契兄妹情升溫 唐詩詠 恨拖馬明攞獎
2018年01月15日12:31

唐詩詠被封「最佳女朋友」,但天意愛弄人偏偏遇上錯的人,先有崔建邦後有洪永城,愛情失意的她事業得意,今年憑《不懂撒嬌的女人》人氣急升,有份角逐無綫頒獎禮「最佳女主角」。為力爭視后,唐詩詠一改低調作風,哭訴當年月入三千的辛酸史,更公開力撐對她情深義重的契哥馬國明做視帝,一於有獎齊齊攞。唐詩詠與馬明懶理閒言閒語,兄妹情從未變過,繼續攬頭攬頸嘻嘻哈哈,早前還一起歡度聖誕,若然能拖住上台拎視帝視后,肯定是觀眾最想看到的畫面。

撰文:東方新地

唐詩詠 恨拖馬明攞獎

加入無綫15年,唐詩詠由《當四業草踫上劍尖時》做到《不懂撒嬌的女人》,當日小花變成當家花旦,多年來睇住不少前輩拎視后,36歲的她終於機會嚟喇!今年憑《不懂撒嬌的女人》Cherry一角有份角逐視后的她呼聲甚高,與同劇的宣萱叮噹馬頭,向來低調的她決定不再翹埋雙手被動等運到,最近為爭獎頻頻出招。

唐詩詠
唐詩詠
早前在《萬千星輝頒獎典禮2017》提名名單公布記者會上,雙雙入圍「最佳女主角」的田蕊妮與唐詩詠扮爭獎不和,兩屆視后阿田表明不會讓賽,堅拒投對方一票。
唐詩詠
唐詩詠
唐詩詠在《不懂撒嬌的女人》中,演Cherry一角很討好!
唐詩詠今年憑《不懂撒嬌的女人》Cherry一角有份角逐視后,呼聲甚高,與同劇的宣萱可謂叮噹馬頭!棄信投明

先分析一下今年台慶頒獎禮的形勢先,視后方面有競爭力的人選包括田蕊妮、宣萱、唐詩詠、李佳芯與黃翠如,外界都認為會是宣萱與唐詩詠之爭,而視帝方面王浩信與馬國明就競爭激烈,各有支持者。對於唐詩詠來說,今年正是攞獎的好時機,本來與同劇男主角王浩信一齊攞會是錦上添花,不過她始終偏向馬明。據知情者透露:「王浩信同Natalie(唐詩詠)喺《不懂撒嬌的女人》做一對,一齊攞係視后視帝係最perfect嘅,不Natalie知道馬明等咗好多年,輪都應該輪到佢,點都係契哥親啦!再加上佢哋嚟緊有套以醫生做題材嘅新劇會一齊拍,如果齊齊攞獎再一齊拍劇,咁人氣就會更加勁。咁多年嚟Natalie都好安份守己,佢以前係個好被動嘅人,但自從同洪永城分手,佢想通咗好多嘢,做人唔可以一成不變,好多嘢都要靠自己努力爭取,所以佢最近好落力為自己拉票,放假都做宣傳,睇得出佢好想攞視后。」

唐詩詠
唐詩詠
唐詩詠憑《不懂撒嬌的女人》成為今年視后大熱,契哥馬國明亦憑《降魔的》力爭視帝,兩個都未曾嘗過視帝視后滋味,對攞獎期望甚高。

甩拖換紅跑

上周五(5日)下午二時許,唐詩詠素顏現身銅鑼灣世貿中心,見到本刊記者大方甜笑,心情大靚。當日唐詩詠駕駛今年新買價值四十幾萬的紅色寶馬跑車出街,有指是與洪永城甩拖後不久,索性換架紅車催旺桃花。

唐詩詠
唐詩詠

唐詩詠
唐詩詠
唐詩詠為人長情,之前駕駛的白色甲蟲車揸足九年,曾經接載過洪永城無限次。

當日唐詩詠去美容院做完facial,離開時冇戴帽頭髮有點亂,行過出名的餅店忍唔住要睇吓,其實她年中與友人夾份開的餅店亦在附近,唔通呢啲就係知己知彼?

唐詩詠:佢一直係我心水男主角!

有指今屆視帝是馬明與王浩信之爭,身為馬明契妹的唐詩詠偏心到出面,早前已公開為契哥拉票:「馬明馬明馬明!真係好想佢攞,佢等咗好耐先有個角色有咁大迴響,佢係好好嘅演員!」日前她接受本刊記者訪問,更表明心跡恨與馬明一齊攞獎。

本刊記者 唐:唐詩詠

記:今年有冇信心攞獎?有冇信心同把握憑《撒嬌》拎視后?

唐:梗係要話有啦!信心都係網民畀我嘅!多謝佢哋!

記:你呼聲都好高喎!有冇搵啲朋友拉票?

