【金草莓】湯告魯斯做「最爛影帝 」 《變形金剛》終甩難?
2018年03月04日07:00

奧斯卡頒獎之前,都會有個「表揚」爛片嘅「金草莓獎」,畀大家開心笑下。星期六呢日,呢個頒獎禮終於「舉行」,動畫《Emoji大冒險》成為「大贏家」,拎到四個金草莓獎項,包括最差電影、最差導演、最差組合以及最差劇本!

至於湯告魯斯憑新版《盜墓迷城》拎到最差男主角,成為舊年嘅「最爛影帝」,而最差女主角就係《Boo 2!A Madea Halloween》入面,反串扮女人嘅男星Tyler Perry!

「型佬」米路吉遜都出名好戲,拍過唔少經典電影,不過都出事,憑《左兩爸右兩爸》拎最差男配角,最差女配角就係《格雷的五十道色戒2》嘅金碧辛嘉!

《變形金剛》系列,年年都大熱,今年《變形金剛:終極戰士》都有九項提名,不過似乎甩難,未有獲頒任何獎項。

關注我們Facebook專頁
    相關新聞
      更多瀏覽