【憤怒了】南生圍縱火 夏蕙姨:再燒我就唔着衫影寫真
2018年04月08日07:00

南生圍一個月發生過三次火警,連橫水渡碼頭都遭縱火焚毀,事件引起各界關注,連夏蕙姨黃夏蕙都憤怒了!

南生圍係唔少港人假日熱門旅遊點,亦喺好多電視劇同電影,好似《尋秦記》、《胭脂水粉》、《黑社會》、《放逐》及《殺破狼》等拍攝地點。

黃夏蕙知道南生圍被縱火後,就親自去到南生圍,大鬧縱火嘅人:「南生圍係香港僅存嘅寧靜地方,諗番舊陣時拍電影個陣,武打片就去城門水塘;拍愛情片就一定係南生圍。」

夏蕙姨更許下「承諾」,話如果再有人破壞南生圍,佢就喺入面影寫真:「環境寧靜到您可以無拘無束咁同大自然同呼吸一口空氣。同一個地方有好多個景點,俾大家玩足一日,仲可以學曉如何尊重大自然嘅態度。野火燒不盡,希望住後日子能夠春風吹又生。唉!要地方起樓,香港仲有大把可以揀,何必要搞呢度啦?今次就着住衫影寫真,下次再燒,我就實行讓半球或者唔着衫咁影,實行抗議呀!」

最後佢就話:「可憐吓我呢個老人家,唔好再搞南生圍,俾香港後花園呢個美譽流傳落去啦。求求你,你不懂的!」

為咗大眾著想,希望唔好再有人破壞南生圍啦!

關注我們Facebook專頁
    相關新聞
      更多瀏覽