唐:已經好開心喇大家覺得我呼聲好高,拉票係一定要嘅,參加得比賽就要落力啲去參與。

記:洪永城都有幫你拉票喎!

唐:佢首先要自己投咗票先!多謝佢,多謝有朋友幫我拉票。

記:咁馬明係咪你心水男主角?

唐:係!佢一直都係!

記:有冇諗過今年同契哥一齊攞獎?

唐:呢個好好喎!如果可以同佢一齊攞獎係一件好好嘅事,

因為我都好想佢攞到!好呀!好想呀!如果能夠一齊攞有雙重意義!

記:最近同馬明有冇見面?

唐:有!之前我哋先一齊出嚟食過飯。

記:心穎有冇一齊出過嚟?

唐:未呀!未見過呀!

記:私底下同佢熟唔熟?

唐:我哋都有傾偈嘅!

唐詩詠
唐詩詠
馬明與唐詩詠互有好感,但一直唔啱timing,即使已成契兄妹,外界依然覺得二人才是金童玉女。上月聖誕節,二人又一起度過佳節,網民更熱捧他們成為一對。

為自己拉票

捱過痛過的唐詩詠,為自己拉票表現進取,日前接受電台訪問時自爆初入行時月薪只得三千元,其時不單要節衣縮食逼巴士,更要依賴家人的金錢援助,及後因為得到前高層陳志雲的賞識,人工才直上萬多元的大關,當主持人阮兆祥問到如果攞視后最想多謝的人是誰?她哽咽起來:「擺咗喺心入面,一直希望有個機會可以多謝Stephen,可能要攞獎先可以多謝佢。」要藉住攞獎的機會在台上多謝恩人,唐詩詠看來志在必得。

唐詩詠
唐詩詠
唐詩詠身材唔惹少,不過她一直禾桿冚珍珠,最近不時以性感打扮示人,話畀大家知其實佢都有事業線。
唐詩詠
唐詩詠
唐詩詠在電台訪問自爆初入行月薪得三千蚊,要節衣縮食逼巴士,更要依賴屋企人經濟援助,後來得到前高層陳志雲賞識,人工加到過萬,提及恩人陳志雲更講到喊:「擺咗喺心入面,一直希望有個機會可以多謝Stephen,可能要攞獎先可以多謝佢。」九龍城搵食陸永殺到

上周三(3日)下午一時許,唐詩詠在電台做完訪問,駕車往九龍城搵地方醫肚,一個人唔知食咩好,站在街頭不知幾咁迷惘,後來她入了一間車仔麵店,門外貼了多張明星與麵店老闆的合照做生招牌,當中包括陸永。唐詩詠孤伶伶食到尾聲,送完兩個女返學的陸永突然走入麵店,見到唐詩詠即時一齊坐。個樣似未瞓醒的陸永大啖大啖食,又同老闆好好傾,原來佢真係熟客仔。

唐詩詠
唐詩詠
自己食飽再陪陸永食,唐詩詠在麵店逗留了兩小時,離開時更被老闆集郵做生招牌,她咁親民當然唔會say no。

唐詩詠
唐詩詠

重提感情重創

被封「最佳女朋友」的唐詩詠情路上多波折,她亦不介意重提與洪永城分手一事,更不諱言「最佳女朋友」的稱號使另一半有很大壓力:「好似佢做咩都唔好咁!如果再拍拖,要小心處理男友嘅心理,或者自己都要做多少少,唔好令佢咁諗。有時自己知道啲新聞唔係真,但原來隔籬嗰個都會有唔舒服!如果畀我揀,想過咗最穩定嘅階段先公開,等對方了解到真正嘅我係點樣。」講到了解,馬明可算是其中一個最了解唐詩詠的人,二人經歷無數高山低谷,即使馬明曾公開表示好喜歡唐詩詠,始終未能成為一對,這對契兄妹感情夠晒曖昧。早前有傳馬明與黃心穎情變,而剛過去的聖誕節,馬明約唐詩詠及一班兄弟飯聚,都沒有預女友黃心穎,當二人的合照放上社交網後,不少網民亦留言表示他們才是最相襯的一對,甚至希望他們一起成為視后視帝。人與人之間感情有好多種,馬明與唐詩詠的兄妹情能否再昇華?男未婚女未嫁,兩個都係電視圈荀盤,最緊要唔好愛得太遲。

唐詩詠
唐詩詠
唐詩詠與鄭嘉穎、馬國明、黃嘉樂及林子善早年因合作拍攝電視劇《鐵馬尋橋》結成好友,大時大節一定約埋飯聚,不過詩詠直認馬明至今都未帶過女友黃心穎出席。

相關文章:

男友愈醜女友易變肥!美國研究指情侶樣貌會影響對方身材

結婚十周年 蔡少芬 張晉穿十年前禮服影全家福

【父權社會】南韓少女遭41人性侵 警:不是你先勾引人嗎?

關注我們Facebook專頁
    相關新聞
      更多瀏覽