專頁
    相關新聞
      更多瀏覽