【未落實】做《美女廚房》主持網民話唔睇 Bob:會好好檢視自己
2018年03月16日07:00

大台有意再開拍《美女廚房》,不過主持唔再係當年嘅方力申、鄭中基、梁漢文,而係變咗林盛斌、蕭正楠同張振朗,唔少網民都話唔睇好,更話Bob太嘈太煩!

「King Jer娛樂台」日前亦喺網上問大家會唔會睇,好多人都話成個節目冇靈魂:「唔洗睇啦,尤其是最煩X嗰個光頭佬」、「聽到有阿Bob都唔想睇,嘈到」!

至於Bob ,見到大家對佢負評,佢就喺留言區度逐一回應,仲話自己會改善,之後更以長文回覆傳媒,話好尊重每一個網友:「各位網友們嘅留言,無論正面定負面,對我嚟講都係好重要嘅推動力,令我明白自己不足嘅地方,好好檢視自己點樣可以再做好啲,進步同改善。」

Bob 話自己跟網友意見去改善,發覺出嚟效果唔錯:「其實最近我主持《大玩特玩》真係有去好好控制自己聲量,亦嘗試唔好吓吓都咁誇張、咁癲,我發覺出嚟效果真係好好,身邊好多朋友都話睇得好開心,我真係好希望一步一步去努力改進,令觀眾同網友們對我改觀!」

最後佢重申,確實消息交番俾公司交待,又好高EQ咁話:「我喺主持方面嘅年資同經驗上都係好幼嫩,我真係好感謝佢哋嘅意見,所以我先逐一留言同佢哋傾吓偈,了解多啲自己嘅缺點,希望彌補不足之處。不過有部份網友話我又肥又樣衰又肉酸就真係冇辦法,因為天生係咁,哈哈哈哈!」

關注我們Facebook專頁
    相關新聞
      更多瀏覽